BIBLE NSƐMMISA HO MMUAE

Dɛn na ɛbɛma awarefo ani agye?

Yehowa Nyankopɔn na ɔhyehyɛɛ aware, enti sɛ awarefo de n’afotu a ɛwɔ Bible mu yɛ adwuma a, ɛbɛma wɔn ani agye. Bible kyerɛkyerɛ yɛn ma yenya suban a ebetumi ama anigye aba aware mu, na ɛma yehu suban a ebetumi asɛe aware no. Afei nso ɛkyerɛkyerɛ yɛn sɛnea yɛbɛbɔ nkɔmmɔ ama anigye aba aware mu.​—Kenkan Kolosefo 3:8-10, 12-14.

Ɛsɛ sɛ ɔbarima di ne yere ni na obu no, na ɛsɛ sɛ ɔbea no nso yɛ ne kunu saa ara. Onyankopɔn akyerɛ nea ɛsɛ sɛ obiara yɛ wɔ aware mu, na sɛ obiara yɛ ne fam de a, ɛbɛma anigye aba aware no mu.​—Kenkan Kolosefo 3:18, 19.

Dɛn na ɛma aware tim?

Sɛ awarefo dodɔ wɔn ho a, ɛbɛma aware no atim. Onyankopɔn kyerɛkyerɛ yɛn ma yehu sɛnea yɛbɛdodɔ yɛn ho. Ɔne ne Ba Yesu ayɛ nhwɛso a edi mu de akyerɛ yɛn sɛnea yekum yɛn ho ma nnipa de kyerɛ sɛ yɛdɔ wɔn.​—Kenkan 1 Yohane 4:7, 8, 19.

Sɛ awarefo gye tom sɛ Onyankopɔn na ɔhyehyɛɛ aware a, wɔrennyae aware. Bere a Onyankopɔn hyehyɛɛ aware no, ɔyɛe sɛ, sɛ ɔbarima nya ware ɔbea a, ɛsɛ sɛ wɔtena daa na abɔ abusua no nyinaa ho ban. Aware betumi atim, efisɛ Onyankopɔn bɔɔ mmea kaa mmarima ho sɛ obiara mmoa ne yɔnko. Afei nso ɔbɔɔ wɔn nyinaa wɔ ne suban so, enti wobetumi asuasua ne dɔ no.​—Kenkan Genesis 1:27; 2:18, 24.