Asomafoɔ Nnwuma
22 “Mmarima, anuanom+ ne agyanom, afei montie me na menyi m’ano+ nkyerɛ mo.” 2 (Enti, berɛ a wɔtee sɛ ɔde Hebri ne wɔn rekasa+ no, ɛmaa wɔyɛɛ dinn koraa, na ɔkaa sɛ:) 3 “Meyɛ Yudani+ a wɔwoo me Tarso a ɛwɔ Kilikia,+ nanso wɔkyerɛkyerɛɛ me wɔ kuro yi mu wɔ Gamaliel+ nan ase sɛdeɛ agyanom Mmara kyerɛ no pɛpɛɛpɛ,+ na mebɔɔ Onyankopɔn ho mmɔden+ sɛdeɛ mo nyinaa moyɛ no nnɛ yi. 4 Na metaa Ɛkwan yi kɔɔ owuo mu.+ Mekyekyeree mmarima ne mmaa nyinaa maa wɔde wɔn guu afiase;+ 5 ɔsɔfo panin no ne mpanimfoɔ+ badwa no nyinaa bɛdi me adanseɛ. Megyegyee nkrataa+ firii wɔn hɔ nso kɔmaa anuanom a wɔwɔ Damasko no, na na menam kwan so rekɔkye wɔn a wɔwɔ hɔ no aba Yerusalem ama wɔatwe wɔn aso.
6 “Na merekɔ a mereyɛ abɛn Damasko bɛyɛ owigyinaeɛ no, mpofirem ara na hann kɛseɛ bi hyerɛn firii soro twaa me ho hyiaeɛ,+ 7 na metwa hwee fam, na metee sɛ nne bi ne me rekasa sɛ, ‘Saul, Saul, adɛn na wotaa me?’+ 8 Mebuaa sɛ, ‘Ɛyɛ wo hwan, Owura?’ Na ɔka kyerɛɛ me sɛ, ‘Ɛyɛ me Nasareni Yesu, a wotaa no no.’+ 9 Afei mmarima a wɔka me ho+ no hunuu hann no nanso wɔante nne a na ɛne me rekasa no.+ 10 Ɛnna mekaa sɛ, ‘Menyɛ dɛn,+ Owura?’ Na Awurade ka kyerɛɛ me sɛ, ‘Sɔre kɔ Damasko, na wɔbɛka biribiara a wɔahyɛ sɛ yɛ no akyerɛ wo hɔ.’+ 11 Nanso ɛsiane sɛ na hann no animuonyam mma menhunu hwee nti, wɔn a me ne wɔn nam no sosɔɔ me nsa de me kɔɔ Damasko.+
12 “Afei ɔbarima bi a wɔfrɛ no Anania, a ɔyɛ nyamesuroni sɛdeɛ Mmara no hwehwɛ a Yudafoɔ a wɔtete hɔ nyinaa bɔ no din pa+ no 13 baa me nkyɛn, na berɛ a ɔgyina me ho no, ɔka kyerɛɛ me sɛ, ‘Onua Saul, san hunu adeɛ!’+ Na dɔn no ara mu memaa m’ani so hwɛɛ no. 14 Ɔkaa sɛ, ‘Yɛn agyanom Nyankopɔn+ ayi wo+ sɛ hunu n’apɛdeɛ na hunu+ Ɔteneneeni+ no na te ne nne,+ 15 ɛfiri sɛ wobɛdi deɛ woahunu na woateɛ no ho adanseɛ akyerɛ nnipa nyinaa ama no.+ 16 Na afei adɛn nti na woretwentwɛn wo nan aseɛ? Sɔre ma wɔmmɔ wo asu+ na bɔ ne din ma ɛnhohoro+ wo bɔne.’+
17 “Nanso berɛ a mesan baa Yerusalem+ a merebɔ mpaeɛ wɔ asɔrefie hɔ no, menyaa anisoadehunu,+ 18 na mehunuu no sɛ ɔreka akyerɛ me sɛ, ‘Ma wo ho nyɛ hare na firi Yerusalem ntɛm, ɛfiri sɛ wɔrempene+ me ho adanseɛ a wodie no so.’ 19 Na mekaa sɛ, ‘Awurade, wɔn ara nim pefee sɛ na mekye wɔn a wɔgye wo die no gu afiase+ hwe wɔn wɔ hyiadan ahodoɔ mu;+ 20 na berɛ a wɔrehwie wo danseni Stefano+ mogya aguo no, na me ara nso megyina hɔ bi a mepenee soɔ,+ na mehwɛɛ wɔn a wɔreku no no ntadeɛ ngugusoɔ so.’ 21 Nanso ɔka kyerɛɛ me sɛ, ‘Sɔre kɔ, ɛfiri sɛ mɛsoma wo akɔ aman a ɛwɔ akyirikyiri mu.’”+
22 Na wɔtiee no bɛsii saa asɛm yi so, na wɔmaa wɔn nne so kaa sɛ: “Yi onipa yi firi asase so, ɛfiri sɛ ɔmfata sɛ ɔtena aseɛ!”+ 23 Na ɛsiane sɛ na wɔreteateam toto wɔn ntadeɛ guo na wɔretu mfuturo gu mframa mu+ nti, 24 ɔsahene no hyɛɛ sɛ wɔmfa no mmra asraafoɔ asoɛeɛ hɔ, na wɔnka no mpire mfa nhwehwɛ ne nsɛm mu na ama no ahunu adeɛ pɔtee a enti wɔreteateam+ gu ne so saa no. 25 Na berɛ a wɔtwee Paulo mu a wɔrebɛka no mpire no, ɔbisaa ɔsraani panin a ɔgyina hɔ no sɛ: “Mmara ma kwan sɛ moka Romani+ mpire berɛ a wɔmmuu no fɔ?” 26 Ɔsraani panin no tee yei no, ɔkɔɔ ɔsahene no nkyɛn kɔbɔɔ no amanneɛ sɛ: “Ɛdeɛn na wopɛ sɛ woyɛ yi? Hwɛ, onipa yi yɛ Romani.” 27 Enti ɔsahene no ba bɛbisaa no sɛ: “Ka kyerɛ me, woyɛ Romani?”+ Ɔkaa sɛ: “Aane.” 28 Ɔsahene no buaa sɛ: “Mede sika kɛseɛ paa na ɛtɔɔ saa hokwan yi sɛ ɔman ba.” Ɛnna Paulo kaa sɛ: “Nanso me deɛ, wɔde woo+ me.”
29 Enti, ntɛm ara na wɔn a wɔrebɛyɛ no ayayadeɛ de ahwehwɛ ne nsɛm mu no firii ne nkyɛn kɔeɛ; na berɛ a ɔsahene no hunuu sɛ ɔyɛ Romani+ na wakyekyere no no, ɔsuroeɛ.
30 Enti adeɛ kyeeɛ a ɔpɛɛ sɛ ɔhunu adekorɔ pɔtee a enti Yudafoɔ no abɔ no soboɔ no, ɔsanee no na ɔhyɛɛ asɔfoɔ mpanimfoɔ no ne Sanhedrin no nyinaa maa wɔhyiaam. Na ɔde Paulo bɛgyinaa wɔn mfimfini.+