Deuteronomium
25 “Sɛ asɛm bi si mmarima mmienu ntam+ na wɔde ba atemmufoɔ+ anim a, wɔmmu wɔn atɛn; wɔmmu deɛ n’asɛm yɛ dɛ no bem na wɔmmu deɛ n’asɛm nyɛ dɛ no fɔ.+ 2 Sɛ ɛfata sɛ wɔhwe deɛ ɔdi fɔ+ no a, ɔtemmufoɔ no mma no nna hɔ wɔ n’anim na ɔmmɔ no mmaa+ dodoɔ a ɛne ne bɔne no sɛ. 3 Mmaa aduanan na ɔmmɔ no; ɔmmma no mmmoro so. Anyɛ saa na ɔhwe no boro so a,+ wo nua anim bɛgu ase w’anim.
4 “Nkyekyere nantwie ano berɛ a ɔreporo ayuo.+
5 “Sɛ anuanom bi wɔ hɔ na baako wu berɛ a ɔnni ba a, ɛnsɛ sɛ deɛ wawuo no yere kɔware abɔntensoni. Mmom ne kunu nua no nkɔ ne ho na ɔnware no na ɔnyɛ okunu nua asɛdeɛ.+ 6 Na ɔmfa ne nua a wawuo no din nto abɔfra a ɔbaa no bɛdi kan awo no no so+ na ne nua no din anyera amfiri Israel.+
7 “Na sɛ ɔbarima no mpɛ sɛ ɔware ne nua yere no a, ɛnneɛ okunafoɔ no nkɔ mpanimfoɔ nkyɛn kuro no pono ano+ na ɔnka nkyerɛ wɔn sɛ, ‘Me kunu nua no mpɛ sɛ ɔma ne nua din tena Israel. Ɔmpɛ sɛ ɔware me yɛ okunu nua asɛdeɛ.’ 8 Afei ne kurom mpanimfoɔ no mfrɛ no nkasa nkyerɛ no, na ɔnnyina wɔn anim nka sɛ, ‘Mempɛ sɛ meware no.’+ 9 Ɛba saa a, ɔbaa no nyi ne kunu nua no nan ase mpaboa mpanimfoɔ no anim+ na ɔnte ntasuo ngu n’anim+ nka nkyerɛ no sɛ, ‘Saa na ɛsɛ sɛ wɔyɛ obi a ɔmpɛ sɛ ɔkyekyere ne nua fie.’+ 10 Afei edin a wɔde bɛfrɛ no wɔ Israel ne ‘Deɛ wɔayi ne mpaboa no fie.’
11 “Sɛ mmarima mmienu reko na baako yere ba sɛ ɔrebɛgye ne kunu afiri deɛ ɔreboro no no nsam, na ɔsɔ ne barima mu a,+ 12 twa ne nsa. Nhu no mmɔbɔ.+
13 “Mfa nkariboɔ ahodoɔ mmienu,+ kɛseɛ ne ketewa, nhyɛ wo kotokuo mu. 14 Mfa efa susudeɛ ahodoɔ mmienu,+ kɛseɛ ne ketewa, mma wo fie. 15 Fa nkariboɔ a ɛtene susu biribiara pɛpɛɛpɛ, na saa ara na nya efa susudeɛ a ɛtene na ɛyɛ pɛ, na wo nkwa nna aware asase a Yehowa wo Nyankopɔn de ama woɔ no so.+ 16 Yehowa wo Nyankopɔn kyiri obiara a ɔyɛ saa, obiara a ɔsisi afoforɔ biara.+
17 “Kae deɛ Amalek de yɛɛ mo berɛ a mofiri Egypt reba no.+ 18 Kae sɛdeɛ wonam kwan so a woabrɛ na woahodwo no ɔbɛto hyɛɛ wɔn a wɔaka akyire no so twaa wɔn guiɛ no; wansuro Nyankopɔn.+ 19 Enti sɛ woduru asase a Yehowa wo Nyankopɔn de ama woɔ no so na Yehowa wo Nyankopɔn ma wode wo ho firi w’atamfo a wɔatwa wo ho ahyia no nsam a,+ pepa Amalek ho nkaeɛ biara firi ɔsoro ase.+ Mma wo werɛ mmfiri.