Akwansrafo Dumienu

Bere a Israelfo no tu fii Sinai Bepɔw ho no, wɔfaa Paran sare anaa asaase so kɔɔ baabi a yɛfrɛ hɔ Kades. Ɛhɔ na Yehowa ka kyerɛɛ Mose sɛ: ‘Kaanan asaase a mede bɛma Israelfo no, soma mmarima 12 na wɔnkɔhwɛ hɔ. Yi ɔbarima baako fi abusua biara mu.’ Enti Mose yii mmarima 12, na ɔka kyerɛɛ wɔn sɛ: ‘Monkɔ Kaanan nkɔhwɛ sɛ, sɛ wɔdua aduan wɔ asaase no so a ɛbɛyɛ yiye anaa. Ɛyɛ a, monhwɛ sɛ nkurɔfo no ho yɛ den anaa wɔn ho nyɛ den. Afei monhwɛ sɛ wɔte ntamadan mu anaa nkurow akɛse mu.’ Ná Yosua ne Kaleb ka akwansrafo 12 no ho. Na wɔsii mu kɔɔ Kaanan.

Nna mmaako mmaako 40 akyi no, akwansrafo no bae. Wɔde borɔdɔma, granate akutu, ne bobe fi hɔ bae. Akwansrafo no bɛbɔɔ amanneɛ sɛ: ‘Asaase no de, ɛyɛ papa nanso nkurɔfo no ho yɛ den na wɔn nkurow no afasu nso yɛ atenten.’ Afei Kaleb kaa sɛ: ‘Yebetumi adi wɔn so nkonim. Enti momma yɛnkɔ wɔn so seesei ara!’ Wunim nea enti a Kaleb kaa saa? Efisɛ na Kaleb ne Yosua gye Yehowa di. Nanso akwansrafo du a aka no kaa sɛ: ‘Daabi! Nkurɔfo no soso woware te sɛ abran! Yɛyɛɛ nketenkete te sɛ mmɛbɛ wɔ wɔn ani so.’

Israelfo no abam bui. Wɔfii ase kasakasae. Wɔka kyerɛɛ wɔn ho sɛ: ‘Momma yenyi onipa foforo nni yɛn anim na yɛnsan nkɔ Egypt. Adɛn nti na ɛsɛ sɛ yɛkɔ Kaanan ma ɛhɔfo kunkum yɛn?’ Yosua ne Kaleb kaa sɛ: ‘Mma monyɛ Yehowa so asoɔden. Ɛnsɛ sɛ musuro. Yehowa bɛbɔ yɛn ho ban.’ Nanso Israelfo no antie. Ná wɔpɛ sɛ wɔkum Yosua ne Kaleb mpo!

Dɛn na Yehowa yɛe wɔ asɛm no ho? Ɔka kyerɛɛ Mose sɛ: ‘Nea mayɛ ama Israelfo nyinaa akyi no, wɔntie m’asɛm. Ɛno nti wɔbɛtena sare yi so mfe 40, na ɛha ara na wɔbewuwu. Israelfo mma nko ara, ne afei Yosua ne Kaleb na wɔbɛtena asaase a mede hyɛɛ wɔn bɔ no so.’