PETRO NWOMA A ƐTƆ SO MMIENU

1 Me, Simon Petro a meyɛ Yesu Kristo akoa ne ɔsomafoɔ, meretwerɛ krataa yi akɔma wɔn a wɔnam Onyankopɔn ne yɛn Agyenkwa Yesu Kristo tenenee so anya gyidie a ɛsom bo te sɛ yɛn deɛ no ara:

2 Adom ne asomdwoeɛ mfa Onyankopɔn ne yɛn Awurade Yesu ho nokorɛ nimdeɛ+ so nnɔɔso mma mo, 3 ɛfiri sɛ Onyankopɔn tumi nti yɛanya biribiara a ɛfa nkwa ne onyamesom pa ho,* na ɛnam Onyankopɔn ho nokorɛ nimdeɛ so;+ ɔno na ɔde n’animuonyam ne ne papayɛ frɛɛ yɛn. 4 Ɔnam weinom so ama yɛn bɔhyɛ akɛseɛakɛseɛ a ɛsom bo,+ na berɛ a moatumi adwane afiri wiase a akɔnnɔ bɔne ama no aporɔ mu no, moafa weinom so anya Onyankopɔn su no bi.+

5 Ɛsiane wei nti, mo nso monyɛ deɛ mobɛtumi biara+ mfa ɔbra pa+ nka mo gyidie ho, na momfa nimdeɛ+ nka mo bra pa ho; 6 momfa ahohyɛsoɔ*+ nka mo nimdeɛ ho, momfa animia nka mo ahohyɛsoɔ ho, na momfa onyamesom pa+ nka animia ho; 7 momfa onuadɔ nka mo nyamesom pa ho; onuadɔ no akyi no, monnya ɔdɔ+ mma obiara. 8 Na sɛ weinom nyinaa wɔ mo mu na ɛbu so a, mode Awurade Yesu Kristo ho nokorɛ nimdeɛ bɛyɛ adwuma. Ɛba saa a, morenyɛ mmerɛ anaa morenyɛ nnipa a wɔnso aba.+

9 Na obiara a weinom nni ne mu no, na n’ani afira, ɔmpɛ sɛ ɔhu hann no,*+ na ne werɛ afi sɛ wɔahohoro ne bɔne+ a wayɛ atwam no. 10 Enti anuanom, monyɛ deɛ mobɛtumi biara mma hokwan a moanya sɛ wɔafrɛ mo+ na wɔayi mo no nni mu; na sɛ mokɔ so yɛ saa a, morenhwe ase da.+ 11 Nokwasɛm nie, ɛbɛma moanya hokwan kɛseɛ akɔ yɛn Awurade ne yɛn Agyenkwa Yesu Kristo+ daa Ahennie+ no mu.

12 Wei nti mepɛ sɛ daa mekae mo weinom, ɛwom, monim, na mo ase nso atim wɔ nokorɛ a ɛwɔ mo mu no mu. 13 Nanso mprɛ dodoɔ a mewɔ ntomadan*+ yi mu deɛ, mehu sɛ ɛfata sɛ mekaakae mo de kanyan mo,+ 14 na menim sɛ ɛrenkyɛ koraa na wɔayi me ntomadan yi agu hɔ sɛdeɛ yɛn Awurade Yesu Kristo nso daa no adi kyerɛɛ me no.+ 15 Mɛkɔ so ayɛ deɛ mɛtumi biara na sɛ mekɔ a, mo ara moakae weinom.

16 Ɛnyɛ atosɛm bi a wɔanwene no aniferɛ kwan so na yɛnam so kyerɛɛ mo yɛn Awurade Yesu Kristo tumi ne ne mmaeɛ no, na mmom yɛn ani kann na yɛde huu n’animuonyam.+ 17 Na ɔnyaa anidie ne animuonyam firii Agya Onyankopɔn hɔ, berɛ a Onimuonyamfoɔ kɛseɛ no kaa nsɛm te sɛ wei* kyerɛɛ no no: “Wei ne me Ba, deɛ medɔ no a magye no atom.”+ 18 Berɛ a yɛne no wɔ bepɔ kronkron no so no, wei ne nsɛm a yɛte firii soro.

