Honhom Soronko

YƐRENTUMI nnye akyinnye sɛ wɔ afeha a edi kan no mu no, Onyankopɔn honhom kronkron no yɛɛ adwuma. Ɔkwan biako a ɛnam so daa ne ho adi ne ma a ɛmaa Onyankopɔn asomfo no bi tumi ahorow a na afoforo nni bi no. Na tumi a wɔde ‘ka kasa horow’ yɛ eyinom mu biako.

Nanso bere a wɔmaa ankorankoro tumi ma wɔkaa kasa horow a wonsuae pɛn no, afoforo a wɔka saa kasa no tumi tee nea wɔkae no ase. Sɛ nhwɛso no, wɔn a wɔtee sɛ wɔreka kasa horow Pentekoste da no kae sɛ: “Ɛyɛɛ dɛn na yɛn nyinaa te yɛn ankasa kasa a wɔwoo yɛn mu yi? . . . yɛte sɛ wɔde yɛn kasa ka Onyankopɔn ade kɛse.”​—Asomafo no Nnwuma 2:5-11.

Bere a Kristofo ahyiam no, ɔsomafo Paulo kae sɛ: “Sɛ obi kasa kasa bi a, ɛnyɛ nnipa baanu, ɛtra so a, baasa, na wɔnka no mmiako mmiako, na obiako nkyerɛ ase. Na sɛ asekyerɛni bi nni hɔ a, ommua n’ano asafo no mu.” (1 Korintofo 14:27, 28) Hwɛ sɛnea eyi yɛ soronko wɔ nnɛyi kasa horow ne honhom ayaresafo a wɔn nyinaa kasa prɛko pɛ, wɔ kasa horow a obiara ntumi nte ase anaa obiara ntumi nkyerɛ ase no ho!

Ná tumi a wɔde ka kasa horow no yɛ honhom kronkron “akyɛde ahorow” no biako a wɔde maa afeha a edi kan Kristofo no na aboa nkurɔfo ma wɔahu ahyehyɛde a na Onyankopɔn de redi dwuma no. Na saa “akyɛde” pɔtee yi nso boae ma wɔkaa “asɛmpa” no kyerɛɛ nnipa a wɔka kasa ahorow.

Bio nso, wɔn a wonyaa honhom kronkron saa bere no bi nyaa tumi de nyan awufo nso. (Asomafo no Nnwuma 9:36-41; 20:7-12) Sɛ ɛyɛ honhom koro no ara na ɛreyɛ adwuma nnɛ a, ɛnde na ɛsɛ sɛ kasa horow ne honhom ayaresafo nso nya saa tumi no. Nanso wonni bi. Enti, ɛda adi sɛ “honhom” a ɛma wɔyɛ nea ɛte sɛ anwonwa kwan so nneɛma wɔ kasa horow ne honhom ayaresafo mu no nyɛ honhom a efi Onyankopɔn hɔ a ɛdaa adi wɔ afeha a edi kan Kristofo mu no.