Asomafoɔ Nnwuma

7 Na ɔsɔfo panin no bisaa no sɛ: “Nsɛm yi te saa anaa?” 2 Ɛnna Stefano buaa sɛ: “Mmarima, anuanom ne agyanom, montie. Animuonyam Nyankopɔn no yii ne ho adi kyerɛɛ yɛn nana Abraham, berɛ a na ɔwɔ Mesopotamia, ansa na ɔrekɔtena Haran,+ 3 na ɔka kyerɛɛ no sɛ: ‘Firi w’asaase so ne w’abusuafoɔ mu na kɔ asaase a mɛkyerɛ wo no so.’+ 4 Enti ɔfirii Kaldeafoɔ asaase so kɔtenaa Haran. Berɛ a ne papa wuiɛ no,+ Onyankopɔn maa no tu firii hɔ, na ɔbɛtenaa asaase a mote so seesei yi so.+ 5 Nanso wamma no bi sɛ agyapadeɛ. Daabi, wamma no baabi a ɔde ne nan bɛsi mpo. Mmom ɔhyɛɛ bɔ sɛ ɔde bɛma no sɛ agyapadeɛ, na n’akyi no, ɔde bɛma n’asefoɔ.*+ Nanso saa berɛ no, na ɔnni ba. 6 Bio nso, Onyankopɔn ka kyerɛɛ no sɛ n’asefoɔ* bɛkɔ akɔyɛ ahɔhoɔ wɔ obi man so, na ɛhɔfoɔ de wɔn bɛyɛ nkoa na wɔateetee wɔn* mfeɛ 400.+ 7 Onyankopɔn kaa sɛ, ‘Mɛbu ɔman a ɛde wɔn bɛyɛ nkoa no atɛn,+ na weinom akyi no, wɔbɛfiri hɔ na wɔabɛsom me wɔ ha.’+

8 “Ɔsan ne Abraham yɛɛ twetiatwa* apam.+ Enti berɛ a ɔwoo Isak+ no, da a ɛtɔ so nwɔtwe no, ɔtwaa no twetia.+ Na Isak woo Yakob,* na Yakob woo mmusua ti* 12 no. 9 Na mmusua ti no ani beree Yosef,+ na wɔtɔn no kɔɔ Egypt.+ Nanso na Onyankopɔn ka ne ho,+ 10 na ɔgyee no firii ne haw nyinaa mu, na ɔmaa no nyaa adom ne nyansa wɔ Egypt hene Farao anim. Na Farao de Egypt ne ne fie nyinaa hyɛɛ ne nsa sɛ ɔnhwɛ so.+ 11 Na ɛkɔm baa Egypt ne Kaanan nyinaa, aane, ahokyerɛ kɛse paa, na na yɛn agyanom nnya biribiara nni.+ 12 Ɛnna Yakob tee sɛ aduane wɔ Egypt, enti ɔsomaa yɛn agyanom kɔɔ hɔ deɛ ɛdi kan.+ 13 Berɛ a wɔkɔɔ ne mprenu so no, Yosef yii ne ho adi kyerɛɛ ne nuanom, na Farao huu Yosef abusuafoɔ.+ 14 Enti Yosef de nkra kɔmaa ne papa Yakob ne n’abusuafoɔ nyinaa sɛ wɔmfiri hɔ mmra.+ Ná wɔn nyinaa dodoɔ si nnipa* 75.+ 15 Enti Yakob kɔɔ Egypt,+ na ɔwuu wɔ hɔ.+ Na yɛn agyanom nso wuwuu saa ara.+ 16 Na wɔde wɔn kɔɔ Sekem kɔsiee wɔn. Wɔsiee wɔn wɔ ɛda a Abraham de dwetɛ sika tɔ firii Hamor mma nkyɛn wɔ Sekem no mu.+

17 “Berɛ a aka kakra ama ɛbɔ a Onyankopɔn hyɛɛ Abraham no aba mu no, nnipa no yɛɛ bebree, na wɔdɔɔso wɔ Egypt, 18 kɔsii sɛ ɔhene foforɔ bɛdii adeɛ wɔ Egypt. Ɔno deɛ, na ɔnnim Yosef.+ 19 Saa ɔhene no nam nyansakwan so dii yɛn abusua no so, na ɔde atirimuɔden hyɛɛ agyanom no sɛ wɔnnya wɔn mma nketewa hɔ sɛdeɛ ɛbɛyɛ a wɔbɛwuwuo.+ 20 Saa berɛ no na wɔwoo Mose, na na ne ho yɛ fɛ yie.* Na wɔhwɛɛ no* wɔ ne papa fie abosome mmiɛnsa.+ 21 Na berɛ a wɔgyaa no too baabi no,+ Farao babaa faa no, na ɔtetee no sɛ ɔno ara ne ba.+ 22 Enti wɔkyerɛɛ Mose Egyptfoɔ nyansa nyinaa. Nokwasɛm ne sɛ, na ɔde tumi kasa, na ɔyɛɛ nneɛma akɛseɛ.+

