Dɛn Nti Na Onyankopɔn Ma Nsɛmmɔnedi Ho Kwan?

Sɛ ɔyɛ ade nyinaa so tumfoɔ a, anka obetumi ama agyae. Sɛ ɔyɛ ɔdɔ a, dɛn nti na ɔmma ennyae?

Eyi yɛ te sɛ nea ɛyɛ mmerɛw na ɛteɛ ma wɔn a wobisa asɛm, Dɛn nti na Onyankopɔn ma nsɛmmɔnedi ho kwan? no.

Nanso ɛnyɛ mmerɛw saa. So wɔn a wobisa asɛm no pɛ sɛ wobegye ano aduru no atom? Ɛnyɛ nsɛmmɔnedi ankasa na ɛba. Nsɛmmɔnedi yɛ ade bi a ɛnam nneɛma bi a wɔyɛ so ba. Dɛn ne nneɛma a ɛde ba no? Sɛ ɛsɛ sɛ nsɛmmɔnedi fi hɔ a, saa ara na ɛsɛ sɛ nea ɛde ba no fi hɔ.

Henanom na wɔde anaasɛ dɛn na ɛde nsɛmmɔnedi ba? Na enti, henanom ne dɛn na ɛsɛ sɛ Onyankopɔn yi fi hɔ de ma nsɛmmɔnedi a wama ho kwan no ba awiei, sɛnea ɛda adi sɛ nsemmisafo yi pɛ sɛ ɔyɛ no?

Asɛm no nyɛ mmerɛw koraa saa, anaa ɛyɛ mmerɛw? Ehia sɛ yesusuw nsemmisa afoforo ho: Ɔma nsɛmmɔnedi ho kwan, nanso henanom na wodi nsɛmmɔne? Obetumi ama agyae, nanso sɛ ɔyɛ saa ɛ? Bere a ɛkɔ so no, dɛn na ebetumi akyerɛ yɛn? Awiei koraa no, dɛn nti na ɔma ho kwan, na so ɔbɛma agyae da bi?

Nkratafa awotwe a edidi so yi pɛɛpɛɛ nsemmisa yi, ne nkyerɛkyerɛmu ahorow ne nneɛma ahorow a efi mu ba mu.