Obi wɔ Hɔ a, Ɔtie Mpaebɔ Anaa?

Ebinom susu sɛ mpaebɔ yɛ beresɛe, efisɛ obiara nni hɔ a ɔtie. Afoforo te nka sɛ wɔabɔ mpae saa ara nanso obiara ntie wɔn. Obi a ɔnnye nni sɛ Onyankopɔn wɔ hɔ de n’adwene buu sɛnea Onyankopɔn teɛ, na afei ɔbɔɔ mpae bi sɛ: “Wowɔ hɔ a, ka biribi gu m’asom.” Nso “budinn, mante hwee.”

Nanso Bible ma yɛn awerɛhyem sɛ, obi wɔ hɔ a ɔtie mpaebɔ. Ɔno ne Onyankopɔn, Otumfoɔ pumpuni no. Bere bi a atwam no, wɔkaa Bible mu asɛm yi kyerɛɛ nkurɔfo bi sɛ: “Wonya ma wo nne so su frɛ [Onyankopɔn] a, ɔbɛdom wo; ɔte ara pɛ a ɔbɛgye wo so.” (Yesaia 30:19) Kyerɛwsɛm foforo ka sɛ: “Teefoɔ mpaebɔ na n’ani gye ho.”—Mmebusɛm 15:8.

Wokenkan Bible a, wobɛhu sɛ wɔaka nnipa bi a Onyankopɔn tiee wɔn mpaebɔ ho asɛm. Bible ka wɔ baabi sɛ Yesu ‘de adesrɛ baa Deɛ na ɔbɛtumi agye no no anim, na ɔtiee no.’ (Hebrifoɔ 5:7) Yɛbɛtumi ahu nhwɛso foforo wɔ Daniel 9:21 ne 2 Berɛsosɛm 7:1.

Ɛnneɛ, adɛn nti na ebinom te nka sɛ wɔbɔ mpae a, wɔnnya ho mmuaeɛ? Sɛ yɛbɛnya yɛn mpaebɔ ho mmuaeɛ a, Onyankopɔn a Bible ka ne ho asɛm sɛ ɔne Yehowaa no, ɔno nko ara na ɛsɛ sɛ yɛbɔ no mpae, na ɛnyɛ onyame foforo bi anaa yɛn nananom. Yɛbɔ mpae a, Onyankopɔn pɛ sɛ yɛn abisadeɛ biara ne “n’apɛdeɛ” hyia. Onyankopɔn ma yɛn awerɛhyem sɛ sɛ yɛbɔ mpae ma ɛne n’apɛdeɛ hyia a, ‘ɔbɛtie yɛn.’ (1 Yohane 5:14) Enti, sɛ Onyankopɔn a Bible ka ne ho asɛm no bɛtie yɛn mpaebɔ a, ɛsɛ sɛ yɛsua Bible na yɛhu n’apɛde.

Nnipa pii gye tom sɛ mpaebɔ nnyɛ ɔsom mu amanneɛ bi kɛkɛ; mmom Onyankopɔn bi wɔ hɔ a ɔtie. Isaac fi Kenya, na ɔka sɛ: “Ná mepɛ sɛ mete Bible no ase, enti mebɔɔ mpae hwehwɛɛ mmoa. Ankyɛ koraa na menyaa me mpaebɔ no ho mmuaeɛ; obi bɛboaa me.” Hilda fi Philippines, na na ɔpɛ sɛ ɔgyae sigaretnom. Ɔyɛɛ biara sɛ ɔbɛgyae, nanso antentam. Afei ne kunu ka kyerɛɛ no sɛ, “Adɛn nti na wommɔ mpae nhwehwɛ Onyankopɔn mmoa?” Ɔtiee ne kunu, na ɔka sɛ: “Mmoa a Onyankopɔn de maa me deɛ, ɛsɛ w’ani. Afei deɛ na me kɔn nnɔ sigaret bio, enti metumi gyaee.”

Sɛ wopɛ sɛ woyɛ biribi a ɛne Onyankopɔn apɛde hyia a, wohwɛ a, ɔbɛboa wo anaa?