23 “Berɛ a ɔdii mfeɛ 40 no, ɛbaa n’akomam* sɛ ɔbɛkɔ akɔsra* ne nuanom, Israel mma no.+ 24 Berɛ a ɔhuu sɛ wɔreyɛ wɔn mu baako bɔne no, ɔkɔboaa no, na ɔkum Egyptni no tuaa ka. 25 N’adwene yɛɛ no sɛ ne nuanom no bɛhu sɛ Onyankopɔn nam ne so* regye wɔn, nanso wɔanhu no saa. 26 Berɛ a adeɛ kyeeɛ no, ɔkɔtoo wɔn sɛ wɔreko, na ɔyɛɛ sɛ ɔbɛka wɔn abom ama asomdwoeɛ aba wɔn ntam. Enti ɔkaa sɛ: ‘Mmarima, moyɛ anuanom. Adɛn nti na moatwa mo ho reko?’ 27 Ɛnna deɛ ɔreyɛ ne yɔnko bɔne no piaa Mose, na ɔkaa sɛ: ‘Hwan na ɔde wo sii yɛn so sɛ sodifoɔ ne ɔtemmufoɔ? 28 Wopɛ sɛ woku me sɛdeɛ nnora wokum Egyptni no anaa?’ 29 Berɛ a Mose tee saa no, ɔdwanee, na ɔkɔyɛɛ ɔhɔhoɔ wɔ Midian asaase so. Ɛhɔ na ɔwoo mma mmarima mmienu.+

30 “Mfeɛ 40 akyi no, ɔbɔfoɔ bi yii ne ho adi kyerɛɛ no wɔ Sinai Bepɔ serɛ so wɔ nwura* bi a ɛredɛre mu.+ 31 Berɛ a Mose hunuiɛ no, ɛyɛɛ no nwanwa. Na ɔrebɛn ho akɔhwɛ no, ɔtee Yehowa* nne sɛ: 32 ‘Mene w’agyanom Nyankopɔn, Abraham ne Isak ne Yakob Nyankopɔn.’+ Na ehu kaa Mose, enti wannya akokoɔduro bio sɛ ɔbɛkɔ akɔhwɛ dekodeɛ. 33 Yehowa* ka kyerɛɛ no sɛ: ‘Yi wo nan ase mpaboa, na baabi a wogyina no yɛ asaase kronkron. 34 Sɛdeɛ wɔreteetee me nkurɔfoɔ a wɔwɔ Egypt no m’ani tua, na mate wɔn sufrɛ,+ na masiane aba sɛ merebɛgye wɔn. Enti bra ma mensoma wo nkɔ Egypt.’ 35 Mose yi a wɔkaa sɛ wɔnnim no, a wɔbisaa no sɛ: ‘Hwan na ɔde wo sii yɛn so sɛ sodifoɔ ne ɔtemmufoɔ?’+ no, ɔno ara na Onyankopɔn nam ɔbɔfoɔ a ɔyii ne ho adi kyerɛɛ no wɔ nwura* mu no so somaa no+ sɛ sodifoɔ ne ɔgyefoɔ. 36 Ɔbarima yi na ɔyii wɔn firii Egypt,+ na ɔyɛɛ anwanwadeɛ ne nsɛnkyerɛnne wɔ Egypt+ ne Ɛpo Kɔkɔɔ no+ mu ne serɛ no so mfeɛ 40.+

37 “Mose yi na ɔka kyerɛɛ Israel mma sɛ: ‘Onyankopɔn bɛyi odiyifoɔ bi a ɔte sɛ me afiri mo nuanom mu ama mo.’+ 38 Mose yi na na ɔne asafo no wɔ serɛ so no. Ná ɔbɔfoɔ+ a ɔkasa kyerɛɛ+ Mose wɔ Sinai Bepɔ so, a ɔsan kasa kyerɛɛ yɛn agyanom no ne Mose na ɛwɔ hɔ. Na Mose nsa kaa nkwa nsɛm kronkron sɛ ɔmfa mmrɛ yɛn.+ 39 Yɛn agyanom antie no.+ Mmom wɔpiaa no too baabi, na wɔn akoma san kɔɔ Egypt,+ 40 na wɔka kyerɛɛ Aaron sɛ: ‘Yɛ anyame ma yɛn ma wɔnni yɛn anim. Ɛfiri sɛ Mose yi a ɔdii yɛn anim firii Egypt asaase so no deɛ, yɛnnim deɛ ato no.’+ 41 Enti wɔyɛɛ nantwie ba bi wɔ saa nna no mu, na wɔbɔɔ afɔreɛ maa ohoni no, na wɔfirii aseɛ gyee wɔn ani wɔ wɔn nsa ano adwuma no ho.+ 42 Enti Onyankopɔn twee ne ho firii wɔn ho, na ɔgyaa wɔn maa wɔsom ɔsoro asafo,+ sɛdeɛ wɔatwerɛ no Adiyifoɔ no nwoma mu no. Wɔatwerɛ wɔ mu sɛ: ‘O Israel fie, ɛnyɛ me na mode akyɛdeɛ brɛɛ me na mobɔɔ afɔreɛ maa me wɔ serɛ so mfeɛ 40 no. 43 Mmom, mofaa Molok+ ntomadan ne mo nyame Refan nsoromma no, ahoni a moyɛɛ wɔn sɛ mobɛsom wɔn no. Ɛno nti, mɛtwa mo asu akɔ Babilon akyi nohoa.’+

