TI 37
Ɛsɛ Sɛ Mebɔ Asu Anaa?
Fa pɛn anaa pɛnsere san nsɛm a edidi so yi ho fa kyerɛ sɛ ɛyɛ ampa anaa atoro:
Ɛsɛ sɛ Kristoni biara bɔ asu.
□ Ampa
□ Atoro
Nea enti paa a yɛbɔ asu ne sɛ ɛbɛbɔ yɛn ho ban na yɛanyɛ bɔne.
□ Ampa
□ Atoro
Sɛ wobɔ asu a, ɛkyerɛ sɛ woasi nkwagye kwan so.
□ Ampa
□ Atoro
Sɛ wommɔɔ asu a, Onyankopɔn ne wo nni asɛm.
□ Ampa
□ Atoro
Sɛ wo nnamfo rebɔ asu a, ɛkyerɛ sɛ bere aso sɛ wo nso wobɔ asu.
□ Ampa
□ Atoro
SƐ WODE Onyankopɔn Asɛm bɔ wo bra, na wo ne Onyankopɔn fa adamfo, na woka wo gyidi ho asɛm kyerɛ nkurɔfo a, wo ara wo koma bɛka wo sɛ yɛ na bɔ asu. Nanso wobɛyɛ dɛn ahu sɛ woayɛ krado sɛ wobɔ asu? Nsɛm a wɔakyerɛ sɛ yɛmfa pɛn anaa pɛnsere nkyerɛ sɛ ɛyɛ ampa anaa atoro wɔ soro hɔ no, sɛ yesusuw ho a, ebetumi aboa yɛn ama yɛanya asɛmmisa yi ho mmuae.
● Ɛsɛ sɛ Kristoni biara bɔ asu.
Ampa. Yesu kaa sɛ n’akyidifo mmɔ asu. (Mateo 28:19, 20) Nea ɛwom ne sɛ, Yesu ankasa nso, ɔma wɔbɔɔ no asu. Enti wo nso, sɛ wopɛ sɛ wusuasua Kristo a, ɛnde ɛsɛ sɛ wobɔ asu. Ɛsɛ sɛ woyɛ saa bere a woadu mpɛnpɛnso a wubetumi asi saa gyinae no, na wo koma ka wo sɛ bɔ asu.
● Nea enti paa a yɛbɔ asu ne sɛ ɛbɛbɔ yɛn ho ban na yɛanyɛ bɔne.
Atoro. Sɛ wobɔ asu a, na worema obiara ahu sɛ woahyira wo ho so ama Yehowa. Sɛ wuhyira wo ho so a, ɛnte sɛ krataa bi a wode wo nsa rekɔhyɛ ase de akyerɛ sɛ worenyɛ biribi a wo koma mu de wunyae a anka wobɛyɛ. Mmom, ɛkyerɛ sɛ wopɛ sɛ wode Yehowa akwankyerɛ bɔ wo bra, enti wode wo ho nyinaa ama no anaa woahyira wo ho so ama no.
● Sɛ wobɔ asu a, ɛkyerɛ sɛ woasi nkwagye kwan so.
Ampa. Bible ka sɛ, sɛ obi benya nkwagye a, ade baako a ɛho hia ne asubɔ. (1 Petro 3:21) Nanso asubɔ nte sɛ nsiakyibaa anaa nhyɔɔrans a woreyɛ na sɛ atoyerɛnkyɛm bi si a, abɔ wo ho ban. Mmom sɛ wodɔ Yehowa, na wopɛ sɛ wufi wo koma mu nyinaa som no daa a, ɛno na ɛsɛ sɛ ɛka wo ma wobɔ asu.—Marko 12:29, 30.
● Sɛ wommɔɔ asu a, Onyankopɔn ne wo nni asɛm.
Atoro. Yakobo 4:17 ka sɛ: “Sɛ obi nim adepa na wanyɛ a, ɛyɛ bɔne ma no.” Sɛ woabɔ asu o, sɛ wommɔɔ asu o, saa asɛm no kɔ ma wo. Enti sɛ wunim nea ɛyɛ adepa, na woadu mpɛnpɛnso a wubetumi adwen nea wode w’abrabɔ bɛyɛ ho a, ɛnde ebia bere aso sɛ wo ne w’awofo anaa Kristoni a ne ho akokwaw bɛbɔ w’abrabɔ mu nkɔmmɔ. Woyɛ saa a, wubehu nea ɛsɛ sɛ woyɛ na ama woatumi afata sɛ wɔbɔ wo asu.
● Sɛ wo nnamfo rebɔ asu a, ɛkyerɛ sɛ wo nso wubetumi abɔ asu.
Atoro. Wo ara na ɛsɛ sɛ wufi wo koma mu si gyinae sɛ wobɛbɔ asu. (Dwom 110:3) Sɛ wobɛbɔ asu a, ɛsɛ sɛ wohwɛ hu sɛ wunim nea obi bɛyɛ Yehowa Danseni a ɛkyerɛ, na woasi w’adwene pi sɛ wobɛyɛ Yehowa Danseni.—Ɔsɛnkafo 5:4, 5.
