Wɔtwɛnee wɔ Yerusalem

NNIPA a wɔwɔ ha yi yɛ Yesu akyidifo. Wotiee no na wɔtraa Yerusalem. Na bere a wɔn nyinaa retwɛn no, nnyigyei kɛse bi baa dan mu hɔ. Na ɛte sɛ mframa a ano yɛ den a ɛrebɔ. Na afei ogya tɛkrɛma besisii asuafo no nyinaa atifi. Wuhu ogya a ɛwɔ wɔn mu biara atifi no? Dɛn na eyi nyinaa kyerɛ?

Anwonwade bɛn ni! Ná Yesu asan kɔ n’Agya nkyɛn wɔ soro, na wahwie Onyankopɔn honhom kronkron agu n’akyidifo so. Wunim nea honhom no ma wɔyɛe? Wɔn nyinaa fii ase kaa kasa foforo.

Nnipa pii a wɔwɔ Yerusalem tee nnyigyei a ɛte sɛ mframa a ano yɛ den no, na wɔbae sɛ wɔbɛhwɛ nea ɛrekɔ so. Ná nnipa no binom fi aman afoforo so aba ha esiane Israelfo Pentekoste afahyɛ no nti. Na ahɔho yi ho dwiriw wɔn! Wɔtee sɛ asuafo no reka nneɛma a ɛyɛ nwonwa a Onyankopɔn ayɛ ho asɛm wɔ wɔn kurom kasa mu.

Ahɔho no kae sɛ: ‘Nkurɔfo yi yɛ Galileafo. Na ɛyɛɛ dɛn na wotumi ka kasa afoforo a ɛyɛ aman a yefi so bae no mufo kasa yi?’

Afei Petro sɔre gyina kyerɛkyerɛɛ mu kyerɛɛ wɔn. Ɔmaa ne nne so kaa sɛnea wokum Yesu na Yehowa nyan no fii awufo mu no ho asɛm. Petro kae sɛ: ‘Afei Yesu wɔ soro wɔ Onyankopɔn nifa. Ɔno na wahwie honhom kronkron a ɔhyɛɛ ho bɔ no agu. Ɛno nti na moahu na moate nneɛma a ɛyɛ nwonwa yi.’

Na, bere a Petro kaa saa asɛm yi no, ɛyɛɛ nnipa binom yaw sɛ wɔyɛɛ Yesu saa. Wobisae sɛ: ‘Yɛnyɛ dɛn?’ Na Petro ka kyerɛɛ wɔn sɛ: ‘Ɛsɛ sɛ mosakra mo abrabɔ na wɔbɔ mo asu.’ Enti saa da no ara wɔbɔɔ nnipa 3,000 asu ma wɔbɛyɛɛ Yesu akyidifo.