Deuteronomium
9 “Israel tie, ɛnnɛ woretwa Yordan+ akɔpam aman akɛse a ɛyɛ den sen wo+ akɔfa nkurow akɛse a wɔatow ho abantenten akodu soro.+ 2 Wɔyɛ nnipa a wɔsoso woware. Eyinom ne Anakim+ mma no, na wunim wɔn na woate sɛ wɔka wɔn ho asɛm sɛ, ‘Hena na obetumi agyina Anak mma anim?’ 3 Ɛnnɛ wunim yiye sɛ Yehowa wo Nyankopɔn di w’anim retwa akɔ hɔ.+ Ɔte sɛ ogya a ɛhyew ade.+ Ɔno ankasa bɛsɛe+ wɔn na wabrɛ wɔn ase wɔ w’anim. Enti tu wɔn na sɛe wɔn ntɛm, sɛnea Yehowa aka akyerɛ wo no.+
4 “Sɛ Yehowa wo Nyankopɔn pam wɔn fi w’anim a, nka wo komam sɛ, ‘Me trenee nti na Yehowa de me aba sɛ memmɛfa asase yi.’+ Kae sɛ aman yi amumɔyɛ nti na Yehowa repam wɔn afi w’anim.+ 5 Ɛnyɛ wo trenee+ anaa wo komam a ɛteɛ+ nti na worekɔfa wɔn asase no, mmom aman no amumɔyɛ nti na Yehowa wo Nyankopɔn repam wɔn afi w’anim yi,+ na ama ntam a Yehowa kaa w’agyanom Abraham+ ne Isak+ ne Yakob+ no aba mu. 6 Enti hu sɛ ɛnyɛ wo trenee nti na Yehowa wo Nyankopɔn de asase pa yi rema wo ma woafa, efisɛ woyɛ ɔman a wo kɔn asen.+
7 “Kae: Mma wo werɛ mmfi sɛnea wohyɛɛ Yehowa wo Nyankopɔn abufuw wɔ sare no so no.+ Efi da a mufii Egypt besi nnɛ a mowɔ ha yi, daa motew atua tia Yehowa.+ 8 Horeb mpo mugyigyee Yehowa ma n’ani beree, na Yehowa bo fuwii ma anka ɔretɔre mo ase.+ 9 Bere a mekɔɔ bepɔw no so sɛ merekogye abopon+ a mo ne Yehowa ntam apam+ wɔ so no, midii adaduanan awia ne anadwo wɔ bepɔw no so+ (manni hwee na mannom nsu nso). 10 Ɛnna Yehowa maa me abopon abien a Onyankopɔn de ne nsateaa akyerɛw nsɛm wɔ so,+ nsɛm a Yehowa fi ogya mu ka kyerɛɛ mo wɔ bepɔw no so nyinaa, da a asafo no bɔɔ gua no.+ 11 Bere a adaduanan, awia ne anadwo, no soe no, Yehowa de abopon abien a apam no ho mmara wɔ so no maa me.+ 12 Yehowa ka kyerɛɛ me sɛ, ‘Sɔre fi ha kɔ ntɛm, efisɛ wo nkurɔfo a wukoyii wɔn fii Egypt no reyɛ abusude.+ Wɔaman ntɛm afi ahyɛde a mede ama wɔn no ho. Hwɛ, wɔayɛ dade honi afa.’+ 13 Yehowa toaa so ka kyerɛɛ me sɛ, ‘Hwɛ, mahu sɛ ɔman yi yɛ ɔman a wɔn kɔn asen.+ 14 Ma mensɛe+ wɔn mpopa wɔn din mfi ɔsoro ase+ na menyɛ wo ɔman kɛse a ɛyɛ den nsen wɔn.’+
15 “Enti medan me ho si fii bepɔw no so, bere a na ogya redɛw wɔ bepɔw no so.+ Ná abopon abien a apam no ho mmara wɔ so no wɔ me nsa abien mu.+ 16 Mibehui sɛ ampa moayɛ bɔne atia Yehowa mo Nyankopɔn! Ná moayɛ nantwi ba honi.+ Momanee ntɛm fii ɔkwan a Yehowa hyɛɛ mo no so.+ 17 Mihuu saa no, migyaa abopon abien no mu hwee hɔ ma ebubui wɔ mo anim.+ 18 Na mibutuw Yehowa anim adaduanan awia ne anadwo sɛnea meyɛɛ kan no. Manni hwee na mannom nsu nso,+ mo bɔne a moyɛe nyinaa nti, bɔne a moyɛe wɔ Yehowa ani so sɛ mode bɛhyɛ no abufuw.+ 19 Mehwɛ sɛnea Yehowa bo afuw na n’ani abere mo so no a, na misuro sɛ obetwa mo afi hɔ.+ Nanso saa bere no nso Yehowa tiee me.+
20 “Yehowa bo fuw Aaron nso denneennen ma anka ɔretwa no afi hɔ,+ nanso mepaa kyɛw+ maa Aaron nso saa bere no. 21 Afei mede ogya hyew nantwi ba honi a ɛyɛ mo abusude no,+ na mibubuu mu yam no muhumuhu te sɛ mfutuma, na metow guu nsu a efi bepɔw mu sen no mu.+
22 “Bere a mowɔ Tabera,+ Masa+ ne Kibrot-Hatawa+ no nso mohyɛɛ Yehowa abufuw.+ 23 Na bere a Yehowa somaa mo fi Kades-Barnea+ sɛ, ‘Monkɔfa asase a mede ama mo!’ no nso, motew Yehowa mo Nyankopɔn so atua,+ na moannye no anni+ na moantie no.+ 24 Efi da a mihuu mo yi, daa motew Yehowa so atua.+
25 “Enti mibutuw Yehowa anim adaduanan awia ne anadwo,+ efisɛ na Yehowa aka sɛ obetwa mo afi hɔ.+ 26 Na mepaa Yehowa kyɛw+ sɛ, ‘Awurade Tumfoɔ Yehowa, nsɛe wo man a wɔyɛ w’ankasa w’agyapade+ a wode wo tumi kɛse ne basa a ɛyɛ den+ gyee wɔn fii Egypt+ no. 27 Kae wo nkoa Abraham ne Isak ne Yakob.+ Nhwɛ ɔman yi asoɔden ne wɔn amumɔyɛ ne wɔn bɔne,+ 28 anyɛ saa a ɔman+ a wuyii yɛn fii hɔ no sofo bɛka sɛ: “Yehowa antumi amfa wɔn ankɔ asase a ɔhyɛɛ bɔ sɛ ɔde bɛma wɔn no so, na esiane sɛ ɔtan wɔn nti, wayi wɔn kɔ sɛ ɔrekokunkum wɔn wɔ sare so.”+ 29 Nnipa yi da so ara yɛ w’ankasa w’agyapade+ a wode wo tumi kɛse ne wo basa a woateɛ mu yii wɔn.’+