Gyinae Kɛse
Asubɔ yɛ gyinae kɛse a ɛbɛsesa w’abrabɔ na ama woanya nhyira pii. Nanso, asɛde kɛse bi ka ho. Ɛne sɛ, ɛbɔ a woahyɛ Yehowa sɛ wobɛyɛ nea ɔpɛ bere nyinaa no, ɛsɛ sɛ wudi so.
Woayɛ krado sɛ wubehyira wo ho so ama Yehowa na woabɔ asu anaa? Sɛ saa a, ɛnde ma w’ani nnye. Afei koraa na worebenya akwannya kɛse. Ɛno ne sɛ, wubetumi afi wo koma nyinaa mu asom Yehowa, na wubenya kwan de w’abrabɔ akyerɛ sɛ ampa woahyira wo ho so ama no.—Mateo 22:36, 37.
Sua sɛnea wode botae besisi w’ani so, na ama woatumi de w’abrabɔ ayɛ nneɛma a ɛbɛma asi wo yiye.
KYERƐWNSƐM TITIRIW
“Momfa mo nipadua mmɔ afɔre a ɛte ase, a ɛyɛ kronkron, na ɛsɔ Onyankopɔn ani. Na bere a mode ɔsom kronn rema no no, momfa mo adwene nyɛ adwuma nsusuw nneɛma ho.”—Romafo 12:1.
NYANSAHYƐ
Ma w’awofo mmoa wo na hwehwɛ obi wɔ asafo no mu a obetumi aboa wo ama wode botae ahorow asisi w’ani so wɔ Yehowa som mu.—Asomafo Nnwuma 16:1-3.
WUNIM . . . ?
Sɛ wɔbɛhyɛ wo “agyirae” ama nkwagye a, asubɔ ka ho bi paa.—Hesekiel 9:4-6.
NEA WUBETUMI AYƐ!
Bible nkyerɛkyerɛ a edidi so yi, mɛyere me ho ate ase yiye na ama manya nkɔso abɔ asu: ․․․․․
Nea mepɛ sɛ mibisa m’awofo wɔ asɛm yi ho ne sɛ ․․․․․
WUDWEN HO SƐN?
● Adɛn nti na asubɔ yɛ aniberesɛm?
● Ɛdɛn na ebetumi ama abarimaa anaa abaayewa bi apepere ne ho akɔbɔ asu?
● Adɛn nti na abarimaa anaa abaayewa bi besi gyinae a nyansa nnim sɛ ɔrenhyira ne ho so mmɔ asu bere a anka obetumi ayɛ saa?
[Asɛm a wɔafa aka]
“Esiane sɛ na mabɔ asu nti, ɛboaa me ma misisii gyinae pa, na amma manyɛ nneɛma bi a anka ɛde ɔhaw bɛbrɛ me.”—Holly
[Adaka/Mfoni]
Nsɛm a Nkurɔfo Taa Bisa Fa Asubɔ Ho
Sɛ wobɔ asu a, ɛkyerɛ sɛn? Sɛ yɛrebɔ wo asu na yɛde wo hyɛ nsu mu pue a, ɛkyerɛ sɛ, efi saa bere no rekɔ no, worenyɛ nea wo ara wopɛ bio. Ɛte sɛ nea wo ne wo suban dedaw no awu, ɛnna afei wɔanyan wo sɛ bɛyɛ nea Yehowa pɛ.
Yɛka sɛ woahyira wo nkwa so ama Yehowa a, ɛkyerɛ sɛn? Nea ɛkyerɛ ne sɛ, worenyɛ nea wo ara wopɛ bio, na mmom woahyɛ bɔ sɛ biribiara mu wubedi kan ayɛ nea Onyankopɔn pɛ. (Mateo 16:24) Ne papa mu no, ɛsɛ sɛ wudi kan bɔ Yehowa mpae na wuhyira wo ho so ma no ansa na woabɔ asu.
Sɛn na ɛsɛ sɛ wobɔ wo bra ansa na wɔabɔ wo asu? Nea Onyankopɔn Asɛm ka no, ɛsɛ sɛ wode bɔ wo bra, na woka wo gyidi ho asɛm kyerɛ nkurɔfo. Afei ɛsɛ sɛ wobɔ mmɔden sɛ wobɛfa Onyankopɔn adamfo. Wubetumi ayɛ wei a, gye sɛ wobɔ no mpae na wusua n’Asɛm Bible no. Wo ara na ɛsɛ sɛ wusi gyinae sɛ wobɛsom Yehowa. Ɛnsɛ sɛ woma nkurɔfo hyɛ wo ma woyɛ saa.
