ADESUA 1

Ma Wo Nnianim Nsɛm Ntu Mpɔn

Asomafo Nnwuma 17:22

NSƐNTITIRIW: Ɛsɛ sɛ wo nnianim asɛm kanyan w’atiefo no anigye, ɛsɛ sɛ ɛma wohu nea worebɛka ho asɛm, ne nea enti a ɛsɛ sɛ wɔn ani gye asɛm a worebɛka no ho.

SƐNEA WOBƐYƐ NO:

Ma ɛnkanyan w’atiefo anigye. Paw asɛmmisa bi, asɛm bi a esii ankasa, kaseɛbɔ mu asɛm bi, anaa asɛm foforo bi a ɛbɛkanyan w’atiefo no anigye.

Di kan susuw ho hwɛ nea w’atiefo no ani gye ho ne wɔn haw ahorow, na nwene wo nnianim asɛm no fa ho.
Ma w’atiefo nhu nea worebɛka ho asɛm. Nea worebɛka ho asɛm ne nea enti a worebɛka no, hwɛ sɛ wo nnianim asɛm no bɛma emu ada hɔ pefee.
Ma w’atiefo nhu nea enti a asɛm a worebɛka no ho hia. Ma nea wobɛka no mfa w’atiefo no ahiade ho. Ɛsɛ sɛ woma nnianim asɛm no mu da hɔ pefee ma w’atiefo no hu sɛnea asɛm a worebɛka no bɛboa wɔn wɔ asetenam.

Sɛ woresiesie ɔkasa a, bisa wo ho sɛ, ‘Tebea bɛn na anuanom a wɔwɔ m’asafo mu no refa mu?’ Afei ka nnianim asɛm no ma ɛmfa atiefo no ahiade ho.