Awodadi Ahorow Kowiee Awudi Mu

NNIPA pii bu awodadi nnɛ sɛ amanne a asɛm biara nni ho. Nanso Bible nka saa amanne yi ho asɛmpa. Ade biako ne sɛ, Kyerɛwnsɛm no nkyerɛ sɛ Onyankopɔn asomfo anokwafo no biara dii awoda.

Sodifo a na wɔyɛ Onyankopɔn atamfo na wodii awoda abien pɛ a Bible no ka ho asɛm no. Wokum nipa wɔ afahyɛ no mu biara ase sɛnea ɛbɛyɛ a ahɔho a wɔbaa ase no de anigye bɛhwɛ obi a wayɛ biribi a ɛnsɔ ɔhene ani no wu. Nea edi kan mu no, Misraim hene Farao kum n’abodootofo panyin. (Genesis 40:2, 3, 20, 22) Misraim sodifo no yɛɛ saa wɔ apontow no ase esiane sɛ na ne bo afuw n’akoa no nti. Nea ɛto so abien mu no, Herode, Galilea sodifo a ne bra asɛe no, twaa Osuboni Yohane ti de sɔɔ abeawa bi a na wasaw wɔ apontow no ase ma n’ani agye ho no ani. Aninyanne bɛn ara ni!—Mateo 14:6-11.

Nanso, so ɛnyɛ awodadi abien a ɛyɛ soronko koraa na Bible no kaa ho asɛm? Ɛnte saa ankasa. Tete Yudani abakɔsɛm kyerɛwfo Josephus da no adi sɛ ɛnyɛ soronko. Wayɛ nnipa a wokunkum wɔn wɔ awodadi afoforo ase de gye wɔn ani ho kyerɛwtohɔ.

Sɛ nhwɛso no, ebi sisii wɔ Yerusalem sɛe a ɛbae wɔ afe 70 Y.B. mu no akyi, bere a Yudafo 1,000,000 hweree wɔn nkwa na wɔfaa 97,000 a wofii mu kae kɔɔ nkoasom mu no. Bere a wɔnam kwan so rekɔ Roma no, Roma sahene Tito de Yudafo a wafa wɔn nnommum no kɔɔ Kaesarea po so ahyɛn gyinabea.

Josephus kyerɛw sɛ: “Bere a Tito wɔ Kaesarea no, ɔde anigye kɛse dii ne nuabarima Domitian awoda, na ɔnam mmoa a ɔmaa wɔne nneduafo koe ne hyew a ɔhyew ebinom so kunkum wɔn mu bɛboro 2,500. Eyi akyi no ɔtoaa so kɔɔ Berytus [Beirut], Romafo atubraman a ɛwɔ Foinike, baabi a okunkum nnipa a wɔafa wɔn nnommum no pii sen kan no de yɛɛ ɔyɛkyerɛ akɛse de dii n’agya awoda no.”—The Jewish War, VII, 37, a Paul L. Maier kyerɛɛ ase wɔ Josephus: The Essential Writings mu no.

Enti ɛnyɛ nwonwa sɛ The Imperial Bible-Dictionary ka sɛ: “Hebrifo a wɔtraa ase saa nna no akyi buu awodadi sɛ ɛyɛ abosonsomfo afahyɛ, na ɛbɛyɛ sɛ wogyina adanse a ɛdɔɔso a wohui sɛ ɛkɔɔ so wɔ afahyɛ no ase a ɛda so kɔ so nnɛ no so na enyaa saa adwene no.”

Nokware Kristofo a wɔtraa ase wɔ afeha a edi kan no mu ampɛ sɛ wɔde wɔn ho bɛhyɛ Romafo amanne a wɔnka ho asɛmpa wɔ Bible mu, na wodii no atirimɔden so no mu. Ɛnnɛ, nokware Kristofo nim sɛ awodadi ho kyerɛwtohɔ a ɛwɔ Bible no mu no ka nneɛma a wɔakyerɛw ato hɔ ama wɔn kyerɛkyerɛ no ho. (Romafo 15:4) Wɔpow awodadi efisɛ afahyɛ a ɛtete saa no de obu a ɛmfata ma nea odi n’awoda no. Na nea ɛho hia titiriw no, Yehowa asomfo fi nyansam susuw ka a Bible no nka awodadi ho asɛmpa no ho.

[Kratafa 25 mfonini]

Kaesarea agumadibea