COVID Akum Nnipa Ɔpepem Nsia—Dɛn Na Bible Ka?

Amansan Kubaatan no fã a ɛhwɛ apɔwmuden so (WHO) no bɔ amanneɛ sɛ, ɛde besi May 23, 2022 no, nnipa ɔpepem nsia, mpem ahanu aduɔson (6.27 million) na COVID-19 yare no akunkum wɔn. Ansa na wɔde saa amanneɛbɔ yi reto gua no, na wɔadi kan de ato gua wɔ May 5, 2022 sɛ, wɔhwɛ mu paa a, nnipa a wɔafa COVID ho awu no boro ɔpepem nsia koraa. Wɔkyerɛ a, efi afe 2020 besi afe 2021 no, “nnipa dodow a COVID-19 yare no ankasa akunkum wɔn, ne wɔn a yare no ho nsunsuanso ama wɔawuwu no, yɛka wɔn nyinaa bom a, . . . wɔn dodow bɛyɛ ɔpepem 14, mpem ahankron (14.9 million).” Nsɛm a ɛte sei yɛ awerɛhow. Bible ka ho biribi anaa?

Bible ka too hɔ sɛ nsanyare kodiawuo bɛba

•  Yesu hyɛɛ nkɔm sɛ, “awiei mmere” no mu no, “nsanyare a edi awu” betu atese.—Luka 21:11; 2 Timoteo 3:1.

Nkɔm a Yesu hyɛe no, ɛnnɛ aba mu. Sɛ wopɛ sɛ wuhu wei ho nsɛm pii a, kenkan asɛm a yɛato din “Nneɛma Bɛn Na Esisi a Ɛbɛkyerɛ Sɛ Yɛwɔ ‘Awiei Mmere’ Anaa ‘Nna a Edi Akyiri’ No Mu?”

Bible kyekye yɛn werɛ

•  ‘Awerɛkyekye nyinaa Nyankopɔn no kyekye yɛn werɛ wɔ yɛn amanehunu nyinaa mu.’—2 Korintofo 1:3, 4.

Nnipa a wɔahwere wɔn adɔfo no mu bebree wɔ hɔ a, Bible mu nsɛm akyekye wɔn werɛ. Sɛ wopɛ sɛ wuhu wei ho nsɛm pii a, kenkan nsɛm a edidi so yi: “Sɛnea Wubegyina Awerɛhow Ano—Nea Wubetumi Ayɛ Nnɛ” ne “Nea Eye Sen Biara a Ɛbɛboa Wɔn a Wɔn Biribi Awu.”

Bible ma yehu nea ebetu ɔhaw no ase koraa

•  “W’Ahenni mmra. W’apɛde nyɛ hɔ wɔ asaase so te sɛ ɔsoro.”—Mateo 6:10.

Ɛrenkyɛ, sɛ “Onyankopɔn Ahenni” no ba a, ɛbɛhwɛ ama obiara anya apɔwmuden, na “ɔmanfo no mu biara renka sɛ: ‘Meyare.’” (Marko 1:14, 15; Yesaia 33:24) Hwɛ video a yɛato din Dɛn Ne Onyankopɔn Ahenni? Ɛbɛma woahu saa ahenni anaa aban a ɛwɔ soro yi ho nsɛm pii, ne nea ɛbɛyɛ ama yɛn daakye.

Sɛ worepɛ afotu pa ne bɔhyɛ a ɛma akomatɔyam a ebetumi aboa wo ne w’abusua a, yɛhyɛ wo nkuran sɛ sua Bible.