Bere a ‘Mframa no Bɔ Hyia Yɛn’

Bere a Asɛmpa kyerɛwfo Marko reka asetra mu osuahu ankasa a Yesu asuafo nyae bere a na wɔde ɔkorow retwa Galilea Po no ho asɛm no, ɔka sɛ na “wɔrebrɛ ahare mu; na mframa rehyia wɔn.” Bere a na Yesu da so ara wɔ mpoano no, ohui sɛ wɔn ho akyere wɔn ma enti ɔnantew po no so baa wɔn nkyɛn anwonwakwan so. Bere a ɔkɔɔ wɔn nkyɛn wɔ ɔkorow no mu no, mframa no gyaee.—Marko 6:48-51.

Bible kyerɛwfo koro no ara bɔɔ amanneɛ sɛ bere bi a na atwam mu no “ahum kɛse tui.” Na Yesu “teɛteɛɛ mframa no . . . , na mframa no gyaee, na ɛyɛɛ dinn.”—Marko 4:37-39.

Ɛwom sɛ yenni hokwan a yɛde behu anwonwade ahorow a ɛte saa nnɛ de, nanso yebetumi asua biribi afi mu. Sɛ nnipa a yɛnyɛ pɛ a yɛwɔ nna a edi akyi a emu yɛ den yi mu no, yɛnnee yɛn ho mfii amanehunu ho. (2 Timoteo 3:1-5) Nokwarem no, ɛtɔ mmere bi a yɛte nka sɛ yɛn amanehunu ano tumi yɛ den te sɛ ahum. Nanso mmoa wɔ hɔ! Yesu to nsa frɛ yɛn sɛ: “Mo a moayɛ adwuma abrɛ na wɔasoa mo nnesoa nyinaa, mommra me nkyɛn, na mɛma moahome.”—Mateo 11:28.

Sɛ ɛte sɛ nea ‘mframa a ano yɛ den hyia yɛn a,’ yebetumi anya ‘nea ebedwudwo’ yɛn koma. Ɔkwan bɛn so? Denam Yehowa Nyankopɔn bɔhyɛ ahorow a enni huammɔ a yebenya mu ahotoso koraa no so.—Fa toto Yesaia 55:9-11; Filipifo 4:5-7 ho.