44 “Berɛ a yɛn agyanom nam serɛ so no, wɔnyaa adanseɛ ntomadan no. Sɛdeɛ Onyankopɔn de akwankyerɛ maa Mose berɛ a ɔrekasa akyerɛ no no, ɔyɛɛ no pɛpɛɛpɛ te sɛ ɛho nhwɛsoɔ a Nyankopɔn de kyerɛɛ no no.+ 45 Yɛn agyanom nsa kaa ntomadan no, na wɔne Yosua de baa amanaman no asaase so,+ aman a Onyankopɔn pamoo wɔn firii yɛn agyanom anim no.+ Na ɛtenaa ha ara kɔsii Dawid berɛ so. 46 Onyankopɔn hyiraa Dawid, na Dawid srɛɛ sɛ wɔmma no nsi tenabea mma Yakob Nyankopɔn no.+ 47 Nanso, Solomon na ɔsii fie maa no.+ 48 Nso deɛ ɛwom ne sɛ, Ɔsorosoroni no nte afie a nnipa de wɔn nsa asi mu,+ sɛdeɛ odiyifoɔ no kaeɛ no. Ɔkaa sɛ: 49 ‘Ɔsoro yɛ m’ahennwa,+ na asaase yɛ me nan ntiasoɔ.+ Efie bɛn na mobɛsi ama me? Yehowa* na ɔseɛ. Anaa homebea bɛn na mode bɛma me? 50 Ɛnyɛ me ara me nsa na ayɛ nneɛma yi nyinaa?’+

51 “Nnipa a moasene mo kɔn* a mo akoma ne mo aso awuo,* daa moko tia honhom kronkron no. Sɛdeɛ mo agyanom yɛeɛ no, saa ara na moyɛ.+ 52 Adiyifoɔ no mu hwan na mo agyanom antan n’ani?+ Aane, wɔn a wɔkaa ɔteneneeni a ɔreba no ho asɛm too hɔ no, mo agyanom kunkum wɔn.+ Saa ɔteneneeni no na nnansa yi ara mo nso moyii no maeɛ, na mokum no no,+ 53 mo a monyaa Mmara no sɛdeɛ abɔfoɔ de maeɛ+ nanso moanni so no.”

54 Berɛ a wɔtee saa nsɛm no, ɛwowɔɔ wɔn akomam, na wɔn bo fuu no dendeenden.* 55 Nanso ɔno deɛ, na honhom kronkron ayɛ no ma. Enti ɔhwɛɛ soro dinn, na ɔhuu Onyankopɔn animuonyam, na ɔhuu Yesu nso sɛ ɔgyina Onyankopɔn nsa nifa.+ 56 Ɛnna ɔkaa sɛ: “Hwɛ! Mehu sɛ ɔsoro abue, na onipa Ba no+ gyina Onyankopɔn nsa nifa.”+ 57 Berɛ a ɔkaa saa no, wɔde nne kɛseɛ teateaam, na wɔde wɔn nsa sisii wɔn aso, na wɔn nyinaa gyee bum kɔɔ ne so. 58 Ɛnna wɔde no firii kuro no mu kɔɔ kuro no akyi, na wɔfirii aseɛ sii no aboɔ.+ Na adansefoɔ no+ de wɔn ntaadeɛ ngugusoɔ guu aberanteɛ bi a wɔfrɛ no Saul+ nan ase. 59 Berɛ a wɔgu so resi Stefano aboɔ no, ɔsrɛɛ sɛ: “Awurade Yesu, mede me nkwa* hyɛ wo nsa.” 60 Afei ɔbuu nkotodwe, na ɔde nne kɛseɛ teaam sɛ: “Yehowa,* ntwe wɔn aso wɔ bɔne yi ho.”+ Berɛ a ɔkaa saa no, ɔwuiɛ.*