Hell Ho Nokwasɛm

AMANNEƐBƆ bi a efi Church of England nkyerɛkyerɛ asoɛe ka sɛ, sɛɛ na hell nyɛ fononoo a ogya wom; na mmom ɛyɛ baabi a hwee nni. Amanneɛbɔ no kyerɛkyerɛ mu sɛ: “Yɛwɔ nsakrae yi ho nnyinasosɛm pii. Nanso nea ɛka ho ne abrabɔ pa ho kasa a wɔn a wɔyɛ Kristofo ne wɔn a wɔnyɛ bi no kasa tia ehu a nyamesom yi, ne nkyerɛkyerɛ a ɛfa Onyankopɔn a ɔyɛ nnipa ɔpepem pii ayayade a ɛne Onyankopɔn dɔ a Kristo bɛdaa no adi no bɔ abira ho ntease kɛse a wɔrenya no.”

Ɛnyɛ Church of England nkutoo na wɔn ani nnye hell ho atetesɛm yi ho. Ɛyɛ den ma nnipa a wofi asɔre horow mu sɛ wɔbɛsom aweredi Nyankopɔn a ɔhyew abɔnefo no. Jackson Carroll a ɔyɛ nyamesom ne fekuw ho ɔbenfo wɔ Duke Sukuupɔn no Fã a Ɛfa Nyamekyerɛ Ho no ka sɛ: “Nkurɔfo pɛ Onyankopɔn a ɔwɔ dɔ ne tema. Bɔne ne afobu ho asɛm a wɔka no ne nnɛyi nsusuwii nhyia.”

Yehowa Adansefo fi bere tenten akyerɛ sɛ, sɛnea Bible kyerɛ no, hell yɛ adesamma a wɔawuwu damoa ara kwa—nyɛ baabi a wɔyɛ ayayade wɔ ogya mu. Ɛnyɛ sɛ nnipa pii gye tom nti na wokuraa saa adwene yi mu, na mmom, esiane nea Bible ka no nti: “Awufo de, wonnim biribiara . . . Adwuma ne adwene ne nimdeɛ ne nyansa nni asaman [“hell,” Catholic Douay Version].”—Ɔsɛnkafo 9:5, 10.

Charles Taze Russell, Ɔwɛn Aban Asafo no titrani a odi kan no gyinaa awufo tebea ho ntease a emu da hɔ yi so kyerɛwee wɔ 1896 mu tɔnn sɛ: “Yenhu [wɔ Bible mu] baabiara a wɔyɛ nkurɔfo ayayade daa sɛnea gyidikasɛm ahorow ne nnwom nhoma, ne asɔfo pii adi mfomso akyerɛkyerɛ no. Nanso, yɛahu ‘hell,’ sheol, hades, a Adam bɔne nti, wobuu nnipa nyinaa fɔ kɔɔ mu, a emu na wɔnam yɛn Awurade wu no so gyee yɛn nyinaa no; ne sɛ, ‘hell’ yɛ ɔdamoa—owu tebea.”

Enti Yehowa Adansefo de mfe ɔha ne akyi akyerɛkyerɛ Bible mu nokwasɛm a ɛfa hell ho no.

[Kratafa 32 mfonini]

Charles T. Russell