‘Wɔn a Wosian Kɔɔ Po So Wɔ Ahyɛn Mu’

WƆDE kɔbere mfrafrae ayɛ po so hyɛn kwankyerɛfo bi a ɔrekyerɛ ne hyɛn kwan afa ahum bi mu honi anim akyerɛ po so hyɛn gyinabea a ɛwɔ Gloucester, Massachusetts, U.S.A. no. Wɔde ohoni no kae Gloucester apofofo mpempem pii a wɔkyerɛ sɛ wɔawuwu wɔ po mu no. Wɔakyerɛw nsɛm a ɛwɔ Dwom 107:23, 24 wɔ ohoni no ase ne nkaedum bi a ɛbɛn ho no so sɛ: ‘Wɔn a wosian kɔɔ po so wɔ ahyɛn mu, na wɔkɔyɛɛ adwuma wɔ nsu akɛse mu no; Eyinom na wohuu Awurade nneyɛe, ne n’anwonwade ebun mu.’—King James Version.

Mpataa a woyi wɔ Atlantic po a emu dɔ mu no yɛ adwuma a ɛyɛ hu paa. Wɔ mfe pii atwam no mu no, wɔkyerɛ sɛ mmarima a wɔn dodow si 5,368 a wofi Gloucester kurow a nnɛ emu nnipa bɛyɛ 30,000 no na wowuwui bere a na wɔreyi mpataa wɔ po mu no. Wɔakyerɛw nkaedum no ho sɛ: “Mframa a ano yɛ den ne asorɔkye akɛse a ɛyɛ hu a efi atifi fam apuei no bɔ faa wɔn mu binom mpofirim. Ebinom a na wɔn nkutoo te ahyɛmma mu no wuwui bere a wɔn ahyɛmma no yera fii ahyɛn akɛse a na ɛde wɔn ba mpoano ho no. Asorɔkye akɛse bi nso bɔɔ ahyɛn no bi ma ɛmemee. Ahyɛn akɛse twiw faa ebinom nso so.”

Nkaedum no ma yehu adwumaden a apofofo ayɛ ne asiane a wɔahyia mfehaha pii no ho adanse a ɛyɛ awerɛhow no. Twa sɛnea wɔn a wɔhweree wɔn kununom, agyanom, nuabarimanom, ne mmabarima de ahoyeraw sui no ho mfonini hwɛ. Nanso, Yehowa Nyankopɔn werɛ remfi akunafo, nnyanka, anaa wɔn a po faa wɔn no. Ɔsomafo Yohane kaa nea ebesi daakye yi ho asɛm sɛ: “Ɛpo yii emu awufo mae, na owu ne Hades yii emu awufo mae.” (Adiyisɛm 20:13) Wɔ wɔn wusɔre mu no, wɔn a ‘wɔde ahyɛn kɔɔ po ase’ no behu ‘Awurade nnwuma, ne n’anwonwade’ ampa.