MMABUN BISA SƐ
Mebɔ Asu Wie a, Dɛn Bio Na Ɛsɛ Sɛ Meyɛ?—Ɔfã 2: Kɔ So Bɔ Wo Bra Ma Ɛnsɔ Onyankopɔn Ani
Bible ka sɛ, “Wɔn a wɔn abrabɔ di mu no, Yehowa remfa adepa biara nkame wɔn.” (Dwom 84:11) Sɛ yɛka sɛ ‘w’abrabɔ di mu’ a, ɛkyerɛ sɛn? Nea ɛkyerɛ ne sɛ wode w’abrabɔ bɛkyerɛ sɛ ɛbɔ a wohyɛɛ Yehowa bere a wuhyiraa wo ho so maa no no, woredi so. (Ɔsɛnkafo 5:4, 5) Sɛ wobɔ asu wie a, wobɛyɛ dɛn ama w’abrabɔ adi mu anaa asɔ Onyankopɔn ani?
Nea yɛrebɛka ho asɛm
Kɔ so mia w’ani gyina ɔhaw ano
Kyerɛwnsɛm titiriw: “Ɛsɛ sɛ yɛfa amanehunu bebree mu de kɔ Onyankopɔn Ahenni mu.”—Asomafo Nnwuma 14:22.
Nea ɛkyerɛ: Nea ɛte ne sɛ Kristofo nyinaa behyia ɔhaw wɔ wɔn asetena mu. Ɔhaw no bi wɔ hɔ a esiane sɛ yɛyɛ Kristofo nti na yehyia. Ebi ne fɛwdi ne ɔsɔretia a nkurɔfo de ba yɛn so no. Ɔhaw no bi nso wɔ hɔ a ɛto nnipa nyinaa. Ebi ne sikasɛm mu ahokyere ne yare.
Nea wubetumi ahwɛ kwan: Ɛwom ara a nsakrae bɛba w’asetena mu, na ɛtɔ da a sɛnea nneɛma bɛkɔ no, w’ani rennye ho. Bible ka sɛ ɔhaw betumi ato obiara; ɛto Kristofo ne wɔn a wɔnyɛ Kristofo nyinaa.—Ɔsɛnkafo 9:11.
Nea wubetumi ayɛ: Esiane sɛ wunim sɛ wubetumi ahyia ɔhaw nti, wubetumi asiesie wo ho asie na sɛ ɛba a woatumi agyina ano. Wuhyia ɔhaw a, hu no sɛ ɛyɛ akwannya a ɛbɛma woahyɛ wo gyidi den, na wode wo ho ato Yehowa so kɛse. (Yakobo 1:2, 3) Bere rekɔ so no, wo ara wubehu sɛ asɛm a ɔsomafo Paul kae yi yɛ nokware. Ɔkaa sɛ: “Nea ɔhyɛ me den no adaworoma, minya ahoɔden wɔ biribiara mu.”—Filipifo 4:13.
ASƐM A ESII ANKASA. “Mebɔɔ asu no, ankyɛ koraa na me nuanom mmarima a wɔyɛ mpanyimfo sen me no gyae Yehowa som. Ɛno akyi no, m’awofo bɛyaree, na me nso mebɛyaree. Nea mefaa mu no, na anka ebetumi ama m’abam abu koraa ama me werɛ afi sɛ bere a mihyiraa me nkwa so maa Onyankopɔn no, mehyɛɛ no bɔ sɛ mede ne som na ebedi kan wɔ m’abrabɔ mu. Nanso sɛ mɛka paa a, Onyankopɔn a mihyiraa me ho so maa no no, ɛno paa na ɛboaa me maa mitumi gyinaa ɔhaw no nyinaa ano.”—Karen.
Biribi a ebetumi aboa wo: Sua Yosef ho ade. Wubetumi akan ne ho asɛm wɔ Genesis ti 37 ne 39 kosi 41. Susuw nsɛmmisa yi ho: Ɔhaw a ɔnhwɛ kwan bɛn na ohyiae, na dɛn na ɔyɛ de gyina ano? Dɛn na Yehowa yɛ de boaa Yosef?
Wuhia nsɛm pii aka ho anaa?
Kenkan:
“How Can I Deal With Tragedy?”
Twe bi:
Kɔ so mia w’ani gyina ɔhaw ano
Kyerɛwnsɛm titiriw: “Nea ɛsɔ obi hwɛ ne n’ankasa akɔnnɔ a ɛtwetwe no na ɛto no brada.”—Yakobo 1:14.
Nea ɛkyerɛ: Ɛtɔ da a bɔne ho akɔnnɔ tumi sɔ yɛn nyinaa hwɛ na sɛ yɛanhyɛ yɛn ho so a ebetumi ama yɛakɔyɛ bɔne.
