Onyankopɔn Betumi Akyekye Wo Werɛ

NEA ENTI A EBINOM NNYE NNI: Nnipa bi wɔ hɔ a, wɔn ho ka mu sɛ dɛn mpo a, ɛyɛ wɔn sɛ wobisa Onyankopɔn hɔ mmoa anaa awerɛkyekye a, ɛkyerɛ sɛ wɔyɛ pɛsɛmenkominya. Ɔbea warefo bi a wɔfrɛ no Raquel kaa sɛ: “Sɛ mehwɛ nnipa dodow a wɔwɔ wiase ne nneɛma a wɔrefa mu, na mede toto me de ho a, mihu sɛ me de no nnu baabiara. Enti ɛyɛ a mempɛ sɛ mɛsrɛ Onyankopɔn hɔ mmoa mpo.”

NEA ONYANKOPƆN ASƐM KA: Onyankopɔn adi kan ayɛ ade titiriw bi a aboa nnipa na akyekye yɛn werɛ. Obiara a ɔte ase nnɛ no, wɔwoo no bɔne mu. Ɛno kyerɛ sɛ, yɛyɛ dɛn ara a, yɛrentumi nyɛ Onyankopɔn apɛde pɛpɛɛpɛ da. Nanso, Onyankopɔn dɔɔ “yɛn na ɔsomaa ne Ba Yesu Kristo bae sɛ ɔmfa ne nkwa mmɛbɔ afɔre mpata mma yɛn bɔne.” (1 Yohane 4:10) Yesu afɔrebɔ wu no nti, yɛyɛ bɔne a, Onyankopɔn tumi de kyɛ yɛn. Afei nso yebetumi anya ahonim pa ne anidaso sɛ yɛbɛtena ase daa wɔ wiase foforo a asomdwoe wom mu.a Nanso, afɔre a Yesu bɔe no, nea ɛkyerɛ ara ne sɛ Onyankopɔn dwen adesamma nyinaa ho bom anaa? Anaasɛ odwen yɛn ho mmaako mmaako?

Ɔsomafo Paulo sei, n’ani sɔɔ Yesu afɔrebɔ no araa ma ɔkyerɛwee sɛ: “Mete . . . Onyankopɔn Ba a ɔdɔɔ me na ɔde ne ho too hɔ maa me no mu gyidi mu.” (Galatifo 2:20) Ɛwom, Yesu wui ansa na Paulo rebɛyɛ Kristoni. Nanso, Paulo buu saa afɔre no sɛ akyɛde a Onyankopɔn de ama ɔno Paulo.

Wo nso, Yesu afɔrebɔ wu no, hu no sɛ ɛyɛ akyɛde a Onyankopɔn de ama wo. Saa akyɛde no kyerɛ sɛ wo ho hia Onyankopɔn paa. Ebetumi ama woanya “daa awerɛkyekye ne anidaso pa” na ama woagyina “pintinn wɔ asɛm ne adwuma pa biara mu.”​—2 Tesalonikafo 2:16, 17.

Nanso, bɛyɛ mfe 2,000 ni a Yesu de ne nkwa bɛbɔɔ afɔre. Enti dɛn na ɛkyerɛ sɛ ɛnnɛ mpo, Onyankopɔn pɛ sɛ ɔne wo fa adamfo?