Paulo Ne Plato Ntam Akyinnyegye Wɔ Owusɔre No Ho

ƆSOMAFO Paulo kyerɛw owusɔre no ho asɛm wɔ 1 Korintofo 15:35-58 ne 2 Korintofo 5:1-10. Bere a ɔyɛɛ saa no, so odii Plato ne Helafo nyansapɛfo no ɔkra a enwu da no nsusuwii akyi, anaasɛ nea ɔkae no ne Yesu nkyerɛkyerɛ ne Kyerɛwnsɛm no mu nsɛm a aka no hyia?

Nhomawa a ɛne Immortality of the Soul or Resurrecution of the Individual: St. Paul’s View with Special Reference to Plato, a wɔkyerɛwee wɔ 1974 mu, a Amerika Kusuu Fam ne Kesee Fam Greek Orthodox Church no sɔfo panyin kyerɛw ne din wom de gye toom no de mmuae a ɛma wɔte asɛm no ase ma. Bere a nhoma no kyerɛwfo kaa sɛnea owusɔre no te wɔ kyerɛw nsɛm a wɔabobɔ din wɔ atifi hɔ no mu, ne bere no so Helafo nkɛntɛnso ho asɛm akyi no, ɔde baa awiei sɛ:

“Plato kyerɛkyerɛ sɛ ɔkra no kɔ so tra ase daa, a nipadua no nka ho. Plato ɔkra no fi awo mu nya asetra a owu nnim . . .Ɔhotefo Paulo nkyerɛkyerɛ adwene a ɛte saa na ɔnka nso sɛ ɔyɛ saa. . .

“Ɔkra anaa honhom a ɛyɛ nipadua no afa horow a enwu da a ɛsono emu biara no ho nhia ɔsomafo Paulo, na mmom onipa ɔkra-honhom nipadua mũ no nyinaa a ɛbom, a Kristo owusɔre no nti enya owusɔre no na na ɛho hia no.

Na adwene a Paulo wɔ wɔ owusɔre no mu nipadua ho no mfa adamoa mu afunu a wɔma ɛba nkwa mu no ho hwee.

“Wobetumi aka adwene a na ɔwɔ wɔ owusɔre no mu nipadua ho no ho asɛm yiye sɛ onipa mũ no nyinaa, onipa koro no ara, a ɔwɔ adwene ne nipadua mu su horow a ɛsakra, wɔbɔ no foforo, na wɔsan yɛ no foforo denam Onyankopɔn tumi so. Ɛnyɛ nneɛma a wɔde woo yɛn no nti na yebenya owusɔre, na mmom ɛyɛ anuonyam akyɛde a efi Onyankopɔn hɔ no nti.”

Yiw, asetra a owu nnim nyɛ ade a onipa biara nya fi awo mu. Mmom no, ɛyɛ ɔdom akyɛde a ɛsom bo a Yehowa nam yɛn Awurade Yesu Kristo so de ma wɔn a wɔka bom yɛ Kristofo asafo no.​—1 Korintofo 15:20, 57; Filipifo 3:14.

[Mfonini wɔ kratafa 9]

Helani nyansapɛ Plato

[Mfonini Fibea]

Vatican Museum photograph