Bible Foforo Wɔ Nnɛyi Hela Kasa Mu

NA AUGUST 23, 1997, yɛ da titiriw ma wɔn a wohyiae wɔ “Onyankopɔn Asɛm” mu Gyidi Ɔmantam Nhyiam ase wɔ Greece no. Bere a wɔde awia dwumadi no reba n’awiei no woyii Bible foforo—New World Translation of the Holy Scriptures wɔ nnɛyi Hela kasa mu—adi. Ɛkaa atiefo a wɔn ho dwiriw wɔn no prɛko pɛ ma wɔsɔre gyinae de nusu a efi anigye mu ne nsambɔ kɛse gyee so bere tenten!

Efi 1905 no, Yehowa Adansefo de afeha a ɛto so 19 mu Bible nkyerɛase a Greek Ortodɔks sɔfo bi yɛe na edii dwuma. Saa Bible yi boaa wɔn yiye mfe pii. Nanso, bere tenten bi no, na Yehowa Adansefo te nka sɛ wohia Bible nkyerɛase a edi mũ na asete nso yɛ mmerɛw. Wɔ 1993 mu no, wɔn ani gyei sɛ wonyaa New World Translation of the Christian Greek Scriptures wɔ Hela kasa mu. Nanso, saa bere yi de, wɔn anigye boroo so sɛ wɔanya Bible mũ no nyinaa wɔ nnɛyi Hela kasa mu.

Ɔdansefo biako a ɔkyerɛɛ anisɔ frɛɛ New World Translation no sɛ “anwensɛm, mframa dɛɛdɛ a ɛde Yehowa asɛm nam, a bere a edi kan ni a yebetumi ate ase yiye wɔ yɛn ankasa kasa mu.” Ebinom fii ase kenkan wɔn Bible foforo no bere a woduu fie ara pɛ. Nhyiamfo no biako a n’ani agye no annyae ne Bible no kenkan de kosi dɔn ko adekyee a owiee Hiob nhoma no nyinaa no!

Mfe ason a wɔde yɛɛ adwumaden na ɛma wonyaa New World Translation of the Holy Scriptures no. Krataa biako a nsa kae mu asɛm kenkan sɛ: “Wubetumi anya ahotoso sɛ, New World Translation no rebɛboa yɛn kɛse wɔ nnipa komapafo a yɛreboa wɔn ma wɔasua Yehowa ho ade no mu.”