Asiane A Ɛwɔ Tawanom Mu Ma Wɔn A Wɔnom Ne Wɔn A Wɔnnom
Wɔda so ara renya adanse a ɛkyerɛ sɛnea tawa pira wɔn a wɔnom ne wɔn a wɔnnom bi nyinaa. Susuw nea edidi so yi ho:
■ Tawa Mmom na Ɛnyɛ Aduan
World Health nsɛmma nhoma no se: “Wobetumi ahyɛ nkɔm sɛ ahurututu mu akisikuru bɛyɛ ɔyaredɔm wɔ aman a ɛrenya nkɔso pii mu wɔ mfe du mu”. Amanaman Nkabom no Aduan ne Kuadwuma ahyehyɛde no de ka ho sɛ tawanom “da so ara kɔ soro ɔha biara mu 2.1 afe biara wɔ Wiase Aman a Ɛto so Abiɛsa no mu.” Mprempren, wiase nyinaa tawa no mu ɔha biara mu 63 na wodua wɔ hɔ na akɔ soro fi ɔha mu 50 bɛyɛ mfe 25 ni. Sɛnea nneɛma rekɔ so yi de saa aman a afei na wɔrenya nkɔso no to asiane mu. London atesɛm krataa The Times kyerɛkyerɛ nea enti a ɛte saa no mu: “Tawa ho adwumayɛ a wogye tom wɔ Wiase Aman a Ɛto so Abiɛsa no mu sɛ ɛde sika ba no rema akisikuru akɔ anim, ɛma wɔsɛe kwae na egye asase a anka wobetumi de adua nnuan a wohia nna wɔadi wɔ ɔman no mu no.”
■ Wusiw ne Akisikuru
Wɔ 1986 mu no, wɔ Amanaman Ntam Akisikuru ho Nhyiam a Ɛto so 14 a wɔyɛe wɔ Hungary ase no, abenfo buu ano sɛ nnipa 3,500,000 na akisikuru bekunkum wɔn saa afe no mu. Germanfo nnuruyɛ ho krataa Ärztliche Praxis bɔ amanneɛ sɛ: “Sɛnea WHO (Wiase Nyinaa Akwahosan Ahyehyɛde) no akontaabu kyerɛ no, sigaretnom na ebekunkum saafo a wobewuwu yi mu ɔpepem biako.”
Sir Richard Doll a ɔyɛ nnuruyɛ mu ɔbenfo a na anka ɔwɔ Oxford Sukuupɔn mu a mprempren onyin ama wagyae adwuma no bɔɔ kɔkɔ sɛ nnuru ahorow 3,800 a ɛwɔ tawa wusiw mu no mu 50 na wɔabu sɛ ɛma mmoa nya akisikuru. Wɔahu sɛ saa nnuru ahorow yi mu pii wɔ sigaret wusiw a wɔntwe nkɔ wɔn mu no mu. Wɔ saa kwan no so no, sigaretnomfo de nneɛma ahorow a ebetumi ama obi anya akisikuru ma afoforo a wɔn ankasa nnom bi no. Britania nhwehwɛmu bi a wɔyɛe wɔ wɔn a wɔnnom sigaret a wɔne sigaretnomfo te ho no kyerɛe sɛ na wɔn a ahurututu mu akisikuru akum wɔn no mu baanu biara mu biako nnom sigaret.
United States oduruyɛfo panyin hyɛɛ adwumakuw ahorow sɛ wɔnhwehwɛ adwumayɛbea ahorow a wɔnnom sigaret wɔ hɔ mma wɔn a wɔnnom no. Wɔ n’amanneɛbɔ a ɔde mae wɔ 1986 mu a ɛfa sɛnea sigaretnom ka akwahosan mu no, ɔkae sɛ: “Sigaretnom tumi ma wɔn a wɔnnom sigaret a wɔte apɔw nya ɔyare a akisikuru ka ho,” na “ebia tetew a wɔbɛtetew sigaretnomfo ne wɔn a wɔnnom sigaret no ntam ara kwa wɔ baabi a mframa koro no ara nam hɔ no bɛma tawa wusiw a ɛkɔ wɔn a wɔnnom sigaret mu no so atew nanso ɛrennyi mfi hɔ.”
■ Ɛka Abofraa a Wɔnwoo No . . .
