Krataa a Ɛdi Kan a Ɔde Kɔmaa Tesalonikafoɔ

4 Ne korakora no, anuanom, yɛmaa mo akwankyerɛ maa mohunuu sɛdeɛ ɛsɛ sɛ monante na moasɔ Onyankopɔn ani,+ na saa pɛpɛɛpɛ na moreyɛ. Afei yɛsrɛ mo, na yɛde Awurade Yesu pa mo kyɛw sɛ deɛ moreyɛ no, monkɔ so nyɛ no kɛse. 2 Na monim akwankyerɛ* a yɛnam Awurade Yesu so de maa mo no.

3 Na wei ne deɛ Onyankopɔn pɛ: Ɛne sɛ mo ho bɛte,+ na moatwe mo ho afiri adwamammɔ* ho.+ 4 Ɛsɛ sɛ mo mu biara hunu sɛdeɛ ɔbɛhyɛ ɔno ankasa ne nipadua* so+ wɔ ahoteɛ+ ne anidie mu, 5 na ɛnsɛ sɛ ɔyɛ adufudepɛ na ɔgyaa ne ho ma nna ho akɔnnɔ bɔne+ sɛdeɛ aman a wɔnnim Onyankopɔn+ yɛ no. 6 Obiara nnyɛ adeɛ nntra deɛ ɛfata, na ɔnnni ne nua aborɔ wɔ asɛm yi mu, ɛfiri sɛ sɛdeɛ yɛdii kan kaa ho asɛm kyerɛɛ mo na yɛbɔɔ mo kɔkɔ dendeenden no, Yehowa* bɛtwe obiara a ɔyɛ saa nneɛma yi aso. 7 Ɛfiri sɛ ɛnyɛ ɔbra fĩ* nti na Onyankopɔn frɛɛ yɛn, na mmom ahoteɛ+ ntira. 8 Enti deɛ ɔbu nkyerɛkyerɛ yi animtia no, ɛnyɛ onipa na ɔbu no animtia, na mmom Onyankopɔn+ a ɔde ne honhom kronkron ma mo no+ na ɔbu no animtia.

9 Na onuadɔ+ deɛ, ɛnhia sɛ yɛtwerɛ ho asɛm brɛ mo, ɛfiri sɛ Onyankopɔn akyerɛkyerɛ mo sɛ monnodɔ mo ho.+ 10 Deɛ ɛwom ne sɛ, modɔ anuanom nyinaa wɔ Makedonia baabiara. Nanso anuanom, yɛtu mo fo sɛ, monkɔ so nyɛ no kɛse. 11 Momfa nsi mo ani so sɛ mobɛtena hɔ komm+ na moadi mo fie asɛm,+ na mode mo nsa ayɛ adwuma,+ sɛdeɛ yɛkyerɛɛ mo no, 12 na moabɔ ɔbra pa ama wɔn a wɔnni asafo no mu no ahunu,*+ na biribiara anhia mo.

13 Afei nso anuanom, yɛmpɛ sɛ wɔn a wɔadeda wɔ owuo mu+ no ho asɛm bɛhinta* mo, na moanni awerɛhoɔ sɛdeɛ wɔn a aka a wɔnni anidasoɔ no yɛ no.+ 14 Na sɛ yɛgye di sɛ Yesu wui na wasɔre bio+ a, ɛnneɛ saa ara nso na Onyankopɔn nam Yesu so de wɔn a wɔawuwuo* no bɛka ne* ho aba.+ 15 Na deɛ yɛnam Yehowa* asɛm so ka kyerɛ mo ne sɛ, yɛn a yɛte ase a yɛbɛtena ase akɔsi Awurade mmaeɛ mu no, yɛrenni wɔn a wɔawuwuo* no anim da; 16 ɛfiri sɛ Awurade ankasa de nteamu a emu yɛ den, ne ɔbɔfo panin+ nne, ne Onyankopɔn totorobɛnto bɛsiane afiri soro, na wɔn a wɔawuwu wɔ Kristo mu no bɛdi kan asɔre.+ 17 Ɛno akyi no, wɔbɛfa yɛn a yɛaka a yɛte ase no, ne wɔn nyinaa, wɔ mununkum mu+ akɔhyia Awurade+ wɔ wiem; na ɛno bɛma yɛne Awurade atena daa.+ 18 Ne saa nti, monkɔ so ara mfa nsɛm yi nkyekye mo werɛ.