Sɛ Obi Ka Sɛ “Migye Yesu Di” a, Ɛno Nko Ara Betumi Ama Wanya Nkwa Anaa?
Nea Bible ka
Kristofo pii gye di sɛ, Kristo bewu gyee yɛn nkwa. (1 Petro 3:18) Nanso obi ka sɛ, ogye di sɛ Yesu ne Agyenkwa no a, ɛno nko ara nkyerɛ sɛ obenya nkwa. Ahonhommɔne mpo gye di sɛ Yesu ne “Onyankopɔn Ba no,” nanso ɔsɛe na ɛda hɔ retwɛn wɔn.—Luka 4:41; Yuda 6.
Dɛn na ɛsɛ sɛ woyɛ na woanya nkwa?
Ɛsɛ sɛ wugye di sɛ Yesu bewu maa yɛn bɔne. (Asomafo Nnwuma 16:30, 31; 1 Yohane 2:2) Ɛsɛ sɛ wugye di sɛ Yesu baa asaase so sɛ onipa. Afei nso, ɛsɛ sɛ wugye di sɛ nsɛm a Bible aka afa ne ho no nyinaa yɛ nokware.
Sua nokwasɛm ahorow a ɛwɔ Bible mu no. (2 Timoteo 3:15) Bible ka sɛ, bere a ɔsomafo Paul ne Silas da afiase no, wɔka kyerɛɛ afiasehwɛfo no sɛ: “Gye Awurade Yesu di na wobegye wo nkwa.” Wɔkaa saa kyerɛɛ no wiei no, wofii ase kaa “Yehowaa asɛm” kyerɛɛ no. (Asomafo Nnwuma 16:31, 32) Wei kyerɛ sɛ, sɛ afiasehwɛfo no betumi anya Yesu mu gyidi paa a, gye sɛ osua Bible no na onya Kyerɛwnsɛm no ho nimdeɛ a edi mu.—1 Timoteo 2:3, 4.
Sakra w’adwene. (Asomafo Nnwuma 3:19) Sɛ yebetumi anya nkwa a, gye sɛ yɛtwe yɛn ho fi nneɛma bɔne a yɛyɛ no ho, na yenu yɛn ho. Afei nso, sɛ yɛsakra ampa ara a, afoforo behu, efisɛ yɛbɛtwe yɛn ho afi nneyɛe biara a Onyankopɔn kyi ho, na yɛbɛyɛ ‘nnwuma a ɛkyerɛ sɛ yɛasakra yɛn adwene.’—Asomafo Nnwuma 26:20.
Ma wɔmmɔ wo asu. (Mateo 28:19) Yesu kaa sɛ, obiara a ɔpɛ sɛ odi n’akyi no, ɛsɛ sɛ ɔbɔ asu. Afiasehwɛfo a yɛadi kan aka ne ho asɛm no bɔɔ asu. (Asomafo Nnwuma 16:33) Saa ara nso na bere a ɔsomafo Petro kaa Yesu ho nokwasɛm kyerɛɛ nnipadɔm bi wiei no, “wɔbɔɔ wɔn a wɔde anigye gyee n’asɛm no asu.”—Asomafo Nnwuma 2:40, 41.
Di Yesu ahyɛde so. (Hebrifo 5:9) Wɔn a wodi nea Yesu ‘ahyɛ nyinaa so’ no de wɔn abrabɔ kyerɛ sɛ wodi Yesu akyi. (Mateo 28:20) Wɔnyɛ “atiefo” kɛkɛ, mmom wɔyɛ “asɛm no yɛfo.”—Yakobo 1:22.
Gyina mu kosi awiei. (Marko 13:13) Ɛsɛ sɛ wɔn a wodi Yesu akyi nyinaa nya “boasetɔ” na wɔatumi anya nkwa. (Hebrifo 10:36) Sɛ wohwɛ ɔsomafo Paul sei a, efi da a ɔbɛyɛɛ Kristoni kosii da a owui no, omiaa n’ani dii Yesu nkyerɛkyerɛ so pɛpɛɛpɛ, na odii Onyankopɔn nokware.—1 Korintofo 9:27.
“Ɔbɔnefo Mpaebɔ” a ebinom bɔ no nso ɛ?
Wokɔ asɔre ahorow mu a, wɔwɔ biribi a wɔfrɛ no “Ɔbɔnefo Mpaebɔ” anaa “Ogye Mpaebɔ.” Sɛ obi rebɔ saa mpae no a, ɔka sɛ ogye tom sɛ ɔyɛ ɔbɔnefo, na ogye di sɛ Yesu wu maa ne bɔne. Afei ɔsrɛ sɛ, Yesu mmra n’abrabɔ mu anaa ɔmmɛtena ne komam. Nanso saa mpae yi nni Bible mu, saa ara nso na Bible nkaa no baabiara sɛ, ɛyɛ a yɛnhyehyɛ mpae bi a yɛfrɛ no “Ɔbɔnefo Mpaebɔ.”
Ebinom adwene yɛ wɔn sɛ, sɛ wɔbɔ “Ɔbɔnefo Mpaebɔ” no wie a, nea ɛte biara wobenya nkwagye. Nanso, sɛ obi bɔ saa mpae no a, ɛnkyerɛ sɛ ɔkwan biara so obenya nkwa. Yɛyɛ nnipa yi de, bɔne rempa yɛn ho da. (1 Yohane 1:8) Ɛno nti, Yesu ka kyerɛɛ n’asuafo no sɛ, ɛyɛ a wɔntaa nsrɛ Onyankopɔn na ɔmfa wɔn bɔne nkyɛ wɔn. (Luka 11:2, 4) Afei nso, tete no, Kristofo bi nyaa hokwan a anka ɛbɛma wɔatena ase daa, nanso esiane sɛ wɔtwee wɔn ho fii Onyankopɔn ho nti, saa hokwan no bɔɔ wɔn.—Hebrifo 6:4-6; 2 Petro 2:20, 21.
Ɛyɛɛ dɛn na “Ɔbɔnefo Mpaebɔ” no bae?
Abakɔsɛm akyerɛwfo bebree adwene nhyia wɔ nea ɛyɛe a “Ɔbɔnefo Mpaebɔ” no bae no ho. Ebinom ka sɛ Protestantfo na efii ase. Afoforo nso ka sɛ, asɔre ahorow a wɔtetee no afe 1700 ne 1800 mu no na wofii “Ɔbɔnefo Mpaebɔ” no ase. Sɛnea ɛte biara no, Kyerɛwnsɛm no mpene mpae a ɛte saa so, efisɛ ɛne Bible nkyerɛkyerɛ nhyia.
a Bible ma yehu sɛ Onyankopɔn din ankasa ne Yehowa.