Krataa a Efi Sodikuw no Hɔ

Yefi yɛn koma nyinaa mu bɔ Onyankopɔn mpae sɛ, “Wo din ho ntew” de di Yesu nhwɛso akyi. Yɛnam ɔkwan a yɛfa so bɔ yɛn bra sɛ Yehowa Adansefo no so da ɔpɛ a emu yɛ den a yɛwɔ sɛ yɛbɛyɛ saa mpae no ho adwuma adi. Nokwarem no, ɛsɛ sɛ yehu pii sen Onyankopɔn din ara kwa a yebehu. Ɛsɛ sɛ yɛde hokwan biara a yebenya hyɛ saa din no anuonyam. Nokwasɛm ne sɛ, biribiara nni hɔ a nidi wom sen sɛ wɔbɛfrɛ yɛn Yehowa Adansefo.—Mat. 6:9; Yes. 43:10.

Nea ɛne Dwom 110:3 hyia no, Yehowa nkurɔfo fi wɔn pɛ mu reyɛ adwuma a Yehowa ahyɛ sɛ wɔnyɛ no. Dɛn nti na nnipa ahorow nyinaa bi a ɛsono mfe a wɔadi reyɛ asɛnka adwuma no? Ne titiriw no, ɛyɛ ɔdɔ a wɔwɔ ma Onyankopɔn ne wɔn ho so a wɔahyira ama no no ntia. Deuteronomium 6:5, 6 hyɛ yɛn sɛ yɛmfa yɛn ‘koma nyinaa, yɛn kra nyinaa, ne yɛn ahoɔden nyinaa’ nnɔ Yehowa. Ɔdɔ a efi koma mu yi ka yɛn ma yɛde yɛn bere, yɛn ahoɔden, ne yɛn agyapade boa Onyankopɔn Ahenni ho adwuma, a ebi ne sɛ yɛbɛyɛ asɛnka adwuma no sɛnea yɛn nsɛm tebea bɛma yɛn kwan.

Ɔdɔ a Yehowa wɔ ma adesamma nti na ɔde akwankyerɛ ama sɛ yɛnka n’Ahenni ho asɛmpa wɔ asase so nyinaa no. Ɔmpɛ sɛ obiara bɛsɛe, na mmom ɔpɛ sɛ wɔn nyinaa sakra wɔn akwan na wɔba wɔn Bɔfo no nkyɛn sɛnea ɛbɛyɛ a wobenya nkwa. (2 Pet. 3:9) Yehowa ka sɛ “ɔbɔnefo wu nyɛ me fɛ, na mmom sɛ ɔbɔnefo bɛsan afi ne kwan so na wanya nkwa.” (Hes. 33:11) Sɛ yɛreyɛ asɛnka adwuma no a, ɛma nkurɔfo hu sɛ Yehowa dɔ nnipa. Akyinnye biara nni ho sɛ eyi ka ho bi nti na yenya anigye ne akomatɔyam bere a yɛreyɛ adwuma titiriw yi no.

Ɔdɔ a emu yɛ den a yɛwɔ ma Yehowa no nso da adi wɔ sɛnea yebu n’Asɛm, Kyerɛw Kronkron no ho. Sɛ ɛnyɛ Bible no a, anka yɛrenhu Nyankopɔn na yɛabɛn no sɛnea Yakobo 4:8 ka kyerɛ yɛn sɛ yɛnyɛ no. Saa ara nso na anka yɛrenhu nea enti a yɛwɔ ha ne nea ɛbɛba daakye. Anka yɛrenhu sɛ yɛn haw nyinaa fi yɛn nana Adam. (Rom. 5:12) Saa ara nso na anka yɛrenhu Onyankopɔn dɔ kɛse a ɔdaa no adi ma enti ɔde ne Ba a ɔwoo no koro maa yɛn sɛ agyede no. Yehowa nam akwan foforo pii so ma yenya ne nimdeɛ, ne nyansa ne ne ntease a ɔwɔ no bi. Hwɛ sɛnea n’Asɛm a efi honhom mu a ɔde ama yɛn no som yɛn bo! Anisɔ a yɛwɔ ma akyɛde nwonwaso yi ka yɛn ma ‘yɛtɔ bere’ de kenkan n’asɛm, sua, na yedwennwen ho. (Efe. 5:15, 16; Dw. 1:1-3) Ɛnsɛ sɛ yɛma bere a yebegye akenkan Onyankopɔn Asɛm Bible da biara no yɛ yɛn yaw. Mmom no, ɛsɛ sɛ ɔdɔ a yɛwɔ ma Onyankopɔn no twe yɛn bɛn n’Asɛm no, na ɛboa yɛn ma yehu no yiye na ama ɔdɔ a yɛwɔ ma no no mu ayɛ den.

Yɛahu afi Bible mu sɛ bere a Adam yɛɛ bɔne tiaa Yehowa no, ɔde n’asefo a wɔbɛba daakye nyinaa a yɛn mu biara ka ho no kɔhyɛɛ tebea bi a anidaso biara nni mu mu. Nanso na Onyankopɔn betumi ayɛ ho biribi ama adesamma, na ɔyɛe nso. Ɔhwɛe sɛ ɔbɛma atirimpɔw a enti ɔbɔɔ asase no aba mu.—Gen. 3:15.

Akyinnye biara nni ho sɛ yɛn mu biara wɔ ɔpɛ a emu yɛ den sɛ ɔbɛtew Onyankopɔn din kronkron no ho. Dodow a yehu sɛnea Yehowa Nyankopɔn ho yɛ nwonwa no, dodow no ara na ɛka yɛn ma yɛbrɛ yɛn ho ase ma ɔne n’ahyehyɛde no denam ne din kɛse ne n’atirimpɔw a yɛma ɛda adi no so. Ɛnnɛ, yɛwɔ awerɛhyem sɛ n’ani sɔ yɛn na ohyira yɛn, na saa ara nso na yɛhwɛ kwan sɛ yɛbɛtra ase daa wɔ wiase foforo no mu.

Sɛ́ Sodikuw no mufo no, yɛpɛ sɛ muhu sɛ yɛdɔ mo nyinaa. Yɛn ani sɔ mmɔden a mobɔ de bere a aka ansa na “ahohiahia kɛse” no aba no ka asɛmpa no kyerɛ nnipa dodow biara a mubetumi no paa nso. (Adi. 7:14) Sɛ moyɛ saa a, moma wɔn nso nya hokwan a moanya no bi. Ɛno ne Onyankopɔn ne Kristo ho nimdeɛ a ɛkɔ daa nkwa mu no.—Yoh. 17:3.

Mo nuanom,

Yehowa Adansefo Sodikuw