Asɛnka Adwuma no Ma Yɛda Nsow
1 Nnipa pii bisa sɛ, “Dɛn na ɛma Yehowa Adansefo da nsow wɔ ɔsom afoforo ho?” Anka wubebua dɛn? Wubetumi akyerɛkyerɛ yɛn gyidi horow a egyina Bible so no bi mu. Nanso so woasusuw sɛnea yɛn baguam asɛnka adwuma no ma yɛda nsow wɔ ɔsom afoforo ho no ho?—Mat. 24:14; 28:19, 20.
2 Ɛnnɛ, nyamesomfo kakraa bi na wɔwɔ ɔpɛ sɛ wɔbɛka wɔn gyidi ho asɛm akyerɛ nnipa foforo. Ebia wobesusuw sɛ di a wobedi Kaesare mmara so, abu bra pa, na wɔayɛ nnwuma pa ama afoforo no ara dɔɔso. Nanso, wonhu hia a ehia sɛ wɔboa afoforo ma wosua nea Bible no ka fa nkwa a wobenya ho no. Dɛn na ɛma yɛda nsow?
3 Asɛnka adwuma a yɛde nsi yɛ no da nsow koraa wɔ nnwuma a wɔyɛ wɔ ɔsom afoforo mu no ho. Bɛboro mfe 100 ni na nnɛyi Adansefo de nnamyɛ aka asɛmpa no wɔ wiase nyinaa sɛnea tete Kristofo no yɛe no. Nea enti a yɛyɛ saa ne sɛ yɛbɛboa nnipa pii ma wɔayɛ nea Onyankopɔn pɛ wɔ wɔn asetram.—1 Tim. 2:4; 2 Pet. 3:9.
4 Wonim Wo Dɛn? So wonim wo sɛ obi a ɔde nsi kyerɛkyerɛ Onyankopɔn Asɛm no mu? (Aso. 17:2, 3; 18:25) So wonam asɛnka adwuma a woyɛ no so ma w’afipamfo hu nsonsonoe a ɛda wɔn som ne wo de ntam no ntɛm ara? So wonim wo sɛ obi a ɔde ahopere ka n’anidaso ho asɛm kyerɛ afoforo? So woayɛ nhyehyɛe a ɛma wutumi kɔ asɛnka daa? Kae sɛ ɛnyɛ din a ɛda yɛn so no nkutoo na ɛma yɛda nsow, na mmom nea edin no hwehwɛ sɛ yɛyɛ nso—Yehowa ho adanse a yebedi.—Yes. 43:10.
5 Ɔdɔ a yɛwɔ ma Nyankopɔn ne yɛn mfɛfo nnipa no na ɛka yɛn ma yɛyɛ asɛnka adwuma no. (Mat. 22:37-39) Enti na yɛpɛ sɛ yɛde hokwan biara a yebenya ka Ahenni ho asɛm no kyerɛ afoforo sɛnea Yesu ne n’asomafo no yɛe no. Momma yɛnkɔ so mfa nsi nka asɛmpa no nkyerɛ wɔn a wɔpɛ sɛ wotie nyinaa. Sɛ yɛyɛ saa a, yɛbɛboa komapafo ma “wɔahu nsonoe a ɛda . . . nea ɔsom Onyankopɔn ne nea ɔnsom no no ntam.”—Mal. 3:18.