2 Korintofoɔ
8 Afei, anuanom, yɛrema moahunu adom a Onyankopɔn de adom Makedonia+ asafo ahodoɔ no, 2 sɛ wɔn ahohia berɛ mu sɔhwɛ kɛseɛ mu no, wɔn anigyeɛ mmorosoɔ ne wɔn hia buruburoo no maa ahonyadeɛ a ɛfiri wɔn ayamyɛ mu yɛɛ kɛse.+ 3 Na wɔyɛɛ sɛdeɛ wɔn ahoɔden teɛ,+ aane, medi adanseɛ sɛ wɔyɛɛ deɛ ɛboro wɔn ahoɔden soɔ mpo, 4 berɛ a wɔn ara firi wɔn pɛ mu srɛɛ yɛn ara sɛ yɛmma wɔn hokwan na wɔmfiri ayamyɛ mu mfa deɛ wɔwɔ mma na wɔanya som a wɔsom akronkronfoɔ+ no mu kyɛfa no. 5 Na ɛnyɛ sɛdeɛ na yɛn ani da so kɛkɛ no, na mmom wɔnam Onyankopɔn pɛ so dii kan de wɔn ho maa Awurade+ ne yɛn. 6 Yei maa yɛsrɛɛ Tito+ sɛ, sɛdeɛ ɔfirii aseɛ mo mu no, ɔnhwɛ mma monwie ɔma a ɛfiri ayamyɛ mu saa no. 7 Nanso sɛdeɛ moboro so adeɛ nyinaa mu,+ gyidie ne kasa ne nimdeɛ+ ne mmɔdemmɔ nyinaa ne ɔdɔ a yɛdɔ mo yi mu no, mommoro so saa ara wɔ ɔma a ɛfiri ayamyɛ mu yi mu.
8 Ɛnyɛ sɛ mereka yei de ahyɛ mo,+ na mmom mmɔden a afoforɔ abɔ wɔ ho ne sɛdeɛ ɛbɛyɛ a mɛhunu sɛ mo dɔ di mũ ntira. 9 Na monim yɛn Awurade Yesu Kristo adom no, sɛ na ɔyɛ ɔdefoɔ deɛ, nanso mo nti ɔbɛyɛɛ ohiani,+ na monam ne hia so ayɛ adefoɔ.+
10 M’adwene+ wɔ yei ho ne sɛ: asɛm yi so wɔ mfasoɔ ma mo,+ ɛfiri sɛ afe nie a mofirii aseɛ sɛ mobɛyɛ, na ɛnyɛ ne yɛ nko, na mmom ɔpɛ a monyaeɛ sɛ mobɛyɛ nso;+ 11 enti afei monwie ne yɛ nso, na ama sɛdeɛ monyaa ɔpɛ sɛ mobɛyɛ no, moafiri deɛ mowɔ mu awie no saa ara. 12 Na sɛ ɔpɛ no wɔ hɔ a, deɛ obi wɔ na ɛsɔ ani,+ na ɛnyɛ deɛ ɔnnie. 13 Na ɛnyɛ sɛ mepɛ sɛ ɛyɛ mmerɛ ma ebinom+ na ɛyɛ den ma mo; 14 na mmom sɛdeɛ ɛbɛyɛ a nneɛma bɛkyɛ pɛ ama deɛ aboro mo soɔ no akɔgu wɔn hia mu, na deɛ aboro wɔn soɔ no nso abɛgu mo hia mu, na nneɛma akyɛ pɛ.+ 15 Saa na wɔatwerɛ sɛ: “Deɛ ɔwɔ pii no annya ammoro so, na deɛ ɔwɔ ketewaa bi no, anhia no ammoro so.”+
16 Afei aseda nka Onyankopɔn sɛ ɔde mo ho mmɔdemmɔ korɔ no ara bi ahyɛ Tito+ akomam, 17 ɛfiri sɛ watie yɛn nkuranhyɛ no ampa, nanso ɛsiane sɛ ne ho pere no kɛse nti ɔfiri ɔno ara ne pɛ mu na ɔreba mo nkyɛn. 18 Na yɛresoma onua a asɛmpa no ho ayeyie a ɔwɔ atrɛ aduru asafo ahodoɔ nyinaa mu no aka ne ho. 19 Ɛnyɛ ɛno nko, na mmom asafo ahodoɔ no ayi no+ sɛ ɔnka yɛn ho mfa akyɛdeɛ yi nkɔ mmeammea mfa nhyɛ Awurade animuonyam+ mfa nkyerɛ sɛ yɛayɛ krado.+ 20 Yɛnam so kwati sɛ yɛbɛma obi anya yɛn ho asɛm+ wɔ ntoboa+ a wɔde ma ayamyɛ mu a yɛde kɔboa yi ho. 21 Na yɛyɛ “nhyehyɛeɛ di ho dwuma nokorɛdie mu, ɛnyɛ Yehowa anim nko na mmom nnipa anim nso.”+
22 Bio nso yɛresoma yɛn nua a yɛada no adi wɔ nneɛma pii mu sɛ ɔyɛ mmɔdemmɔfoɔ aka wɔn ho, na seesei mo mu ahotɔsoɔ kɛseɛ a ɔwɔ nti, ne mmɔdemmɔ no ayɛ kɛse. 23 Nanso sɛ biribi wɔ hɔ a monte aseɛ a ɛfa Tito ho a, ɔyɛ obi a ɔka me ho ne me yɔnko dwumayɛni+ ma mo yiedie; anaa sɛ ɛyɛ biribi a ɛfa yɛn nuanom no ho a, wɔyɛ asafo ahodoɔ no asomafoɔ ne Kristo animuonyam. 24 Enti monna mo dɔ+ ne deɛ yɛde hoahoaa yɛn ho+ wɔ mo ho no adi nkyerɛ wɔn, asafo ahodoɔ no anim.