Wɔde Ademude Bi Ahyɛ Yɛn Nsa
1 Ná ɔsomafo Paulo bu ahyɛde a Onyankopɔn de ama no sɛ ɔnka asɛm no sɛ ɛsom bo, na ɔkaa ho asɛm sɛ ɛyɛ “ademude.” (2 Kor. 4:7) Ɔfaa ahokyere ne ɔtaa pii mu bere a ɔreka asɛm no. Ɔde nsi kaa asɛm no kyerɛɛ obiara a ohyiaa no. Ɔfaa po so ne asase so tutuu akwan pii a na ɛyɛ hu. Yɛbɛyɛ dɛn asuasua Paulo na yɛada no adi sɛ yɛn asɛnka adwuma no som bo ma yɛn? (Rom. 11:13) Dɛn na ɛma yɛn asɛnka adwuma no yɛ ademude a ɛkyɛn so?
2 Ademude a Ɛsen Biara: Mpɛn pii no, amanehunu bata ademude a wɔhwehwɛ wɔ asase so ho, na ɛso nni mfaso ahe biara. Nanso yɛn asɛnka adwuma no de, ɛma yɛne afoforo nya mfaso afebɔɔ. (1 Tim. 4:16) Ɛboa nnipa komapafo ma wohu Yehowa, wɔyɛ nsakrae a ehia wɔ wɔn asetra mu, na wonya daa nkwa ho anidaso ankasa. (Rom. 10:13-15) Sɛ yebu yɛn asɛnka adwuma no sɛ ɛsom bo paa a, yenya asetra a edi mu, akomatɔyam ankasa, ne daakye ho anidaso a ɛyɛ anigye.—1 Kor. 15:58.
3 Da no Adi sɛ W’ademude no Ho Hia Wo: Mpɛn pii no, nea yɛpɛ sɛ yɛde bɔ afɔre wɔ biribi ho no na ɛkyerɛ sɛnea ade no ho hia yɛn fa. Hwɛ hokwan ara a ɛyɛ sɛ yɛde yɛn bere ne yɛn ahoɔden beyi Yehowa ayɛ! (Efe. 5:16, 17) Ɛsɛ sɛ sɛnea yɛde yɛn bere di dwuma no da no adi sɛ honhom fam nneɛma ho hia yɛn sen honam fam de. Esiane sɛ yɛwɔ biribi a ɛsom bo paa nti, ɛsɛ sɛ yɛyɛ nsi wɔ asɛnka adwuma no mu, na yɛma yɛn ani da hɔ de hokwan biara a yebenya ka asɛm no.
4 Wɔntaa mfa ademude a ɛsom bo nsie, mmom no, wɔma nnipa nyinaa hu. Sɛ yebu yɛn asɛnka adwuma no sɛ ademude a, ɛbɛyɛ yɛn asetra mu ade titiriw. (Mat. 5:14-16) Momma yemfi yɛn koma nyinaa mu nsuasua ɔsomafo Paulo bere nyinaa na yɛmfa hokwan biara a yebenya nkyerɛ sɛ yebu yɛn asɛnka adwuma no sɛ ademude ankasa.