Yebetumi Adi Ɔtan So Nkonim!

Sɛ obi nyɛɛ wo biribi saa da mpo a, ebia woahu biribi saa anaa woate ho asɛm pɛn. Ɛnnɛ sɛ wutie kaseɛbɔ a, wobɛte no na nkurɔfo reyɛ afoforo bɔne. Adɛn a, wɔyɛ abibifo anaa aborɔfo, anaa wɔne wɔn mfi ɔman baako so. Ɛtɔ da nso a wobɛte sɛ, nkurɔfo atu wɔn ani asi mmarima a wɔne mmarima da ne mmea a wɔne mmea da so. Wei nti, aman pii rehyehyɛ mmara sɛnea ɛbɛyɛ a obiara a ɔtan nti obedi ne yɔnko bɔne no, wɔde no bɛfa mmara kwan so.

Sɛ obi hu sɛ afoforo tan no a, ɛnyɛ den sɛ ɔno nso bɛtan wɔn. Ɛba saa a, nneɛma a wɔde yɛ no no, ɔno nso yɛ bi tua ka. Afei na abɛyɛ manso bi a ɛda hɔ; ɛto ntwa da.

Ebia baabi a wufi, kasa a woka, anaa biribi foforo nti, nkurɔfo ne wo nni no yiye. Ebi nso a na obi adidi wo atɛm, wadi wo ho fɛw, anaa wahunahuna wo pɛn. Nanso ɔtan kɔ akyiri sen saa. Ɔtan de, nea ɛtaa kowie ne awurukasɛm, nsisi, mmonnaato, anaa awudisɛm. Ebi wɔ hɔ koraa a, ɔtan nti, ebinom tumi tu wɔn ani si nnipakuw bi so sɛ wɔbɛtɔre wɔn ase.

Yebesusuw nsɛmmisa a edidi so yi ho wɔ nhoma yi mu, na ɛbɛsan akyerɛ yɛn sɛnea yebedi ɔtan so nkonim:

• Adɛn nti na ɔtan abu so saa?

• Yɛbɛyɛ dɛn adi ɔtan so nkonim?

• Bere bi bɛba a obiara rentan ne yɔnko bio anaa?