‘Momma Onyankopɔn Din Ho Ntew’
1. Dɛn ne ɔmansin nhyiam dwumadi a yɛbɛyɛ wɔ afe 2012 ɔsom afe mu no asɛmti, na egyina dɛn so?
1 Hwɛ hokwan ara a yɛanya sɛ Yehowa, Amansan Hene no, din da yɛn so! Onyankopɔn ankasa na ɔde ne din ato yɛn so, na ne titiriw no, efi afe 1931 no, wɔde Yehowa din a ɛda nsow no ato yɛn so sɛ Yehowa Adansefo. (Yes. 43:10) Ná Yesu, Onyankopɔn Ba a ɔwoo no koro no, bu Onyankopɔn din sɛ ɛsom bo sen biribiara, na ɔde dii kan wɔ ne mpaebɔ a ɔde yɛɛ nhwɛso no mu. (Mat. 6:9) Ɔmansin nhyiam dwumadi a yɛbɛyɛ wɔ afe 2012 ɔsom afe mu no asɛmti gyina Yesu nsɛm no so. Asɛmti no ne “Momma Onyankopɔn Din Ho Ntew.”
2. Nsɛm bɛn na yɛrehwɛ kwan sɛ yɛbɛte?
2 Nea Yɛbɛte Wɔ Hɔ: Ɔkasa a wɔbɛma no Memeneda a n’asɛmti ne “Sɛ́ Bere Nyinaa Asomfo no, Momma Afoforo Nhu Onyankopɔn Din” no bɛkyerɛkyerɛ nea enti a mfaso wɔ so sɛ obi de n’asetena bɛyɛ bere nyinaa som adwuma no mu. Yɛbɛsan atie ɔkasa a wɔakyekyem a n’asɛmti ne “Hwɛ Yiye na Woammɔ Yehowa Din Ahohora,” na ɛbɛboa yɛn ma yɛakwati nneɛma anan a ebetumi asum yɛn afiri. Ɔkasa a n’asɛmti ne “Nea Enti a Ɛsɛ sɛ Yɛtew Onyankopɔn Din Ho” bebua nsɛmmisa a edidi so yi: Dɛn na ɛbɛboa yɛn ma yɛde nsi aka asɛm no akyerɛ nnipa a wɔnkyerɛ asɛm no ho anigye kɛse? ne Dɛn na ɛbɛboa yɛn ma yɛama asɛnka adwuma no atu mpɔn? Kwasida nso yebetie ɔkasa a wɔakyekyɛm anan a ɛfa ɔkwan a yɛbɛfa so de yɛn nsusuwii, yɛn kasa, yɛn gyinaesi, ne yɛn abrabɔ atew Onyankopɔn din ho. Anigyefo a wɔbɛba bi no ani begye paa sɛ wɔbɛte baguam ɔkasa a n’asɛmti ne “Yehowa Bɛtew Ne Din Kɛse no Ho Wɔ Harmagedon.”
3. Hokwan bɛn na yɛwɔ, na ɔkwan bɛn so na nhyiam dwumadi no bɛboa yɛn?
3 Ɛrenkyɛ, Yehowa bɛyɛ biribi de atew ne din ho. (Hes. 36:23) Saa bere yi de, yɛwɔ hokwan a ɛso bi nni a yɛde bɛtew biribiara a ɛfa Yehowa din kronkron ho no ho. Yɛwɔ ahotoso sɛ ɔmansin nhyiam dwumadi yi bɛboa yɛn mu biara ma wakɔ so adi asɛyɛde kɛse a yɛwɔ sɛ nnipa a Onyankopɔn din da yɛn so no ho dwuma yiye.