19 Enti nkɔmhyɛsɛm no, wɔama yɛahu sɛ ɛdi mu paa; na ɛyɛ sɛ moama mo ani aku ho sɛ kanea+ a ɛhyerɛn sum mu, kyerɛ sɛ, mo akomam (kɔsi sɛ adeɛ bɛkye ama adekyeeɛ nsoromma+ apue). 20 Deɛ ɛdi kan koraa no, monim sɛ Twerɛnsɛm mu nkɔmhyɛ biara nni hɔ a ɛnam nnipa nteaseɛ so ba. 21 Na ɛnyɛ nnipa hɔ na nkɔmhyɛ firi ba,+ na mmom Onyankopɔn honhom kronkron+ na ɛmaa nnipa kasaeɛ.

2 Ne nyinaa mu no, atorɔ adiyifoɔ nso sɔree wɔn mu, na saa ara na akyerɛkyerɛfoɔ atorofoɔ bɛsɔre mo mu.+ Wɔbɛwiawia wɔn ho abɛtete akuo a ɛdi awuo, na wɔbɛka sɛ wɔnnim wɔn wura a ɔtɔɔ wɔn+ no mpo, na wɔn ankasa de ɔsɛeɛ bɛba wɔn ho so ntɛm. 2 Bio nso, nnipa pii bɛbɔ ahohwibra,*+ na wɔn nti nkurɔfoɔ bɛka nokorɛ kwan no ho nsɛmmɔne.+ 3 Afei aniberɛ nti, wɔnam adɛfɛdɛfɛsɛm so bɛdidi mo ho. Nanso wɔn atemmuo a ɛda hɔ retwɛn wɔn firi tete+ no, ɛrenka akyi, na wɔn sɛeɛ bɛba ɛkwan biara so.*+

4 Nokorɛm, Onyankopɔn amma abɔfoɔ a wɔyɛɛ bɔne+ no amfa wɔn ho anni; mmom ɔtoo wɔn guu Tartarus,*+ na ɔde nkɔnsɔnkɔnsɔn kyekyeree wɔn guu sum kabii mu* de wɔn sie maa atemmuo.+ 5 Na wamma tete wiase no amfa wɔn ho anni;+ mmom berɛ a ɔde nsuyire bɛsɛee amumuyɛfoɔ wiase no,+ ɔkoraa Noa a ɔkaa tenenee ho asɛm kyerɛɛ nkurɔfoɔ+ no ne nnipa nson+ so. 6 Ɔmaa Sodom ne Gomora nkuro no danee nsõ de buu wɔn fɔ,+ na ɛbɛyɛɛ deɛ ɛbɛba daakye ho sɛnnahɔ maa amumuyɛfoɔ.+ 7 Na ɔgyee ɔteneneeni Lot+ a mmaratofoɔ no ahohwibra* maa ne ho hiahiaa no no, 8 ɛfiri sɛ da biara da, nneɛma bɔne a ɔteneneeni yi hunuiɛ na ɔtee berɛ a ɔte wɔn mu no maa ne kra* a ɛtene no ho yeraa no. 9 Weinom nyinaa kyerɛ sɛ Yehowa* nim sɛdeɛ ɔbɛgye wɔn a wɔde onyamesom pa tena ase no afiri sɔhwɛ mu+ na wakora abɔnefoɔ so ama atemmuo da na wasɛe wɔn,*+ 10 ne titire no, wɔn a wɔde ayɛ wɔn adwuma sɛ wɔbɛgu nkurɔfoɔ ho fĩ+ na wɔbu tumidie animtia*+ no.

