Krataa a Ɛdi Kan a Ɔde Kɔmaa Korintofoɔ

6 Sɛ mo mu bi ne ne yɔnko nya asɛm+ a, enti ɔtumi si ne bo de no kɔ asɛnnibea wɔ nnipa a wɔntene anim, a ɔmfa no nkɔ akronkronfoɔ no mmom anim? 2 Anaa monnim sɛ akronkronfoɔ no na wɔbɛbu wiase atɛn?+ Na sɛ mo na mobɛbu wiase atɛn a, nsɛm nketenkete na morentumi mmu ho atɛn anaa? 3 Monnim sɛ yɛbɛbu abɔfoɔ atɛn?+ Sɛ yɛbɛbu abɔfoɔ atɛn a, ɛnneɛ asetena yi mu nsɛm* na yɛrentumi mmu ho atɛn? 4 Na sɛ mowɔ asetena yi mu nsɛm a ɛsɛ sɛ modi+ a, wɔn a asafo no mmu wɔn no na mode wɔn yɛ atemmufoɔ? 5 Mereka wei de ahyɛ mo aniwuo. Enti onyansafoɔ baako koraa nni mo mu a ɔbɛtumi abu ne nuanom ntam atɛn? 6 Ɛnna onua paa tumi de onua kɔ asɛnnibea, wɔn a wɔnnye nnie anim!

7 Nokwasɛm ne sɛ, sɛ obiara de ne yɔnko kɔ asɛnnibea a, ɛnneɛ na moadi nkoguo dada. Adɛn na momma wɔnyɛ mo bɔne mmom?+ Adɛn na momma wɔnsisi mo mmom? 8 Mmom, mo na moyɛ nkurɔfoɔ bɔne na mosisi wɔn; moamfa anyɛ obiara nso sɛ mo nuanom!

9 Anaa monnim sɛ wɔn a wɔntene no rennya Onyankopɔn Ahennie?+ Mommma wɔnnnaadaa mo. Adwamammɔfoɔ,*+ abosonsomfoɔ,+ awaresɛefoɔ,+ mmarima a wɔma mmarima ne wɔn da,+ mmarima a wɔne mmarima da,+ 10 akorɔmfoɔ, adufudepɛfoɔ,+ akɔwensafoɔ,+ wɔn a wɔtwa nkurɔfoɔ adapaa,* ne apoobɔfoɔ rennya Onyankopɔn Ahennie no.+ 11 Saa na na mo mu binom teɛ. Nanso wɔadware mo kama;+ wɔate mo ho;+ wɔabu mo ateneneefoɔ+ yɛn Awurade Yesu Kristo din mu, ne yɛn Nyankopɔn honhom mu.

12 Mewɔ hokwan sɛ meyɛ nneɛma nyinaa, nanso ɛnyɛ nneɛma nyinaa na mfasoɔ wɔ so.+ Mewɔ hokwan sɛ meyɛ nneɛma nyinaa, nanso meremma biribiara mfa me nyɛ akoa.* 13 Aduane wɔ hɔ ma yafunu, ɛnna yafunu nso wɔ hɔ ma aduane, nanso Onyankopɔn bɛsɛe mmienu no nyinaa.+ Nipadua nni hɔ mma adwamammɔ;* ɛwɔ hɔ ma Awurade,+ na Awurade nso wɔ hɔ ma nipadua no. 14 Na Onyankopɔn nyanee Awurade,+ na yɛn nso, ɔnam ne tumi so+ bɛnyane yɛn afiri awufoɔ mu.+

15 Monnim sɛ mo nipadua yɛ Kristo akwaa anaa?+ Memfa Kristo akwaa nkɔ nkɔfam tuutuuni ho anaa? Merenyɛ saa da! 16 Monnim sɛ obiara a ɔde ne ho akɔfam tuutuuni ho no, ɔne no ayɛ nipadua korɔ anaa? Ɛfiri sɛ Onyankopɔn aka sɛ: “Wɔn mmienu no bɛyɛ honam korɔ.”+ 17 Na obiara a ɔde ne ho afam Awurade ho no, ɔne no ayɛ baako wɔ honhom mu.+ 18 Monnwane mfiri adwamammɔ* ho!+ Bɔne biara a onipa yɛ no nni ne nipadua mu, na deɛ ɔbɔ adwaman* deɛ, ɔyɛ ɔno ara ne nipadua bɔne.+ 19 Monnim sɛ mo nipadua yɛ honhom kronkron a ɛwɔ mo mu a monya firii Onyankopɔn hɔ+ no asɔrefie?+ Bio nso, monyɛ mo ara mo dea, na mmom moyɛ Onyankopɔn dea,+ 20 ɛfiri sɛ wɔtɔɔ mo aboɔden.+ Sɛdeɛ ɛteɛ biara, momfa mo nipadua+ nhyɛ Onyankopɔn animuonyam.+