Ɛnyɛ Homeda A Wogu Ho Fĩ

YEHOWA ADANSEFO kɔ nkurɔfo nkyɛn wɔ wɔn afi mu ne wɔn kɔbɔ Bible mu nkɔmmɔ da biara wɔ dapɛn no mu. Wɔ eyi mu no, wosuasua Yesu Kristo ne n’asuafo no.

Mpɛn pii no, ɔmanfo binom akasa atia Adansefo no sɛ ‘wɔregu Homeda no ho fĩ,’ esiane sɛ wɔkɔ afie afie Kwasida nti. Asennibea ahorow no abu asɛm yi dɛn? Nea ɛyɛ titiriw ne nsɛm a edidi so a efi Asennii Kunini a ɛwɔ Iowa hɔ no:

“Yensiesiee yɛn ho sɛ yebegye atom sɛ, sɛ́ wɔbɛkɔ obi fie Homeda, ɛmfa ho sɛ wɔannye onii ko a ɔkɔɔ fie hɔ no antom no ankasa no kyerɛ sɛ wɔregu Homeda no ho fĩ.”

Na nhoma a ɛka Bible mu asɛm a wɔde bɛma agye ɛbo bi no nso ɛ? So ɛno yɛ ade a ‘wɔretɔn no Homeda? Wɔ eyi mu no, asennifo no kɔɔ so kae sɛ:

“Na [Adansefo] no rekyerɛkyerɛ na wɔretrɛw wɔn nyamesom mu adwenhorow no mu a wonnye hwee a wɔde wɔn ankasa ahoɔden reyɛ. . . .Na biribi a ɛte sɛ aguadi nnim. Yensusuw sɛ mmara no kyerɛ sɛ nhomawa ahorow a ɛtete sɛɛ a wɔkyekyɛ no saa kwan yi so no yɛ Homeda a wɔregu ho fi.”​—Asɛm a Ɔman no ne Mead dii wɔ Iowa Asennibea Kunini no, 1941.