Wɔyɛ aniɛdenfoɔ, na wɔdi wɔn koko so asɛm; wɔnsuro animuonyamfoɔ, na mmom wɔka wɔn ho nsɛmmɔne, 11 nanso abɔfoɔ a wɔwɔ ahoɔden ne tumi sene wɔn mpo mfa kasatia mmu wɔn atɛn, ɛfiri sɛ wɔwɔ obuo ma Yehowa.*+ 12 Saa mmarima yi deɛ, wɔte sɛ mmoa a wɔnni adwene a atenka na wɔde yɛ adeɛ; wɔn deɛ ara ne sɛ wɔbɛwo wɔn ama wɔakye wɔn aku wɔn. Mmarima yi kasa tia nneɛma a wɔnnim.+ Ɔsɛeɛ kwan a wɔn ankasa nam so no, ɛno ara na ɛde ɔsɛeɛ bɛbrɛ wɔn, 13 na wɔbɛnya wɔn kwammɔne so akatua.

Afɛfɛdeɛ a wɔde bɛgyegye wɔn ani awia ketee na wɔn ani gye ho.+ Wɔyɛ nkekaeɛ ne dɛm wɔ mo mu, na deɛ ɛyɛ wɔn dɛ* ara ne sɛ berɛ a wɔne mo bom didi no, wɔde atorɔ nkyerɛkyerɛ bɛdaadaa mo.+ 14 Wɔwɔ ani a awaresɛeɛ ahyɛ no ma,+ na wɔntumi nkwati bɔne, na wɔto wɔn* a wɔn ase ntimiiɛ no bradɛ. Aniberɛ ahyɛ wɔn akoma ma. Wɔyɛ mma a wɔadome wɔn. 15 Wɔafiri ɛkwan a ɛyɛ tẽẽ no so; wɔadaadaa wɔn. Wɔafa Beor ba Baalam+ kwan so; ɔno na na ɔreyɛ bɔne de apɛ akatua,+ 16 nanso wɔdaa ne mmarato adi kyerɛɛ no.+ Aboa a ɔntumi nkasa de onipa nne kasaeɛ, na ɔsii odiyifoɔ no nkwaseasɛm no kwan.+

17 Weinom yɛ asubura a nsuo nnim ne suwisie a ahum kɛseɛ bɔ no; wɔakora esum kabii so ama wɔn.+ 18 Wɔkeka nsɛm akɛseɛ a mfasoɔ biara nni so, na wɔde ɔhonam akɔnnɔ+ to nkurɔfoɔ bradɛ, na wɔbɔ ahohwibra* de twetwe wɔn a afei na wɔatete wɔn ho afiri nnebɔneyɛfoɔ ho no.+ 19 Wɔhyɛ wɔn bɔ sɛ wɔbɛma wɔade wɔn ho, nanso wɔn ankasa yɛ ɔporɔ nkoa;+ ɛfiri sɛ sɛ obi di ɔfoforo so a, onii no bɛyɛ n’akoa.*+ 20 Asɛm no ne sɛ, berɛ a wɔnam Awurade ne Agyenkwa Yesu Kristo ho nokorɛ nimdeɛ so atete wɔn ho afiri wiase no fĩ ho+ no, sɛ wɔsan de wɔn ho kɔhyɛ nneɛma korɔ no ara mu ma no de wɔn yɛ nkoa a, ɛma wɔn tebea no sɛe koraa sene kane deɛ no.+ 21 Sɛ wɔnnim tenenee kwan no a, anka ɛyɛ mmom sene sɛ wɔabɛhunu na afei wɔatwe wɔn ho afiri ahyɛdeɛ kronkron a wɔn nsa aka no ho.+ 22 Wɔma bɛ yi yɛ nokorɛ sɛ: “Kraman asan kɔ ne feɛ ho, na prako a wɔadware no asan akɔyantam atɛkyɛ mu.”+

3 Adɔfo, wei ne krataa a ɛtɔ so mmienu a meretwerɛ mo, na merekaakae mo de akanyan mo adwene+ sɛdeɛ meyɛɛ no krataa a ɛdi kan no mu no, 2 na moakae nsɛm a adiyifoɔ kronkron no aka ato hɔ* no ne ahyɛdeɛ a Awurade ne Agyenkwa no nam asomafoɔ* no so de too dwa no. 3 Deɛ ɛdi kan koraa, monhu sɛ awieeɛ mmerɛ no mu no, fɛdifoɔ bɛdi wɔn ankasa akɔnnɔ akyi abɛdi fɛ,+ 4 na wɔbɛka sɛ: “Ne mmaeɛ a wɔahyɛ ho bɔ no wɔ he?+ Hwɛ, ɛfiri da a yɛn agyanom wuwuiɛ* no, biribiara te sɛ deɛ ɛteɛ firi berɛ a Onyankopɔn bɔɔ nnipa.”+

