Asɛmpa A Wɔbɛka Akyerɛ—Denam Afoforo Ho Anigye A Yɛkyerɛkyerɛ So (Ɔfã. Ii)
1 Ná ɔbarima bi ne ne yere resusuw onua a ɔne wɔn yɛɛ Bible mu adesua ho. Onua no kɔɔ sukuu mfe anum pɛ, nanso na ɔbarima a ɔne no reyɛ adesua no asua nhoma akɔ anim yiye. Ɔbarima no kae sɛ: “Yɛn ani gyee ayamye ne ɔdɔ a na ɔwɔ, ne yɛn ho anigye a ɔkyerɛe no ho araa ma yɛpenee so sɛ yɛne no besua ade, ɛwom sɛ na onnim nhoma pii de.” Dɛn nti na onua yi tumi boaa obi a na wasua nhoma akɔ anim kɛse ne ne yere ma wohuu nokware no, ɛwom sɛ na onnim nhoma pii de? Efisɛ ɔkyerɛɛ wɔn ho anigye ankasa.
2 Ebinom aka sɛ: “Me ho nkokwawee wɔ nkurɔfo a wɔne wɔn kasa wɔ afie afie mu na ɛyɛ den ma me.” Ebia wo nso wote nka saa. Nanso, nkurɔfo ho anigye ankasa a wowɔ bɛboa wo ma wo ne wɔn akasa.
3 Sɛ wuhyia anoyi anaa nsemmisa ahorow a ɛyɛ den ma wo sɛ wubebua a, dɛn na woyɛ? Esiane ɔpɛ ankasa a wowɔ sɛ wobɛboa nnipa a woakasa akyerɛ wɔn nti, ebia wobɛkenkan asɛmti no ho nsɛm afoforo pii na woahyɛ kyerɛw nsɛm a esi so dua nsow, anaasɛ woahyɛ ɛho kyerɛw nsɛm a wɔahyehyɛ wɔ Bible mu Nsɛmti ma Nkɔmmɔbɔ mu no nsow. Yiw, akwan horow pii wɔ hɔ a yebetumi afa so akyerɛ afoforo ho anigye.
4 Sɛ́ anka wobɛka asɛm no nyinaa no, wonam nsemmisa so kyerɛ sɛ w’ani gye nea ofiewura no susuw ho. Nsemmisa ahorow bi wɔ hɔ a ɛma onii kyerɛ n’adwene (Wugye di sɛ Onyankopɔn de ne ho bɛhyɛ adesamma nsɛm mu?) , ebinom twe adwene kɔ nsɛm afoforo so (Dɛn na wususuw sɛ ɛne ade titiriw a ɛhaw mmusua nnɛ?) , ne nsemmisa bi te sɛ “Sɛ wowɔ tumi a, dɛn na anka wobɛyɛ de asakra tebea horow a ɛwɔ wiase?” Eyinom nyinaa yɛ nea yebetumi de adi dwuma yiye de ahu sɛnea obi susuw.
5 Nanso nsɛm a yebisa ho remma mfaso, sɛ yɛntwɛn ntie mmuae no a. Tie nea ɔka; fa wo ho si onii ananmu; bɔ mmɔden sɛ wobɛte no ase. Eyi kyerɛ sɛ wowɔ tema, na w’ani gye ne yiyedi ho na wopɛ sɛ woboa. Esiane sɛ adwene no susuw ade ho ntɛmntɛm nti, wubetumi anya bere asusuw nea ɔka no ho, na woahu mmuae a wode bɛma.
6 Sɛ edu bere a wobɛkasa a, hwehwɛ nneɛma a wubetumi ne ofiewura no ayɛ adwene wɔ ho. Nkeka nsɛm bi a ɛkyerɛ sɛ nea waka mprempren nyinaa ho nni mfaso wɔ w’ani so. Mmom no, ka asɛm a ɛkyerɛ sɛ w’ani sɔ sɛ woahu nea ofiewura no susuw. Bere koro no ara mu no boa no ma onhu ɛbo a Ahenni asɛm no som ne hia a ehia sɛ osua ɛho ade pii.
7 Baabi a wɔbɛkyerɛ anigye no, susuw onii ho bere a woafi hɔ no. Yɛ onii din ne asɛm a mobɔɔ ho nkɔmmɔ no ho kyerɛwtohɔ pa wɔ afie afie kyerɛwtohɔ kratasin so. Siesie wo ho na hwɛ sankɔhwɛ a wobɛkɔ akɔyɛ kwan, na ɛno bɛkyerɛ sɛ onii no ne ne daa yiyedi ho asɛm hia wo. (Marko 6:34) Eye sɛ yɛyɛ saa nneɛma yi, na yɛsrɛ Yehowa sɛ onhyira yɛn mmɔdenbɔ so.—1 Yoh. 3:22.
8 Yehowa ne Yesu kyerɛ yɛn ho anigye ankasa denam yɛn mpaebɔ a wotie, de yɛn bɔne firi yɛn, ma yɛn honhom mu nneɛma a yehia na wɔpɛɛpɛɛ yɛn koma mu no so. Yɛn nso yɛpɛ sɛ yɛkyerɛ afoforo ho anigye bere a yɛka asɛmpa no.