“Montrɛw Mu”
1. Asɛyɛde bɛn na yɛn mu biara wɔ?
1 Wɔ Kristofo anuanom mu no, ɛyɛ yɛn mu biara asɛyɛde sɛ yɛda ɔdɔ adi wɔ asafo no mu. (1 Pet. 1:22; 2:17) Ɔdɔ a ɛte saa no da adi bere a ‘yɛtrɛw mu,’ na yɛda ɔdɔ adi kyerɛ yɛn ho yɛn ho no. (2 Kor. 6:12, 13) Dɛn nti na ɛho hia sɛ yehu yɛn nuanom mmarima ne mmea yiye?
2. Dɛn nti na ɛho hia sɛ yɛne yɛn mfɛfo gyidifo fa nnamfo?
2 Adamfofa Mu Tumi Yɛ Den: Bere a yehu yɛn mfɛfo agyidifo yiye no, ɛma yɛkyerɛ wɔn gyidi, wɔn boasetɔ ne su pa foforo a wɔwɔ no ho anisɔ kɛse. Yehu wɔn sintɔ ahorow no sɛ ade ketewaa bi, na adamfofa a ɛda yɛn ntam no mu tumi yɛ den. Sɛ yenim yɛn ho yiye a, ɛboa yɛn ma yɛhyɛ yɛn ho den na yɛkyekye yɛn ho yɛn ho werɛ. (1 Tes. 5:11) Yebetumi ‘akyekye’ yɛn ho yɛn ho werɛ na yɛako atia Satan wiase nkɛntɛnso bɔne no. (Kol. 4:11) Esiane nhyɛso a yehyia wɔ nna a edi akyiri yi mu nti, hwɛ ye a eye sɛ yɛwɔ nnamfo pa wɔ Yehowa nkurɔfo mu!—Mmeb. 18:24.
3. Yɛbɛyɛ dɛn atumi akyekye afoforo werɛ?
3 Bere a yehyia sɔhwɛ a emu yɛ den no, nnamfo a wɔbɛn yɛn no betumi ahyɛ yɛn den na wɔakyekye yɛn werɛ. (Mmeb. 17:17) Kristoni bi a na ɔte nka sɛ ɔnsɛ hwee no ka sɛ: “Na mewɔ nnamfo a wɔka me ho nsɛm a ɛhyɛ nkuran de boa me ma midi adwemmɔne a na manya no so.” Nnamfo a wɔte saa no yɛ akyɛde a Yehowa de ama yɛn.—Mmeb. 27:9.
4. Yɛbɛyɛ dɛn atumi ahu afoforo a wɔwɔ asafo no mu yiye?
4 Kyerɛ Afoforo Ho Anigye: Yɛbɛyɛ dɛn atumi atrɛw ɔdɔ a yɛwɔ ma yɛn mfɛfo agyidifo no mu? Afoforo a yɛbɛkyea wɔn wɔ Kristofo nhyiam ase no da nkyɛn a, ɛsɛ sɛ yɛbɔ mmɔden sɛ yɛne wɔn bedi nkɔmmɔ a ɛma denhyɛ. Bere a yɛmfeefee wɔn kokoam nsɛm mu no, ɛsɛ sɛ yɛkyerɛ wɔn ho anigye. (Fil. 2:4; 1 Pet. 4:15) Ɔkwan foforo a yɛbɛfa so atrɛw mu ne sɛ yɛbɛto nsa afrɛ wɔn ma wɔne yɛn abedidi. (Luka 14:12-14) Anaa yebetumi ne wɔn ayɛ nhyehyɛe abom akɔ asɛnka. (Luka 10:1) Bere a yedi kan hu yɛn nuanom yiye no, yɛma biakoyɛ ba asafo no mu.—Kol. 3:14.
5. Ɔkwan biako bɛn na yebetumi afa atrɛw yɛn adamfofa mu?
5 So yɛn atipɛnfo anaa wɔn a wɔne yɛn adwene hyia no nkutoo na yɛhyɛ da paw wɔn nnamfo? Ɛnsɛ sɛ yɛma nneɛma bi a ɛte saa siw nnamfo a yɛbɛfa wɔ asafo no mu no kwan. Dawid ne Yonatan ne afei, Rut ne Naomi nyaa adamfofa a na emu yɛ den ɛmfa ho sɛ na ɛsono wɔn mfe a wɔadi ne abusua a wofi mu no. (Rut 4:15; 1 Sam. 18:1) So wubetumi atrɛw w’adamfofa mu? Saa a wobɛyɛ no bɛma woanya nhyira a wonhwɛ kwan.
6. Mfaso a yenya fi yɛn dɔ a yɛtrɛw mu ma yɛn nuanom no bi ne dɛn?
6 Sɛ yɛtrɛw yɛn dɔ mu ma ɛso afoforo so a, yɛhyɛ yɛn ho yɛn ho den na yɛma asomdwoe tra asafo no mu. Bio nso, Yehowa ankasa hyira yɛn wɔ ɔdɔ a yɛda no adi kyerɛ anuanom no ho. (Dw. 41:1, 2; Heb. 6:10) Dɛn nti na womfa nyɛ wo botae sɛ wo ne anuanom dodow no ara bɛbɔ?