Yesu Yɛɛ Osetie Bere Nyinaa

So ɛyɛ mmerɛw bere nyinaa sɛ wubetie w’awofo asɛm?​— Ɛtɔ mmere bi a ɛyɛ den. So wunim sɛ Yesu tiee Yehowa ne n’awofo asɛm?​— Nea ɔyɛe no betumi aboa wo ma woatie w’awofo asɛm bere a ɛyɛ den ma wo mpo sɛ wobɛyɛ saa no. Ma yensua eyi ho nsɛm pii.

Ansa na Yesu reba asase so no, na ɔne ne Papa, Yehowa, wɔ soro. Nanso, Yesu san benyaa awofo wɔ asase so. Wɔfrɛ wɔn Yosef ne Maria. Wunim nea ɛyɛe a wɔbɛyɛɛ Yesu awofo?​—

Yehowa yii Yesu nkwa fii soro bɛhyɛɛ Maria yafunu mu ma wotumi woo Yesu wɔ asase so. Ná eyi yɛ anwonwade! Yesu nyinii wɔ Maria yafunu mu sɛnea mmofra foforo nyin wɔ wɔn maamenom yafunu mu no ara pɛ. Bɛyɛ asram akron akyi no, wɔwoo Yesu. Ɛnam saa kwan yi so na Maria ne ne kunu Yosef bɛyɛɛ Yesu awofo wɔ asase so.

Bere a Yesu dii mfe 12 no, ɔyɛɛ biribi a ɛma yehu sɛ na ɔdɔ ne Papa, Yehowa, paa. Eyi sii bere a Yesu ne ne fiefo twaa kwantenten kɔɔ Yerusalem kodii Twam afahyɛ no. Bere a wɔresan akɔ wɔn kurom no, Yosef ne Maria hwehwɛɛ Yesu, nanso wɔanhu no. Wunim baabi a na Yesu hyɛ?​—

Yosef ne Maria yɛɛ ntɛm san kɔɔ Yerusalem kɔhwehwɛɛ Yesu. Wɔhwehwɛɛ baabiara, nanso wɔanhu no. Eyi maa Yesu awofo werɛ howee paa. Nanso, nnansa akyi no, wohuu no wɔ asɔrefie hɔ! Wunim nea enti a na Yesu wɔ asɔrefie hɔ no?​— Efisɛ ɛhɔ na na obetumi asua ne Papa, Yehowa, ho ade. Ná ɔdɔ Yehowa, na na ɔpɛ sɛ ohu nea ɔyɛ a Yehowa ani begye. Bere a Yesu nyin bɛyɛɛ ɔpanyin mpo no, otiee Yehowa asɛm bere nyinaa. Yesu yɛɛ osetie bere mpo a na ɛyɛ den ma no sɛ ɔbɛyɛ saa no. Ná onim sɛ osetie a ɔbɛyɛ no bɛma wahu amane. So Yesu tiee Yosef ne Maria nso asɛm?​— Yiw, Bible ka sɛ otiee wɔn asɛm.

Dɛn na wubetumi asua afi Yesu ho asɛm no mu?​— Ɛsɛ sɛ wutie w’awofo asɛm, bere a ɛyɛ den ma wo mpo sɛ wobɛyɛ saa no. So wobɛyɛ saa?​—