5 Na wɔboapa bu wɔn ani gu nokwasɛm yi so sɛ ɛfiri tete no, na ɔsoro wɔ hɔ, na Onyankopɔn asɛm nti, asaase firi nsuo mu bɛtim hɔ maa nsuo twaa ho hyiaeɛ;+ 6 na ɛnam so na nsuo yiri sɛee wiase a na ɛwɔ hɔ saa berɛ no.+ 7 Na ɛnam asɛm korɔ no ara so na wɔakora ɔsoro ne asaase a ɛwɔ hɔ seesei yi so ama egya de retwɛn atemmuo ne da a wɔbɛsɛe amumuyɛfoɔ.+

8 Nanso, adɔfo, mommma mo ani mmpa nokwasɛm yi so sɛ Yehowa* ani so no, da koro yɛ mfeɛ apem, na mfeɛ apem nso yɛ da koro.+ 9 Yehowa* nkyɛ ne bɔhyɛ ho+ sɛdeɛ ebinom bu biribi sɛ ɛkyɛ no, na mmom ɔwɔ mo ho aboterɛ ɛfiri sɛ ɔmpɛ sɛ obiara bɛsɛe; deɛ ɔpɛ ne sɛ obiara bɛsakra n’adwene.+ 10 Nanso Yehowa* da+ no bɛba sɛ korɔmfoɔ,+ na emu na ɔsoro bɛbobom kurududu atwam,+ na nneɛma a adɔ ayɛ kɔɔ no bɛnane, na asaase ne emu nnwuma bɛda adi.+

11 Ɛsiane sɛ weinom nyinaa bɛnane saa nti, monhu nnipa ko a ɛsɛ sɛ moyɛ; momma mo abrabɔ ho nte na momfa onyamesom pa ntena ase, 12 berɛ a motwɛn na moma Yehowa* da a ɛreba no+ yɛ ntɛm wɔ mo adwenem* no; saa da no egya bɛhye ɔsoro asɛe no,+ na egya a ano yɛ den bɛnane emu nneɛma! 13 Nanso sɛdeɛ wahyɛ bɔ no, yɛretwɛn ɔsoro foforɔ ne asaase foforɔ,+ na emu na tenenee bɛtena.+

14 Enti adɔfo, ɛsiane sɛ moretwɛn weinom nti, monyɛ deɛ mobɛtumi biara mma no mmɛhu mo sɛ nnipa a nkekaeɛ ne dɛm biara nni wɔn ho na wɔwɔ asomdwoeɛ.+ 15 Bio nso, mommu aboterɛ a yɛn Awurade anya no sɛ nkwagyeɛ sɛdeɛ yɛn nua ne yɛn dɔfo Paul de nyansa a wɔde ama no no twerɛɛ mo no;+ 16 ɔkaa weinom ho asɛm sɛdeɛ ɔtaa yɛ wɔ ne nkrataa nyinaa mu no. Nanso emu nsɛm bi aseteɛ yɛ den, na wɔn a wɔnni nimdeɛ* na wɔn ase ntimiiɛ no kyinkyim no sɛdeɛ wɔkyinkyim Twerɛnsɛm a aka no, na ɛde wɔn bɛkɔ ɔsɛeɛ mu.

17 Enti adɔfo, ɛsiane sɛ monim wei dada nti, monhwɛ mo ho yie na mmaratofoɔ amfa wɔn nnaadaa no antwe mo ankɔ, na berɛ a mo ase atim* yi, moanhwe ase.+ 18 Daabida, na mmom monkɔ so nnyini wɔ yɛn Awurade ne yɛn Agyenkwa Yesu Kristo adom ne nimdeɛ mu. Ɔno na animuonyam nka no nnɛ ne daa. Amen.