Odwumfo kɛse no​—Yehowa!

ADWUMFO yɛ owiapue ne owiatɔ ho mfonini pii, na wɔtɔn gye dɔla ɔhaha ne mpo mpempem pii. Nanso, Yehowa Nyankopɔn, Odwumfo Kɛse ne owiapue ne owiatɔ ahorow no Fibea no ma yɛn biako da biara​—kwa. Nneɛma yi ankasa no kyɛn nea wɔahwɛ so ayeyɛ no koraa. So ɛnsɛ sɛ ɛno ma yɛn nea yebegyina so akyerɛ anisɔ ama no sɛ Ɔbɔadeɛ?” Yehowa Ɔdansefo ɔhwɛfo kwantufo bi na ɔkaa eyi wɔ ne kasa ahorow no biako mu wɔ asafo bi mu wɔ Hawaii.

Na ɔbea bi a onnye wɔ a Onyankopɔn wɔ hɔ nni a waba Ahenni Asa so nea edi kan ka atiefo no ho. Ɔhyɛɛ ɔsomfo no nsusuwii no nsow, nanso n’adwenem kɔɔ so yɛɛ no nãã wɔ Onyankopɔn wɔ a ɔwɔ hɔ no ho. Nanso, bɛyɛ eyi akyi mfe abien no, da koro bi a ofi adwuma rekɔ fie no, esiane sɛ na kar pii wɔ kwan mu nti na ontumi nkɔ ntɛmntɛm. Eyi ma ɔhyɛɛ owiatɔ fɛfɛ a ɛyɛ nwonwa bi nsow. N’adwene san kɔɔ saa ɔhwɛfo kwantufo no kasa no so.

Ose: “Sɛ́ anka me bo befuw esiane sɛ na mintumi nkɔ ntɛmntɛm nti mmom no, mehwɛɛ owiatɔ fɛfɛ no, na ɛma mekaee nea ɔkasafo no kae wɔ anisɔ a yɛbɛkyerɛ ama Yehowa Nyankopɔn sɛ Odwumfo ne Ɔbɔadeɛ no ho no. Ɛma misusuwii sɛ, ‘Ɛbɛyɛ sɛ nea ɔkae no yɛ nokware; ebia Ɔbɔadeɛ bi wɔ hɔ ankasa. Mekɔɔ so susuw ho bere a na merekɔ fie no, na saa anadwo no ara mefrɛɛ m’adamfo a ɔtoo nsa frɛɛ me kɔɔ Ahenni Asa so hɔ no wɔ telefon so. Mifii ase suaa Bible no na mprempren mesom Yehowa sɛ me Nyankopɔn ne me Bɔfo.”

Te sɛ odwontofo no, ɛnyɛ sɛ ɔbea yi bɛkyerɛɛ anisɔ maa Yehowa sɛ abɔde mu Odwumfo Kɛse nko na mmom ɔbɛtoo n’ayeyi dwom nso. Odwontofo no kyerɛwee sɛ: “Munyi [Yehowa] ayɛ mfi soro . . . Owia ne ɔsram, munyi no ayɛ, nsoromma a ɛharan nyinaa, munyi no ayɛ. Ma wonyi [Yehowa] din ayɛ, na ɔno na ɔhyɛe na wɔbɔɔ wɔn.”​—Dwom 148:1-5.