Ɛyɛɛ Dɛn Na Nkwa Bae?

“Wo [Onyankopɔn] na nkwa fi wo.” (Dwom 36:9) Wugye saa asɛm no di anaa? Ebinom adwene yɛ wɔn sɛ nneɛma bi na ɛkeka boom maa nkwa bae. Sɛ saa a, ɛnde nea ɛkyerɛ ne sɛ ɛnyɛ obi na ɔbɔɔ yɛn, na mmom yɛn ara na yɛbae. Nanso, sɛ Yehowa Nyankopɔn na ɔbɔɔ biribiara a, ɛnde wunnye nni sɛ biribi nti na ɔbɔɔ yɛn?a Wo de, hwɛ nea Bible no aka afa nea ɛyɛe a nkwa bae ho, ne nea enti a yebetumi aka sɛ saa asɛm no tɔ asom.

1. Ɛyɛɛ dɛn na ɔsoro ne asaase bae?

Bible ka sɛ: “Mfiase no Onyankopɔn bɔɔ ɔsoro ne asaase.” (Genesis 1:1) Abɔde mu nyansahufo pii gye tom sɛ, ɔsoro ne asaase anaa amansan yi amma prɛko pɛ; ɛwɔ mfiase. Ɔkwan bɛn na Onyankopɔn faa so bɔɔ ɔsoro ne asaase? Ɔde ne honhom kronkron anaa ne tumi a ɔde yɛ ade na ɛbɔɔ ɔsoro ne asaase ne emu nneɛma nyinaa. Ebi ne nsorommakuw ahorow-ahorow ne okyinnsoromma ahorow.—Genesis 1:2.

2. Adɛn nti na Onyankopɔn bɔɔ asaase?

Yehowa ‘ammɔ asaase no kwa na mmom ɔnwenee sɛ wɔntena so.’ (Yesaia 45:18) Osiesiee yɛn asaase yi fɛfɛɛfɛ, na ɔmaa yɛn biribiara a yehia a ebetumi ama yɛatena so daa. (Kenkan Yesaia 40:28; 42:5.) Abɔde mu nyansahufo ama yɛahu sɛ yɛn asaase yi yɛ soronko koraa. Asaase so nko ara ne baabi a nnipa betumi atena ama ayɛ yiye.

3. Dɛn na ɛma nnipa yɛ soronko fi mmoa ho?

Bere a Yehowa bɔɔ asaase wiei no, ɔbɔɔ nneɛma a nkwa wom wɔ so. Nea edi kan koraa no, ɔbɔɔ nnua ne mmoa. Ɛno akyi no, “Onyankopɔn bɔɔ onipa wɔ ne suban so.” (Kenkan Genesis 1:27.) Dɛn na ɛma nnipa yɛ soronko? Ɛne sɛ, Onyankopɔn bɔɔ yɛn wɔ ne suban so. Ɛno nti, Onyankopɔn suban ahorow te sɛ ɔdɔ ne atɛntrenee no, yɛn nso yɛwɔ bi. Sɛnea ɔbɔɔ yɛn nti, yetumi sua kasa horow, yetumi hu nneɛma a ɛyɛ fɛ kyerɛ ho anisɔ, na yetumi tie nnwom ma yɛn ani gye. Afei nso, nnipa nko ara na etumi som yɛn Bɔfo no; mmoa ntumi nyɛ saa.

SUA PII KA HO

Adanse a ɛkyerɛ sɛ obi na ɔbɔɔ nkwa no, susuw ho hwɛ. Afei hwɛ nea enti a yebetumi aka sɛ nea Bible ka fa adebɔ ho no tɔ asom. Dɛn na nnipa suban ma yehu fa Onyankopɔn ho?

4. Obi na ɔbɔɔ nkwa

Sɛ nnipa hwɛ abɔde so yɛ biribi a, wogye ho anuonyam. Ɛnde abɔde no ankasa nso ɛ, hena na ɛsɛ sɛ yɛde ho anuonyam ma no? Monhwɛ VIDEO no. Muwie a munsusuw asɛmmisa yi ho.

VIDEO: Onyankopɔn mu Gyidi (2:43)

• Abɔde mu nneɛma a nnipa ahwɛ so ayɛ biribi no, ebi ne nea ɛwɔ he?

Ɔdan biara, obi na osi. Ɛnde, abɔde a atwa yɛn ho ahyia nso, hena na ɔbɔe? Monkenkan Hebrifo 3:4. Muwie a munsusuw nsɛmmisa yi ho:

• Abɔde a atwa yɛn ho ahyia no, emu nea ɛwɔ he na ɛyɛ wo fɛ paa?

• Wohwɛ a, ntease wom sɛ yebegye adi sɛ, ɔsoro ne asaase ne emu nneɛma nyinaa, obi na ɔbɔe anaa? Adɛn nti na woreka saa?