Nnuruyɛ mu nhwehwɛmu kuw bi a wofi Sydney Sukuupɔn a ɛwɔ Australia no ka sɛ sigaretnom mma mmofraa a wɔwɔ awotwaa mu no nnya aduannuru a wohia no. Ná nhwehwɛmufo no resua sɛnea sigaretnom ka mogyaa ɛkɔ awo akyi ade no mu bere a ɛwɔ awotwaa no mu no—akwaa a ɛma abofraa a wonya nwoo no no nya aduan ne oxygen na eyi nea wɔmpɛ no fa funuma no mu gu no ho ade. Bere a nhwehwɛmufo no ahwɛ sɛnea mogya no bɔ fa funuma no mu akyi no, wohui sɛ wɔ bere a ɛna no anom sigaret no akyi simma abien pɛ no, sɛnea mogya no sen no ano brɛ ase, na ka a ɛka no no kɔ so bɛyɛ dɔnhwerew biako.
Sɛnea wɔbɔɔ amanneɛ wɔ The University of Science News mu no, Oduruyɛfo Brian Trudinger a ɔyɛ awo ne nyinsɛn ho adesua ho ɔkyerɛkyerɛfo panyin no kae sɛ: “Sɛ wɔkyekyem a, ɛnanom a wɔnom sigaret du da biara wɔ nyinsɛn bere no mu no mma no mu duru nnu wɔn a wɔnnom sigaret no mma. Nanso besi saa bere yi no na anka wobetumi aka sɛ wɔ ɔkwan bi so no eyi fi sigaretnomfo no na ɛnyɛ ɛnyɛ sigaretnom no—ebia na ɛna a ɔnom sigaret wɔ nyinsɛn bere mu no wɔ nsɛnnennen afoforo a amma ne ba no anyɛ kɛse. Nanso, yɛn nhwehwɛmu no kyerɛ pefee sɛ sigaretnom ka abofra no tẽẽ denam mogya a efi ne mu kɔ awo akyi ade no mu bere a ɛwɔ awotwaa no mu a ɛma so tew no so.”
Afei nso, Britania nnuruyɛ ho nsɛmma nhoma The Lancet no kyerɛw nea wohui wɔ mmofraase akisikuru mu nhwehwɛmu ho nnansa yi no. Nhwehwɛmu no hui sɛ sigaret dodow a ɛna bi nom wɔ nyinsɛn bere mu no, dodow no ara na ne ba no betumi anya akisikuru. The Lancet bɔɔ amanneɛ sɛ: “Bere a wɔhwɛɛ mmeae ahorow ahorow a nyarewa kɔ so wɔ nipadua mu no mu no, wohui sɛ mmofra wɔnom sigaret du anaa nea ɛboro saa gu wɔn so wɔ nyinsɛn be mu no asiane a wɔwɔ sɛ akisikuru bɛka wɔn no kɔɔ anim ɔha biara mu 50.”
Bere a wɔawo mmofra a wɔn nanom nom sigaret no akyi no, wohyia akwahosan mu asiane afoforo The Lancet nsɛmma nhoma no foforo bi a ɛbae kae sɛ: “Nhwehwɛmu akyerɛ abusuabɔ tẽẽ a ɛda sigaret a mmofra ankasa nnom ne mmofra ntehyewa, ateetee a ennyae, ne ɔhome mu nyarewa ahorow wɔ asetra afe a edi kan ne nea ɛto so abien no mu.”
■ Ka a Sigaretnom Bɔ wɔ Adwumayɛbea
New South Wales Health Surveyors’ Association a ɛwɔ Australia no kyerɛ mu sɛ sigaretnomfo mu biako biara bɔ n’adwumawuranom ka U.S. dɔla 2,650 afe biara. Kuw no de nea ɛka eyi gyina adanse a ɛkyerɛ sɛ sigaretnomfo taa yare da fie a wɔnkɔ adwuma sen wɔn a wɔnnom sigaret na wohyia asiane ahorow mmɔho abien no so. Kuw no se wɔn a wɔnom sigaret no betumi ahyia asiane pii esiane wusiw a ɛkɔ adwumayɛfo no ani anaasɛ esiane sɛ sigaretnomfo no de wɔn saa biako reyɛ adwuma bere a foforo no nso kura sigaret nti.