Fa Nsa A Ɛho Tew Som Yehowa

ODWONTOFO Dawid fi honhom mu too dwom sɛ: “Mɛhohoro me nsa, bemdi mu, na matwa w’afɔremuka ho mahyia, Awurade.”—Dwom 26:6.

Wɔ nsɛm yi hyehyɛ mu no, ɛbɛyɛ sɛ na Dawid de reka Israel Lewifo asɔfo amanne a ɛne sɛ wɔforo afɔremuka atrapoe no na afei wɔde wɔn afɔrebɔde no ato gya no so no ho asɛm. Nanso ansa na asɔfo no bɛyɛ ɔsom mu ade a ɛte saa yi, na wɔhwehwɛ sɛ wɔhohoro wɔn nsa ne wɔn nan ho. Ná eyi nyɛ ade a ɛsɛ sɛ wobu no adewa. Sɛ ɔsɔfo bi anyɛ ade a edi kan yi a, na obetumi ahwere ne nkwa!—Exodus 30:18-21.

Sɛnkyerɛnne kwan so aguare ma obi ho tew wɔ honhom ne abrabɔ fam. (Yesaia 1:16; Efesofo 5:26) Yehowa pɛ sɛ nnɛ ‘yetwa n’afɔremuka ho hyia’ denam som a yɛbɛsom no no so. Nanso ɔhwehwɛ sɛ yɛde nsa a ɛho tew yɛ saa—sɛnea Dawid kaa no no, nsa a wɔahohoro ho “bemdi mu.” Eyi nyɛ ahwehwɛde a ɛho nhia, efisɛ wɔn a wɔyɛ afide no rennya Onyankopɔn Ahenni. (Galatifo 5:19-21) Asetra a nnwuma pa wom no mma obi hokwan sɛ ommu bra bɔne. Enti ɔsomafo Paulo kyerɛwee sɛ: “Mehyɛ me nipadua ahometew, na midi no nya, na mereka asɛm makyerɛ ebinom yi, m’ankasa manyɛ nea ɔmfra.”—1 Korintofo 9:27.

Ɛsɛ sɛ wɔn a wɔhwehwɛ ɔsoro adom ne nokware anigye no de nsa a ɛho tew som Yehowa. Te sɛ Dawid no, wɔnantew wɔ ‘koma mu pɛyɛ ne tẽe mu.’—1 Ahene 9:4.