Dwom

55 O Onyankopɔn, yɛ aso ma me mpaebɔ;+

Na mfa wo ho nhunta me nkotɔsrɛ.+

 2 Wɛn w’aso ma me, na gye me so.+

Adwendwene mma me ho ntɔ me,+

Na me ho yera me,

 3 Ɔtamfo nne ne ɔdebɔneyɛfoɔ ahodwan nti.+

Wɔka nsɛmmɔne gu me so daa,+

Na wɔnya me ho menasepɔ, abufuo mu.+

 4 M’akoma di yea pii wɔ me mu,+

Na owuo ho hu atɔ me so.+

 5 Osuro ne ahopopoɔ ahyɛn me mu,+

Awosoɔ biribiri asi me so.

 6 Na meka no daa sɛ: “O sɛ mewɔ ntaban sɛ aborɔnoma a!+

Anka mɛtu akɔtena baabi.+

 7 Hwɛ! Anka mɛtu akɔ akyirikyiri;+

Anka mɛtena serɛ so.+—Sela—

 8 Anka mɛtu mmirika akɔ me dwankɔbea,

Afiri mframa kɛseɛ ne ahum no mu.”+

 9 O Yehowa, ma wɔn adwene ntu mfra, na yɛ wɔn kasa basabasa,+

Na mahunu aniɛdensɛm ne akasakasa wɔ kuro no mu.+

10 Wɔnam n’afasuo so twa ho hyia awia ne anadwo;+

Na amumuyɔsɛm ne ɔhaw wom.+

11 Amanehunu pii wom;

Na nhyɛsoɔ ne nnaadaa mpa n’abɔnten so.+

12 Ɛnyɛ ɔtamfo na ɔbɔ me ahohora;+

Anka ɛrenha me.

Ɛnyɛ deɛ ɔkyiri me kɔkɔkɔkɔ na wama ne ho so atia me;+

Anka mede me ho bɛhunta no.+

13 Na mmom ɛyɛ wo, ɔdasani a wo ne me yɛ pɛ,+

Obi a meni woɔ, me mannifoɔ,+

14 Me yɔnko a me ne wo dii atirimusɛm,+

A yɛne nnipadɔm boom kɔɔ Onyankopɔn fie.+

15 Ma wɔn ase nhye!+

Ma wɔnkɔ Adamena* mu anikan,+

Na baabiara a wɔteɛ no, nsɛmmɔne nko ara na ɛte wɔn mu.+

16 Me deɛ, Onyankopɔn na mɛfrɛ no;+

Na Yehowa na ɔbɛgye me nkwa.+

17 Anwummerɛ ne anɔpa ne owigyinaeɛ, medwendwene na mesi apini,+

Na ɔte me nne.+

18 Ɔbɛgye me kra afiri ko a wɔko tia me no mu,+ na wama no anya asomdwoeɛ,

Ɛfiri sɛ nnipadɔm na wɔreko atia me.+

19 Onyankopɔn bɛte na wabua wɔn,+

Deɛ Ɔte ahennwa so firi tete no+—Sela.—

Wɔn deɛ, wɔnsesã,+

Na wɔnsuro Nyankopɔn.+

20 Watene ne nsa aka wɔn a wɔne no te asomdwoeɛ mu;+

Wabu n’apam so.+

21 N’anom nsɛm yɛ fekɔfekɔ sene bɔta,+

Nanso ɛko wɔ n’akomam.+

Ne nsɛm mu dwo bɛtɛɛ sene ngo,+

Nanso ɛyɛ nkrantɛ a wɔatwe.+

22 Dane w’adesoa to Yehowa so,+

Na ɔbɛsɔ wo mu.+

Ɔremma ɔteneneeni nhinhim da.+

23 Na wo, Onyankopɔn, wo na wode wɔn bɛkɔ amena mu tɔnn.+

Mogyapɛfoɔ ne nkontompofoɔ renni wɔn nna mu fã.+

Na me deɛ, mede me ho bɛto wo so.+