So Ɛyɛ Afeha a Satan Kɛntɛn So?

“NEA enye koraa no, wobetumi afrɛ yɛn bere yi sɛ Satan afeha. Bere biara ntwaam pɛn a nnipa anya su ne akɔnnɔ kɛse sɛ wobekum nnipa afoforo ɔpepem pii esiane abusua, ɔsom ne gyinabea bi nti.”

Nnipa a wɔn ho nni asɛm a wɔde wɔn guu Nasi owu nsraban mu a wogyaee wɔn ho afahyɛ a ɛto so 50 a na wɔredi no na ɛmaa wɔkaa atifi hɔ asɛm no wɔ samufo afã wɔ The New York Times a ɛbaa January 26, 1995, no mu. Okunkɛse no—mmusua asetɔre ho nsɛm a agye din kɛse sen biara mu biako wɔ abakɔsɛm mu no—maa wokunkum Yudafo bɛyɛ ɔpepem asia. Nnipa a wɔnyɛ Yudafo a na wɔte Poland no bɛyɛ ɔpepem abiɛsa na wokunkum wɔn wɔ nea wɔato din “Okunkɛse a Werɛ Afi” no mu.

Jonathan Glover ka wɔ ne nhoma Humanity—A Moral History of the Twentieth Century mu sɛ: “Akontaa a wɔabu fi 1900 kosi 1989 no kyerɛ sɛ nnipa ɔpepem 86 na wokunkum wɔn wɔ ako-di mu.” Ɔde ka ho sɛ: “Nnipa a akodi ma wowuwui afeha a ɛto so aduonu mu no yɛ nea yentumi nhu ano. Mmɔden biara a obi bɛbɔ sɛ ɔbɛkyerɛ nnipa dodow a wowuwui no yɛ bɔtirimka, efisɛ bɛyɛ wɔn a wowuwui no mu nkyem abiɛsa mu abien (ɔpepem 58) na wokunkum wɔn wɔ wiase ko ahorow abien no mu. Nanso, sɛ wɔkyekyɛ nnipa dodow a wowuwui yi mu pɛpɛɛpɛ a, ɛbɛyɛ sɛ akodi kunkum nnipa bɛyɛ 2,500 da biara, ɛno bɛboro nnipa 100 a wokum wɔn toatoaa so dɔnhwerew biara wɔ mfirihyia aduakron mu.”

Enti, wɔafrɛ afeha a ɛto so 20 no sɛ afeha a wohwiee mogya gui wom sen biara wɔ adesamma abakɔsɛm mu. Nadezhda Mandelstam kyerɛw wɔ ne nhoma Hope Against Hope mu sɛ: “Yehu nkonim a bɔne adi bere a wogu adesamma gyinapɛn ahorow ho fĩ na wotiatia so no.” Wɔ apere a wɔredi sɛ papa bedi bɔne so nkonim mu no, so bɔne adi nkonim ankasa?

[Mfonini Fibea wɔ kratafa 2]

COVER: Mother and daughter: J.R. Ripper/SocialPhotos

[Mfonini Fibea wɔ kratafa 3]

U.S. Department of Energy photograph