Mafumbo Ghakufuma Ku Ŵaŵazgi

Chifukwa wuli Yesu wati wababika, Yosefe na Mariya ŵakalutilira kukhala ku Betelehemu m’malo mwa kuwelera kukwawo ku Nazarete?

Baibolo likuyowoya yayi. Kweni likuyowoya vinthu vinyake ivyo vingatovwira kumanya vifukwa ivyo panji ŵakachitira nthena.

Mungelo wakaphalira Mariya kuti waŵenge na nthumbo na kubaba mwana. Apo mungelo wakayowoyanga uthenga uwu, Mariya na Yosefe ŵakakhalanga ku Nazarete, tawuni ya mu Galileya. (Luka 1:26-31; 2:4) Pamanyuma, ŵati ŵafuma ku Eguputo, ŵakawelera ku Nazarete. Uku ndiko Yesu wakakulira ndipo wakamanyikwanga kuti ni Munazarete. (Mat. 2:19-23) Ndipo kanandi para tikuyowoya vya Yesu, Yosefe, na Mariya, tikughanaghanaso vya Nazarete.

Mariya wakaŵa na mubali wake zina lake Elizabeti, uyo wakakhalanga ku Yuda. Elizabeti wakaŵa muwoli wa wasembe Zekariya kweniso wakazakaŵa mama wa Yohane Mubatizi. (Luka 1:5, 9, 13, 36) Mariya wakaluta kwa Elizabeti ku Yuda ndipo wakakhalako kwa myezi yitatu. Ndipo pamanyuma wakawelera ku Nazarete. (Luka 1:39, 40, 56) Lekani Mariya wakamanyangako makora ku Yuda.

Pati pajumpha nyengo, Yosefe wakapulikira dango lakuti ŵanthu wose ‘ŵalembeke.’ Ntheura Yosefe wakenda kufuma ku Nazarete m’paka ku Betelehemu, “msumba wa Davide” uwo uchimi ukati ndimo muzamubabikira Mesiya. (Luka 2:3, 4; 1 Sam. 17:15; 20:6; Mika 5:2) Mariya wati wababa Yesu, Yosefe wakakhumba yayi kuti Mariya wende na bonda mtunda utali kuwelera ku Nazarete. Ŵakalutilira kukhala ku Betelehemu, msumba uwo ukaŵa pa mtunda wa makilomita 9 kufuma ku Yerusalemu. Ntheura chikaŵako chipusu kwa iwo kuti ŵalute na mwana wawo ku tempile na kukapeleka sembe yakwenelera.—Lev. 12:2, 6-8; Luka 2:22-24.

Mungelo wa Chiuta wakaŵa kuti wamuphalira kale Mariya kuti mwana wake wazamuhara “chitengo cha Davide” na “kuwusa nga ni Themba.” Panyake Mariya na Yosefe ŵakawona kuti ntchinthu chapadera chomene kuti Yesu wakababikira nadi mu msumba wa Davide. (Luka 1:32, 33; 2:11, 17) Ntheura panji ŵakawona kuti ntchamahara kuti ŵalutilire dankha kukhala kwenekuko m’paka apo ŵamanyirenge ivyo Yehova wakukhumba kuti ŵachite.

Tikumanya yayi kuti ku Betelehemu ŵakaŵa kuti ŵakhalako kwa utali wuli apo ŵakumanya vya nyenyezi ŵakizanga. Kweni panyengo iyi, mbumba iyi yikaŵa kuti yili na nyumba kweniso Yesu wakaŵaso bonda yayi. (Mat. 2:11) Vikulongora kuti m’malo mwa kuwelera kwawo ku Nazarete, iwo ŵakakhaliskako ku Betelehemu ndipo chikaŵa waka chikaya chawo.

Pamanyuma Herode wakalangura kuti ‘ŵasepuka wose mu Betelehemu ŵakomeke, kwambira ŵana ŵa vyaka viŵiri kukhilira pasi.’ (Mat. 2:16) Mungelo wakamuchenjezga Yosefe vya chiŵembu ichi, ndipo iyo na Mariya, ŵakachimbilira nayo ku Eguputo Yesu na kukhala kwenekuko m’paka apo Herode wakafwira. Pamanyuma, Yosefe wakaluta ku Nazarete na mbumba yake. Chifukwa wuli ŵakaweleraso ku Betelehemu yayi? Chifukwa chakuti pa nyengo iyo mwana wa Herode, Arikelawu, ndiyo wakawusanga mu Yudeya, ndipo wakaŵa wankhaza chomene. Kweniso chifukwa chakuti mungelo wa Chiuta wakamuchenjezga Yosefe kuti wangawelerangaso uku yayi. Ku Nazarete kukaŵa kwakuvikilirika uko Yosefe wangalelerako Yesu kuti wasope Yehova.—Mat. 2:19-22; 13:55; Luka 2:39, 52.

Yosefe wakwenera kuti wakafwa pambere Yesu wandajure nthowa ya ŵanthu awo ŵamukhala kuchanya. Ntheura Yosefe wazamuwuskikira pa charu chapasi. Ŵanandi ŵazamukumana nayo na kupulika vinandi kwa mwenecho pa chifukwa icho iyo na Mariya ŵakalutililira kukhala ku Betelehemu pamanyuma pakuti Yesu wababika.