So Onyankopɔn Bɛsɛe Wiase?

SƐNEA Pope John Paul II kyerɛ no, nnipa betumi de ahotoso ahwɛ daakye kwan. Ɔkae sɛ, wɔ abakɔsɛm nyinaa mu no, “nnipa akɔ so ayɛ bɔne, a gyama ɛsõ mpo sen nea wɔkyerɛ sɛ ɛkɔɔ so ansa na nsuyiri no reba no.” Ɛmfa ho mpo sɛ ɛte saa no, pope no kyerɛkyerɛɛ mu sɛ, “nsɛm a Onyankopɔn kae wɔ apam a ɔne Noa yɛe no mu no ma yehu sɛ seesei bɔne biara nni hɔ a ebetumi ama Onyankopɔn asɛe wiase a n’ankasa abɔ no.”

Ɛyɛ ampa sɛ Onyankopɔn rensɛe wiase da? Bible no ka sɛ Nsuyiri no akyi no, Onyankopɔn ka kyerɛɛ Noa sɛ: “Meremfa nsuyiri mensɛe ɔhonam nyinaa bio, na nsuyiri remma mmɛsɛe asase bio.” (Genesis 9:11) Pope no kae sɛ Onyankopɔn nam saa nsɛm yi so “gye toom sɛ ɔbɛkora [asase so] na ansɛe.”

Bible no ma emu da hɔ pefee sɛ Ɔbɔadeɛ no remma wɔnsɛe yɛn okyinnsoromma yi. Bible se: “Asase de, etim hɔ daa.” (Ɔsɛnkafo 1:4) Nanso yebetumi asua pii afi Nsuyiri no mu—biribi a pope no anka ho asɛm.

Yesu kae sɛ wɔ ne daakye mmae mu no, asase so tebea bɛyɛ “sɛnea Noa nna no yɛe,” a nkurɔfo “[anhu] de kosii sɛ nsu yiri bɛfaa wɔn nyinaa kɔe no.” (Mateo 24:37-39) Saa ara na ɔsomafo Petro nso kyerɛwee sɛ sɛnea “nsu yirii wiase a ɛwɔ bere no so no,” saa ara na “atemmu ne nnipa amumɔyɛfo sɛe da” repempɛn so ma seesei wiase yi.—2 Petro 3:5-7.

So Yesu ne Petro werɛ fii apam a Nyankopɔn ne Noa yɛe no? Ɛrentumi mma saa! Sɛnea Onyankopɔn kae wɔ apam a ɔne Noa yɛe no mu no, ɔremfa nsuyiri mmɛsɛe nneɛma nhyehyɛe bɔne yi. Mmom no, ɔbɛma “ahene mu hene ne awuranom mu awurade,” Yesu Kristo, de n’ahoɔden adi dwuma. (Adiyisɛm [Yikyerɛ] 19:11-21) Enti sɛnea Bible kyerɛ no, wɔrensɛe asase, nanso adesamma amumɔyɛfo “wiase” no de, wɔbɛsɛe no ɔkwan biara so. (Mmebusɛm 2:21, 22; Adiyisɛm 11:18) Ɛno akyi no, “treneefo benya asase no adi, na wɔatra so daapem.”—Dwom 37:29.