Nea wubetumi ahwɛ kwan: Wobɔ asu wie a, wobɛkɔ so ahyia “ɔhonam akɔnnɔ” ho sɔhwɛ. (2 Petro 2:18) Seesei a wonwaree yi, ɛtɔ da a akɔnnɔ bi betumi aba wo mu sɛ wo ne obi nkɔda.
Nea wubetumi ayɛ: Ansa na sɔhwɛ bi bɛba w’akwan mu no, di kan hu nea wobɛyɛ; si w’adwene pi sɛ worenni w’akɔnnɔ akyi nsisi gyinae bɔne biara. Kae Yesu asɛm yi: “Obiara rentumi nsom awuranom baanu.” (Mateo 6:24) Nea wubetie no no de, ɛwɔ wo nsam; wo na wobɛkyerɛ. Sɛ wutie Yehowa a anka eye paa. Sɛ wunya akɔnnɔ bɔne bi na ano yɛ den sɛ dɛn mpo a, wubetumi asi wo bo sɛ woremma no mpiapia wo mma wonkɔyɛ bɔne.—Galatifo 5:16.
Biribi a ebetumi aboa wo: Hu sɛnea wote yiye; baabi a wobɔ mmɔden ne baabi a wotɔ sin. Fa nnamfo a wɔbɛboa wo ama woayɛ nneɛma pa. Nnipa a wɔbɛma ayɛ den sɛ wobɛyɛ nea ɛtene no, ɛne wɔn mmɔ. Sɛ wuhu sɛ baabi wɔ hɔ a wokɔ a ɛbɛyɛ mmerɛw sɛ wobɛyɛ bɔne a, mɛnkɔ hɔ. Biribi foforo biara a wohwɛ a, ebetumi atwetwe wo akɔ bɔne mu no, twe wo ho fi ho.—Dwom 26:4, 5.
Wuhia nsɛm pii aka ho anaa?
Kɔ so hyɛ ahokeka a wode som Yehowa no mu gya
Kyerɛwnsɛm titiriw: “Da nsi ne ahokeka koro no ara bi adi . . . akosi sɛ ɛbɛba mu, na amma moanyɛ anihaw.”—Hebrifo 6:11, 12.
Nea ɛkyerɛ: Sɛ obi reyɛ adwuma na wamfa n’adwene ansi so a, ɛbɛma ahokeka a ɔde reyɛ no abrɛ ase anaa n’ani bɛhaw.
Nea wubetumi ahwɛ kwan: Ebia wobɔɔ asu wiei no, w’ani gyei na ahokeka ne nsi a wode resom Yehowa no yɛɛ kɛse. Yɛreka yi ɔdɔ a wowɔ ma Yehowa no nso yɛɛ kɛse. Nanso ebia ebedu baabi no, wubehu sɛ ɛnyɛ biribiara a Yehowa bɛka no na ɛbɛyɛ mmerɛw ma wo sɛ wubetie na wode ayɛ adwuma. Ɛba saa a, anhwɛ a w’abam betumi abu ama ahokeka a wode som Yehowa so atew.—Galatifo 5:7.
Nea wubetumi ayɛ: Kɔ so ara yɛ nea ɛtene, sɛ mpo wo koma mu no wompɛ sɛ woyɛ a, mia w’ani yɛ. (1 Korintofo 9:27) Yere wo ho sɛ wubehu wo soro Agya no yiye, na bɔ no mpae bere nyinaa. Wei bɛma ayɔnkofa a ɛda wo ne no ntam no akɔ so ayɛ den. Afei nso, wɔn a wɔdɔ Yehowa na wɔresom no no, wo ne wɔn mfa nnamfo.
Biribi a ebetumi aboa wo: Kae sɛ Yehowa dɔ wo paa, na n’ani gye ho sɛ ɔbɛboa wo. Sɛ ɛkɔba sɛ nsi ne ahokeka a wode resom brɛ ase kakra a, nnya adwene sɛ Onyankopɔn bo afuw wo. Bible ka sɛ: “Ɔma nea wabrɛ no tumi, na wɔn a wonni ahoɔden no, ɔma wɔn ahoɔden mmoroso.” (Yesaia 40:29) Akyiri yi, Yehowa behyira wo mmɔden so na ama woatumi de ahokeka asom no bio.
Wuhia nsɛm pii aka ho anaa?
Kenkan:
Hwɛ video yi:
Nea yɛreka akosi: Sɛ wutie Yehowa na wobɔ bra a edi mu a, ɛbɛma Yehowa koma atɔ ne yam! (Mmebusɛm 27:11) N’ani begye sɛ woasi gyinae sɛ wobɛsɔ n’ani, na ɔno nso bɛma wo nea wuhia biara na woatumi ako atia sɔhwɛ ahorow a Satan de ba wo so no.