Wunim biribi?

Sɛ wokɔ jw.org/tw na wohwɛ ɔfã a yɛato din “Wɔbɔe Anaa?” ne “Nea Ɛyɛe a Nkwa Bae, Nea Nkurɔfo Aka” a, wubenya video ahorow ne nsɛm pii a ɛfa nea yɛaka yi ho.

“Nea ɛwom ne sɛ, ofi biara obi na osi, na nea ɔyɛɛ nneɛma nyinaa ne Onyankopɔn.”

5. Nea Bible ka fa adebɔ ho no tɔ asom

VIDEO: Obi Na Ɔbɔɔ Amansan Yi Anaa?—Ne Fã Bi (3:51)

• Wohwɛ a Onyankopɔn de nnansia, a da koro biara yɛ nnɔnhwerew 24 na ɛbɔɔ asaase ne emu nneɛma nyinaa anaa?

• Nea Bible ka fa adebɔ ho no, wohwɛ a ntease wom? Adɛn nti na woreka saa?

Monkenkan Genesis 1:1. Muwie a munsusuw asɛmmisa yi ho:

• Abɔde mu nyansahufo ka sɛ amansan yi wɔ mfiase. Nea wokenkanee wɔ Bible mu no, wode toto nea nyansahufo ka no ho a, wuhu no sɛn?

Ebinom adwene ne sɛ Onyankopɔn nam adannandi so na ɛbɔɔ nneɛma. Nea wɔkyerɛ ne sɛ Onyankopɔn dii kan bɔɔ biribi ketekete bi a nkwa wom, ɛnna ɛdannanee ara kosii sɛ nneɛma a aka nyinaa bae. Monkenkan Genesis 1:21, 25, 27. Muwie a munsusuw nsɛmmisa yi ho:

• So Bible kyerɛkyerɛ sɛ Onyankopɔn bɔɔ biribi ketekete bi a nkwa wom, ɛnna ɛdannanee ara bɛyɛɛ mpataa, mmoa, ne nnipa anaa? Anaa ɛkyerɛkyerɛ sɛ Onyankopɔn na ɔbɔɔ nneɛma ahorow-ahorow sɛnea ebiara “su te”?b

6. Nnipa yɛ Onyankopɔn abɔde a wɔyɛ soronko

Yehowa ammɔ yɛn te sɛ mmoa. Kenkan Genesis 1:26. Muwie a munsusuw asɛmmisa yi ho:

• Esiane sɛ Onyankopɔn bɔɔ yɛn wɔ ne suban so nti, yɛwɔ ɔdɔ ne ayamhyehye. Sɛ saa a, ɛnde suban bɛn na Onyankopɔn nso wɔ?

NEA YƐASUA

Yehowa na ɔbɔɔ ɔsoro ne asaase ne nneɛma a ɛwom nyinaa.

Ntimu

• Nea ɛyɛe a amansan yi bae no, dɛn na Bible ka fa ho?

• So Onyankopɔn dii kan bɔɔ biribi ketekete bi a nkwa wom, ɛnna ɛdannanee ara kosii sɛ nneɛma a aka nyinaa bae, anaa ɔno ara na ɔbɔɔ biribiara?

• Dɛn na ɛma nnipa yɛ soronko?

YƐ NHWEHWƐMU

Abɔde a atwa yɛn ho ahyia no ma yehu sɛ Ɔbɔadeɛ bi wɔ hɔ. Kenkan asɛm a edi so yi na wubehu.

“Dɛn Na Yebetumi Asua Afi Abɔde Mu?” (Nyan!, September 2006)

Nea Bible ka fa adebɔ ho no, hwɛ sɛnea agya bi betumi akyerɛkyerɛ mu akyerɛ ne ba ketewa.

‘Yehowa na Ɛbɔɔ Nneɛma Nyinaa’ (2:37)

Asɛm a ebi ka sɛ, biribi ketekete na ɛdannanee ara kosii sɛ nneɛma a aka nyinaa bae no, hwɛ sɛ Bible foa so anaa.

“Onyankopɔn Nam Adannandi So Na Ɛbɔɔ Nneɛma a Nkwa Wom Ahorow Nyinaa?” (Ɛwɔ jw.org)

Nyansahufo ayɛ nnompe ahorow bi a akyɛ paa ho nhwehwɛmu ne nhwehwɛmu afoforo pii. Ɛyɛ a hwɛ sɛ, nea wɔahu no kyerɛ sɛ obi na ɔbɔɔ ade anaa nneɛma no ara na ɛbae.

Nea Ɛyɛe a Nkwa Bae—Nsɛm Nnum Bi a Ehia Sɛ Yebisa Yɛn Ho (nhomawa)