Krataa a Ɛdi Kan a Ɔde Kɔmaa Korintofoɔ

8 Afei aduane a wɔde abɔ afɔreɛ ama abosom+ no, deɛ mewɔ ka wɔ ho nie: Yenim sɛ yɛn nyinaa wɔ nimdeɛ.+ Nimdeɛ de ahomasoɔ ba, na ɔdɔ deɛ, ɛma nkɔsoɔ.+ 2 Sɛ obi adwene yɛ no sɛ ɔnim biribi a, ɛnneɛ na ɔnnya nhunuu ade korɔ no yie sɛdeɛ ɛsɛ sɛ ɔhu no no. 3 Na sɛ obi dɔ Onyankopɔn a, ɔno nso nim no.

4 Afei momma menka aduane a wɔde abɔ afɔreɛ ama abosom a obi bɛdi ho asɛm. Yɛnim sɛ bosom nyɛ hwee+ wɔ wiase, na Onyankopɔn baako pɛ na ɔwɔ hɔ; ɔfoforɔ biara nni hɔ ka ne ho.+ 5 Ɛwom, ɔsoro oo, asaase so oo, wɔn a wɔfrɛ wɔn anyame wɔ hɔ,+ sɛdeɛ “anyame” pii ne “awuranom” pii wɔ hɔ no. 6 Nanso yɛn deɛ, Onyankopɔn baako+ na yɛwɔ. Ɔno ne Agya no.+ Ne mu na nneɛma nyinaa fire, na yɛn nso yɛwɔ hɔ ma no.+ Na Awurade baako na ɔwɔ hɔ. Ɔno ne Yesu Kristo. Ɛnam ne so na nneɛma nyinaa wɔ hɔ,+ na ɛnam ne so na yɛn nso yɛwɔ hɔ.

7 Nanso ɛnyɛ obiara na ɔwɔ saa nimdeɛ yi.+ Ebinom wɔ hɔ a, kane no, na wɔsom abosom. Enti sɛ wɔdi aduane bi a, ɛyɛ wɔn sɛ biribi a wɔde abɔ afɔreɛ ama bosom bi,+ na ɛsiane sɛ wɔn ahonim* yɛ mmerɛ nti, wɔn ahonim ho gu fĩ.+ 8 Nanso ɛnyɛ aduane na ɛbɛma yɛabɛn Onyankopɔn;+ sɛ yɛannidi a, yɛntɔ sini, na sɛ yɛdidi nso a, yɛnkyɛn so.+ 9 Enti monhwɛ yie na hokwan a mowɔ sɛ moyi deɛ mopɛ no anto wɔn a wɔyɛ mmerɛ no suntidua wɔ kwan bi so.+ 10 Na wo a wowɔ nimdeɛ no, sɛ obi hu sɛ wote abosom dan mu redidi a, wonnye nni sɛ ɛbɛtumi apiapia ɔno a ɔyɛ mmerɛ no* ama no adi aduane a wɔde abɔ afɔreɛ ama abosom anaa? 11 Ɛno nti, wode wo nimdeɛ ama onipa a ɔyɛ mmerɛ no resɛe, wo nua a ne nti Kristo wuiɛ no.+ 12 Sɛ moyɛ mo nuanom bɔne saa, na mopira wɔn ahonim* a ɛyɛ mmerɛ no+ a, na moreyɛ Kristo bɔne. 13 Enti sɛ aduane to me nua suntidua a, merenwe nam bio da, na manto me nua suntidua.+