Ɛsɛ sɛ wunya mfe sɛn ansa na woabɔ asu? Ɛnyɛ mfe a woadi nko ara na ɛbɛkyerɛ sɛ wubetumi abɔ asu anaa worentumi mmɔ asu. Nanso ɛsɛ sɛ wunyin sɛnea ɛsɛ, na wutumi dwen nneɛma ho yiye, sɛnea ɛbɛyɛ a wubehu nea enti a worehyira wo ho so.
Na sɛ wopɛ sɛ wobɔ asu na w’awofo ka sɛ twɛn kakra ɛ? Ebia wɔpɛ sɛ wunya suahu na woatumi abɔ wo bra sɛ Kristoni. Fa wɔn afotu no asɛnhia, na fa bere a wode retwɛn no hyɛ wo ne Yehowa adamfofa no mu den.—1 Samuel 2:26.
[Adaka]
Dwumadi krataa
Woredwen Ho Sɛ Wobɛbɔ Asu Anaa?
Sɛ wopɛ sɛ wuhu sɛ wubetumi abɔ asu a, dwennwen nsɛmmisa ne nsɛm a ɛwɔ ase ha no ho. Bɔ mmɔden sɛ wobɛkan kyerɛwsɛm a ɛhyɛ ho no ansa na woakyerɛw wo mmuae.
Nneɛma bɛn na seesei woyɛ de kyerɛ sɛ wugye Yehowa di paa?—Dwom 71:5. ․․․․․
Dɛn na woayɛ de akyerɛ sɛ woatete w’adwene ama etumi hu nsonsonoe a ɛda papa ne bɔne ntam?—Hebrifo 5:14. ․․․․․
Mpɛn ahe na wobɔ mpae? ․․․․․
Sɛ worebɔ mpae a, ɛyɛ a woka nneɛma pɔtee bi ho asɛm anaa? Mpae a wobɔ no, ɛma wuhu sɛ wodɔ Yehowa paa, anaasɛ aka kakra?—Dwom 17:6. ․․․․․
Botae ahorow a wode asisi w’ani so afa mpaebɔ ho no, kyerɛw wɔ ha. ․․․․․
Mpɛn dodow sɛn na ɛyɛ a wo ara wugye bere sua Bible?—Yosua 1:8. ․․․․․
Sɛ wo nko ara woresua ade a, dɛn ne dɛn na ɛyɛ a wusua? ․․․․․
Nneɛma a wode asi w’ani so sɛ wobɛyɛ bere a wo nko ara woresua ade no, kyerɛw wɔ ase ha. ․․․․․
Ɛyɛ a wutumi yɛ asɛnka adwuma no yiye? (Sɛ yɛbɛyɛ nhwɛso a: Bible nkyerɛkyerɛ atitiriw no, wubetumi akyerɛkyerɛ mu akyerɛ obi? Nkurɔfo kyerɛ asɛm no ho anigye a, ɛyɛ a wosan kɔsra wɔn? Woreyɛ nea wubetumi biara sɛ wubenya obi ne no asua Bible?)
□ Aane □ Daabi
Sɛ wo maame ne wo papa ankɔ asɛnka mpo a, ɛyɛ a wokɔ?—Asomafo Nnwuma 5:42.
□ Aane □ Daabi
Botae ahorow a wode asisi w’ani so afa asɛnka ho no, kyerɛw wɔ ha.—2 Timoteo 2:15. ․․․․․
Ɛyɛ a wokɔ Kristofo nhyiam daa, anaa ɛtɔ da a wonkɔ?—Hebrifo 10:25. ․․․․․
Sɛ wokɔ Kristofo nhyiam a, nneɛma bɛn na woyɛ de kyerɛ sɛ wode wo ho hyɛ adesua no mu? ․․․․․
Sɛ w’awofo antumi ankɔ Kristofo nhyiam a, (na sɛ wɔma wo kwan sɛ kɔ a) ɛyɛ a wokɔ?
□ Aane □ Daabi
Wubetumi aka sɛ w’ani gye ho paa sɛ wode Onyankopɔn akwankyerɛ bɛbɔ wo bra?—Dwom 40:8.
□ Aane □ Daabi
Wubetumi akyerɛw mmere pɔtee bi a w’atipɛnfo hyɛɛ wo sɛ yɛ biribi nso wanyɛ?—Romafo 12:2. ․․․․․
Nhyehyɛe bɛn na wode agu akwan mu a ɛbɛma ɔdɔ a wowɔ ma Yehowa no ayɛ kɛse?—Yuda 20, 21. ․․․․․
Sɛ mpo w’awofo ne wo nnamfofo gyae Yehowa som a, wobɛkɔ so asom Yehowa anaa?—Mateo 10:36, 37.
□ Aane □ Daabi
[Mfoni]
Asubɔ te sɛ aware. Ɛyɛ gyinae kɛse a ɛsɛ sɛ obiara fa no aniberesɛm