Hu Adepa Wɔ Wo Brɛ Mu
1. Dɛn na ebetumi abrɛ nsi a yɛde yɛ asɛnka adwuma no ase?
1 Wɔbɔɔ onipa sɛ ‘onhu adepa wɔ ne brɛ mu.’ (Ɔsɛnk. 2:24) Nanso, sɛ yentumi nhu sɛ yɛn asɛnka adwuma no resow aba a, abasamtu betumi asɛe yɛn anigye na abrɛ nsi a yɛyɛ no ase. Dɛn na ebetumi aboa na yɛn abam ammu?
2. Dɛn nti na ɛsɛ sɛ yenya adwene a ɛfata wɔ sɛnea nkurɔfo yɛ wɔn ade wɔ asɛnka adwuma a yɛyɛ ho no ho?
2 Nya Adwene a Ɛfata: Kae sɛ ɛwom sɛ nnipa kakraa bi na wotiee Yesu de, nanso akyinnye biara nni ho sɛ ne som adwuma no sow aba. (Yoh. 17:4) Yesu ka siei wɔ ne mfatoho a ɛfa ogufo no ho mu sɛ nnipa dodow no ara rentie Ahenni asɛm a ɛte sɛ aba no. (Mat. 13:3-8, 18-22) Nanso, yɛn mmɔdenbɔ ma yetumi yɛ pii.
3. Yɛbɛyɛ dɛn atumi ‘asow aba’ bere mpo a nnipa pii ntie asɛm a yɛka no?
3 Sɛnea Yɛsow Aba Pii: Sɛnea Yesu mfatoho no kyerɛ no, wɔn a wotie asɛm no ‘bɛsow aba.’ (Mat. 13:23) Sɛ awi bɛtem fifi na enyin a, ɛnsow awi mmɛtem nketewaa, na mmom aba foforo. Enti aba a Kristofo sow no nyɛ nnipa foforo a wɔyɛ wɔn asuafo ankasa, na mmom Ahenni aba a ɛne Ahenni no ho asɛm a yɛka a ebu bɔ ho pii no. “Adepa” fi eyi mu ba, na sɛ nkurɔfo tie oo wɔantie oo, ɛma yenya akomatɔyam. Yɛreboa ma wɔatew Yehowa din ho. (Yes. 43:10-12; Mat. 6:9) Yɛanya hokwan a ɛne sɛ yɛresom sɛ Onyankopɔn mfɛfo adwumayɛfo. (1 Kor. 3:9) Na “anofafa aba” a ɛte saa no ma Yehowa ani gye.—Heb. 13:15, 16.
4. Dɛn na ebetumi afi yɛn asɛnka adwuma no mu aba a yennim?
4 Afei nso, ebia na yɛn adwumaden no resow aba a yenhu. Ebetumi aba sɛ nnipa bi a wɔtee asɛm a Yesu kae no ammɛyɛ n’asuafo kosii sɛ owiee ne som adwuma a ɔyɛe wɔ asase so no. Saa ara nso na ebia Ahenni aba a yegu no rennye ntini wɔ obi komam na anyin, nanso akyiri yi obetumi aba nokware no mu a yennim. Nokwarem no, nnepa pii tumi fi yɛn asɛnka adwuma no mu ba. Enti, momma ‘yɛnkɔ so nsow aba pii’ na yɛnna yɛn ho adi sɛ yɛyɛ Yesu asuafo.—Yoh. 15:8.