Asɛnka Hyɛ Yɛn Den Honhom Fam
1. Mfaso bɛn na asɛnka adwuma no ma yenya?
1 Sɛ yɛde nsi yɛ asɛnka adwuma no a, ebetumi ahyɛ yɛn den honhom fam na yɛanya anigye kɛse. Nokwarem no, ade titiriw a enti yɛyɛ asɛnka adwuma no ne sɛ yɛbɛsɔ Yehowa ani. Nanso, sɛ yedi ahyɛde a ɛne sɛ ‘yɛnka asɛm no’ so a, yenya Yehowa nhyira na ɛboa yɛn wɔ akwan afoforo so nso. (2 Tim. 4:2; Yes. 48:17, 18) Ɔkwan bɛn so koraa na asɛnka betumi ahyɛ yɛn den na ama yɛn ani agye?
2. Akwan bɛn so na asɛnka adwuma no hyɛ yɛn den?
2 Asɛnka Hyɛ Yɛn Den na Yenya Nhyira Fi Mu: Asɛnka hyɛ yɛn nkuran ma yɛde yɛn adwene si Ahenni nhyira horow so sen sɛ yɛde besi ɔhaw a yehyia nnɛ no so. (2 Kor. 4:18) Bible no a yɛkyerɛkyerɛ mu kyerɛ afoforo no hyɛ gyidi a yɛwɔ wɔ Yehowa bɔhyɛ ahorow mu no mu den, na ɛma anisɔ a yɛwɔ ma nokware no yɛ kɛse. (Yes. 65:13, 14) Sɛ yɛboa afoforo ma wɔhyɛ wɔne Yehowa ntam abusuabɔ mu den sɛnea ɛbɛyɛ a ‘wɔrenyɛ wiase no fã’ a, ɛhyɛ yɛn bo a yɛasi sɛ yɛbɛtwe yɛn ho afi wiase no ho no mu den.—Yoh. 17:14, 16; Rom. 12:2.
3. Ɔkwan bɛn so na yɛn asɛnka adwuma no boa ma yenya Kristofo su ahorow?
3 Asɛnka adwuma a yɛyɛ no boa ma yenya Kristofo su ahorow. Sɛ nhwɛso no, bere a yɛbɔ mmɔden sɛ ‘yɛbɛyɛ biribiara ama nnipa ahorow nyinaa’ no, ɛboa ma yɛda ahobrɛase adi kɛse. (1 Kor. 9:19-23) Sɛ yɛkasa kyerɛ wɔn a wɔte sɛ “nguan a wonni hwɛfo a wɔapirapira wɔn agyaw wɔn agu hɔ” no a, ɛma yesua sɛ yɛbɛda mmɔborohunu ne tema adi. (Mat. 9:36) Sɛ yegyina ɔsɔretia anaa anibiannaso a wɔda no adi kyerɛ yɛn no ano a, ɛma yesua boasetɔ. Sɛ yetu yɛn ho ma na yɛboa afoforo a, ɛma yɛn anigye yɛ kɛse.—Aso. 20:35.
4. Wote nka dɛn wɔ asɛnka adwuma a woyɛ no ho?
4 Hwɛ nhyira ara a yenya sɛ yɛyɛ asɛnka adwuma a ɛma yeyi nea Ne nkutoo fata sɛ yɛsom no no ayɛ! Asɛnka adwuma no hyɛ yɛn den. Ɛma yɛn a yɛde yɛn ho nyinaa ama sɛ ‘yebedi asɛmpa no ho adanse fefeefe’ no nya nhyira pii.—Aso. 20:24.