Apɔwmuden Ho Nimdefo Panyin Bi De Ato Gua Sɛ, Sohyia Midia Redi Mmabun Awu—Dɛn Na Bible Ka?

May 23, 2023 no, apɔwmuden ho nimdefo panyin bi a ɔwɔ United States de too gua sɛ, sohyia midia repira mmabun bebree.

• “Ɛwom, sohyia midia tumi boa mmofra ne mmabun binom wɔ nneɛma bi mu, nanso yɛahu nneɛma bebree a ɛkyerɛ sɛ mmofra ne mmabun a wɔkɔ sohyia midia so no, ebetumi aka wɔn adwene, na ebetumi ama wɔn apɔwmuden ho aba asɛm.”—Social Media and Youth Mental Health: The U.S. Surgeon General’s Advisory; wɔkyerɛw no afe 2023 mu.

Asɛm a panyin no de too gua no, ɔde nhwehwɛmu a animdefo binom ayɛ nso kaa ho. Saa nhwehwɛmu no ma ɛda adi sɛ asɛm no yɛ aniberesɛm.

• Mmabun a wɔadi mfe 12 kosi 15 a “da biara wɔtena sohyia midia so boro nnɔnhwerew 3 no, wɔn koraa na wɔn de no yɛ hu. Ɛnyɛ den koraa sɛ adwinnwen bɛhyɛ wɔn so, anaa wɔbenya adwenemyare a yɛfrɛ no depression.”

• Mmabun a wɔadi mfe 14 a “wɔtena sohyia midia so kyɛ no, ɛyɛ a wɔntumi nna yiye, nkurɔfo teetee wɔn wɔ Intanɛt so, wɔtaa nya adwene sɛ wɔn ho nyɛ fɛ, wɔbu wɔn ho sɛ wɔnsɛ hwee, na ɛnkyɛ koraa na wɔabotow. Nea yɛreka yi, mmaayewa paa na ɛtaa yɛ wɔn.”

Dɛn na awofo betumi ayɛ de abɔ wɔn mma ho ban? Bible mu afotu betumi aboa wɔn.

Nea awofo betumi ayɛ

Yɛ ho biribi. Awofo, monhwɛ nsunsuanso a sohyia midia betumi akɔfa abrɛ mo mma, na munnwen ho nhwɛ sɛ, mobɛma wɔn kwan ama wɔakɔ so anaa moremma wɔn kwan.

• Bible mu afotusɛm: “Kyerɛkyerɛ abofra ɔkwan a ɔmfa so.”—Mmebusɛm 22:6.

• Sɛ wopɛ sɛ wuhu wei ho nsɛm pii a, kenkan asɛm a yɛato din “Should My Child Use Social Media?”

Sɛ woma wo ba kwan ma ɔkɔ sohyia midia so a, ɛnde hu ɔhaw a ebetumi akɔfa abrɛ no, na boa no na ankɔfa nsunsuanso bɔne biara ammrɛ no. Wobɛyɛ no sɛn?

Nneɛma a ɛwɔ sohyia midia so a ebetumi apira wo ba no, bɔ ne ho ban fi ho. Kyerɛkyerɛ wo ba ma onhu nneɛma a ebetumi apira no wɔ sohyia midia so, na watwe ne ho afi ho.

• Bible mu afotusɛm: “Aguamammɔ ne ɔbra fĩ biara anaa adifudepɛ de, mommma wɔmmmɔ so mpo wɔ mo mu, . . . ɛmfata nso sɛ aniwude, ahuhusɛm anaa nsɛnkwaa a kasafĩ wom kɔ so wɔ mo mu.”—Efesofo 5:3, 4.

• Wopɛ sɛ wuhu nneɛma a ebetumi aboa wo a, kenkan asɛm a yɛato din “Teaching Your Teenager Social Media Safety.”

Hyehyɛ mmara ma no. Ebi ne sɛ, bere a ɔde bɛkɔ sohyia midia so ne bere a ɔde befi so no, hyɛ ho mmara ma no.

• Bible mu afotusɛm: ‘Monhwɛ mo abrabɔ yiye paa na sɛnea monantew no ayɛ sɛ anyansafo, na momfa mo bere nyɛ nneɛma a ɛho hia.’—Efesofo 5:15, 16.

• Nneɛma a wɔadrɔdrɔ ayɛ no video a yɛato din Wokɔ Sohyial Nɛtwɛk So a, Hwɛ Yie no, yi kyerɛ wo ba, na onhu nea enti a ehia sɛ wohyehyɛ sohyia midia ho mmara ma no.