Yehowa Adansefo ne Ɔsom Afoforo Bom Yɛ Asɔre Anaa?

Yehowa Adansefo de, yɛn ani gye ho paa sɛ yɛne nnipa a wɔkɔ asɔre ahorow bɛbɔ Bible mu nkɔmmɔ, nanso yɛne wɔn a wɔne yɛn gyidi nyɛ baako mmom nyɛ asɔre. Bible ka sɛ nokware Kristofo “akeka atoatoam pɛpɛɛpɛ.” Ade titiriw a ama atumi aba saa ne sɛ yɛn gyidi yɛ baako. (Efesofo 4:16; 1 Korintofo 1:10; Filipifo 2:2) Yɛn nyinaa gye di sɛ ɔdɔ, ayamhyehye, ne fafiri ho hia paa. Nanso ɛnyɛ ne nyinaa no no. Yɛn gyidi a yɛwɔ no, egyina Bible mu nokware nimdeɛ so. Sɛ ɛnyɛ saa a, anka yɛn gyidi yɛ kwa.​—Romafo 10:2, 3.

Sɛ ɔsom a ɛsono wɔn mu biara gyidi bom yɛ asɔre a, Bible ka sɛ ɛte sɛ nea wɔretwe kɔndua a ɛmfata. Kɔndua a ɛte saa betumi asɛe Kristoni bi gyidi. (2 Korintofo 6:14-17) Ɛno nti Yesu amma n’akyidifo kwan sɛ wɔmfa wɔn ho nhyɛ gyidi afrafra mu. (Mateo 12:30; Yohane 14:6) Saa ara na Onyankopɔn Mmara a wɔnam Mose so de maa tete Israelfo no mu no, ɔbaraa wɔn sɛ wɔne nkurow a atwa wɔn ho ahyia no mmom nsom. (Exodus 34:11-14) Akyiri yi, nkurɔfo bi kae sɛ wɔbɛboa Israelfo, nanso Israelfo anokwafo no annye saa mmoa no. Sɛ wogyei a, anka ɛbɛma wɔde wɔn ho akɔhyɛ gyidi afrafra mu.​—Esra 4:1-3.

Wɔn a wɔkɔ asɔre foforo no, Yehowa Adansefo ne wɔn bɔ Bible mu nkɔmmɔ anaa?

Aane. Wɔ afe 2015 mu no, Yehowa Adansefo de nnɔnhwerew 1,933,473,727 dii wɔn a wɔkɔ asɔre foforo adanse. Sɛnea ɔsomafo Paulo yɛe no, yɛn nso yɛkɔ asɛnka a, yɛbɔ mmɔden sɛ yɛbɛte “nnipa pii” nsusuwii ne wɔn gyidi ase. (1 Korintofo 9:19-22) Sɛ yɛne nkurɔfo rebɔ nkɔmmɔ a, Bible afotu a ɛka sɛ yennya “obu a emu dɔ” mma nnipa nyinaa no, yɛde yɛ adwuma.​—1 Petro 3:15.