Afahyɛ a Ɛsɛ sɛ Wɔkae!

Dwoda, April 2

Ná ɛda no yɛ Nisan da ɛto so 14 afe 33 Y.B. mu. Yesu de bobesa a egu kuruwa mu maa n’asomafo no nomee, na ɔmaa wɔn abodoo a mmɔkaw nnim nso dii. Dɛn na ɔka kyerɛɛ n’asomafo no sɛ wɔnyɛ? Ɔkae sɛ: “Monkɔ so nyɛ eyi mfa nkae me.”—Luka 22:19.

Enti, Yehowa Adansefo a wɔwɔ wiase nyinaa hyiam pɛnkoro afe biara de kae Yesu wu no, na wodi afahyɛ no sɛnea Yesu kyerɛɛ wɔn sɛ wɔnyɛ no wɔ anadwo a ɔkaa saa asɛm no. Afe yi, Nisan da ɛto so 14 befi ase Dwoda, April 2, bere a owia akɔtɔ. Yɛde anigye to nsa frɛ wo sɛ bɛka yɛn ho wɔ nkaedi nhyiam yi ase wɔ saa anwummere no. Yɛsrɛ wo, bisa Yehowa Adansefo a wɔwɔ baabi a wote no ma wɔnkyerɛ wo bere ne beae pɔtee a wobehyiam no.