Da Ɔdɔ Adi Wɔ Abusua No Mu

Ɔdɔ te sɛ aman anaa gluu a ɛka abusua mufo bom. Sɛ ɔdɔ nni abusua no mu a, ɛbɛyɛ den sɛ baakoyɛ bɛtena wɔn ntam. Ɛba saa a, efie hɔ rennwo. Dɛn na okununom, ɔyerenom, ne awofo betumi ayɛ na ɔdɔ akɔ so atena abusua no mu?

Okunu a ɔdɔ ne yere de n’ahiade ma no. Sɛ ne yere kyerɛ n’adwene a, otie, na ɔma sɛnea ne yere te nka ho hia no. (Efe 5:28, 29) Ɔde nneɛma a n’abusua hia ma wɔn, na ɔboa wɔn ma wɔbɛn Yehowa. Nneɛma a ɔyɛ no bi ne sɛ, ɔne wɔn yɛ Abusua Som daa. (1Ti 5:8) Ɔyere a ɔdɔ ne kunu ‘bu’ ne kunu paa na ɔbrɛ ne ho ase ma no. (Efe 5:22, 33; 1Pe 3:1-6) Ɛsɛ sɛ awarefo no mu biara fi ne pɛ mu de ne yɔnko bɔne kyɛ no. (Efe 4:32) Awofo a wɔdɔ wɔn mma ma wɔn ani ku wɔn mu biara ho na wɔkyerɛkyerɛ wɔn ma wɔdɔ Yehowa. (De 6:6, 7; Efe 6:4) Wonim ɔhaw ahorow a sɛ wɔn mma no kɔ sukuu a wohyia. Afei nso wɔboa wɔn ma wogyina atipɛnfo nhyɛso ano. Sɛ abusua no mufo dodɔ wɔn ho a, ɛma asomdwoe tena abusua no mu na obiara ho dwo no.

HWƐ VIDEO A YƐATO DIN KƆ SO DA ƆDƆ A ƐTO NTWA DA ADI WƆ W’ABUSUA MU NO. WUWIE A, BUA NSƐMMISA A EDIDI SO YI:

• 

  Dɛn na okunu yɛ a ɛkyerɛ sɛ n’ani ku ne yere ho na ɔhwɛ ne so yiye?

• 

  Dɛn na ɔyere yɛ a ɛkyerɛ sɛ ɔwɔ obu kɛse ma ne kunu?

• 

  Ɔkwan bɛn so na awofo betumi de Onyankopɔn Asɛm adua wɔn mma komam?